Matthew 11 (TNFD)
1 Jisas bɨne anep umɨgan ak kɨlop, anɨgɨl gɨnɨmɨb agɨl agñɨtep gak. Agjuwɨl, ne man anɨb ak kelɨgɨl, taun kɨli okok ajɨlɨg, binɨb okok kɨlop takaw agñak. 2 Pen Jon Bɨ Ñɨg Pakñeb ak ne nag lɨ mɨdɨl, Klays tɨtay gak takaw ak nɨŋɨd, bɨne ogɨnap agyokak. Agyokek, Jisas yek ak amɨl, 3 nop agnɨŋɨd agɨlak, Nad Bɨ God nop aglup ak opan akaŋ, bɨ anɨb ak ke kod yonɨgun agɨlak? 4 Agelak Jisas kɨlop agak, Nɨbi adɨkɨd amɨl Jon nop agɨnɨmɨb, Chɨn amɨl nopun, 5 bɨ anɨb ak binɨb wɨdɨn koy gup okok gek wɨdɨn yɨbɨl lup agɨnɨmɨb agak. Binɨb tɨmud sawl lup okok gek takaw nepal agɨnɨmɨb agak. Binɨb tob tɨmel gup okok gek kanɨb aj tep gɨpal agɨnɨmɨb agak. Binɨb soy ladek lup okok gek mɨlep gup agɨnɨmɨb agak. Binɨb kubal okok gek tepayaŋ tɨkjakɨpal agɨnɨmɨb agak. Binɨb yɨmgeptek okok abe God takaw teplep ak agek nepal agɨnɨmɨb agak. 6 Pen takaw olap agɨnɨmɨb, Binɨb yɨp nep gos lɨnɨŋɨd, chɨgɨl mɨdebal okok, kɨlop tep gek mɨñmɨñ gɨnɨgel agɨnɨmɨb agak. 7 Anɨb agek, Jon bɨne okok amnɨlak. Amnɨlaknɨŋ, Jisas binɨb ap yelak okok kɨlop, Jon anɨgak ak agñak. Anɨb agak, Nɨbi ned man nep binɨb ma yelak nab okok abek ñɨn ak, tay gɨnɨg abek agak? Sɨd pal nokom olap yɨgen dad amɨl apɨl gup ak nɨgɨnɨg abek agak? 8 Akaŋ taynen abek agak? Bɨ chech teplep lup olap nɨgɨnɨg abek agak? Mel ak agak. Chɨn nopun, bɨ chech teplep lɨpal okok, gapman bɨnonɨm kal kɨles tɨmel okok kɨnɨbal agak. 9 Pen tap tay ak nɨgɨnɨg abek agak? Yokɨp ma abek, bɨ God gos ñek agñeb ak nɨgɨnɨg abek agak. Bɨ God gos ñek agñeb anɨb ak, bɨ yokɨp mel agak. Bɨ God gos ñek agñeb okok anɨb nep yelak ak pen, Jon ne bɨ anɨb okok kɨlop sɨlawak agak. God wog awl gɨnɨg owak agak. 10 Bɨ anɨb anop Jon, bɨlel buk Baybol ayaŋ ñu kɨl tɨkɨl agɨlak,God ne Ñɨne nop agup, Nɨgan, bɨ takaw dad ameb yad ak agyoken, ned amɨl kanɨb pɨdɨl kod yek, kɨdek nep agen amnɨgaban agup agɨl tɨkɨlak agak. 11 Yad nɨbop nɨŋɨd agebin, binɨb ned lum awl yelɨgɨpal okok ayɨp, mɨñɨl mɨdebal okok ayɨp, Jon ne kɨlop mɨdupsek sɨlawɨl, yɨb mɨdeb agak. Ak pen, binɨb yokɨp God ne kɨlop dɨl kod mɨdeb okok, kɨli Jon nop sɨlawɨl, yɨb awl mɨdebal agak. 12 Jon Bɨ Ñɨg Pakñeb apɨl takaw tep agñak ñɨn ak tɨkɨl, mɨd dad amɨl, bɨ sɨj tɨmel pakɨpal okok, kɨli God binɨb ne okok kɨlop dɨnɨgabun agɨl gos nepal agak. Bɨ anɨb okok kɨlop pakɨl, mɨŋel kuŋay yɨbɨl ñɨbal agak. 13 Takaw Mosis ñu kɨl tɨkak ak sek, bɨ God gos ñek agñeb okok ñu kɨl tɨkɨlak ak sek, kɨli God takaw ak agñolɨgup agak. Takaw anɨb ak ag dad apel apel nɨm, Jon owak agak. 14 Pen takaw agɨnɨgebin ak dɨnɨgabɨm akaŋ ma nepin agak. Buk Baybol tɨkɨl agɨlak, Bɨ God gos ñek agñeb Yilayja ownɨgab agɨl tɨkɨlak ak, takaw anɨb ak Jon ownɨgab agɨl tɨkɨlak agak. 15 Nɨbi binɨb tɨmud sek okok, takaw anɨb ak nɨgɨnɨmɨb agak. 16 16-17 Yad nepin, binɨb mɨñɨl ñɨn awl mɨdebal okok, ñapay sɨkol ogɨnap tek mɨdebal agak. Ñapay sɨkol okok, kɨli sɨlpɨŋ ñɨlɨg ogɨnap apal, Dachɨŋ pakon, taynen kɨgom ma papɨm apal agak. Pen kɨmep chɨb gek tek agon, taynen chaŋ ma lɨpɨm apal agak? Gɨpal tek ak binɨb mɨñɨl mɨdebal okok kɨli gɨpal agak. 18 Jon apɨl tap ma ñɨbɨl ñɨg wayn ma ñɨbɨl gek, nop apal, Bɨ kɨcheki walɨjpal mulɨk sɨkek mɨdeb ak apal agak. 19 Pen Bɨ Olap Ñɨne apɨl, tap ñɨbɨl ñɨg wayn ñɨbɨl gek, nop apal, Nɨgɨm, tap kuŋay ñɨbɨl ñɨg wayn kuŋay ñɨbɨl gup apal agak. Ne bɨ takis dep okok sek, binɨb tap si tap tɨmel gɨpal okok sek, bɨ kɨli apal agak. Pen binɨb God takaw gos nɨgtep gek ak, kɨlop yomek nepal, God gos ne ak nag pal tek mɨdeb agak. 20 Jisas taun ogɨnap ned ajɨl, tap mageptek kuŋay pel gek nɨgɨlak ak pen, tap si tap tɨmel gɨpun ak taynen anɨgɨpun agɨl ma kelɨgɨlak. Anɨgelak nɨm, ñɨn anɨb ak Jisas kɨlop ag gɨl, takaw awl yɨbɨl agɨl agak, 21 Taun Kolasin binɨb okok sek, taun Betsayda binɨb okok sek, yad tap ogɨnap gen, nɨŋɨd kelɨgɨpɨm tek, nɨbi yul awl yɨbɨl dɨnɨgabɨm agak. Pen taun Taya binɨb okok sek taun Saydon binɨb okok sek, tap mageptek anɨb okok ned tek gek nepɨlap ak, tap tɨmel kelɨgɨpɨlap agak. Kelɨgɨl, chech talɨk yowak ogɨnap yɨmɨl, mab tun sɨŋak besɨgɨl, tun dɨlɨg dɨlɨg mɨdebɨlap agak. 22 Anɨb ak tek yad nɨbop agebin, God ne aglup ñɨn ak, binɨb ogɨnap kɨlop ag gɨnɨgab ak, Taya binɨb sek Saydon binɨb sek okok kɨli yul sɨkol olap tek dɨnɨgabal agak. Pen nɨbi Kolasin binɨb sek Betsayda binɨb sek okok yul awl yɨbɨl ak dɨnɨgabɨm agak. 23 Pen nɨbi taun Kapeneyam binɨb okok abe, God man ne alaŋ ma amnɨgabɨm, God nɨbop pɨsnep mab ke yɨneb kaw mɨgan ayaŋ dɨyokɨnɨgab agak. Pen taun Sodom binɨb okok sek, tap mageptek anɨb okok ned tek gek nepɨlap ak, taun Sodom ak mɨñɨl nep yobɨkop agak. 24 Anɨb ak tek yad nɨbop agebin, God ne aglup ñɨn ak, binɨb ogɨnap kɨlop ag gɨnɨgab ak, Sodom binɨb okok kɨli yul sɨkol olap tek dɨnɨgabal agak. Pen nɨbi Kapeneyam binɨb okok yul awl yɨbɨl ak dɨnɨgabɨm agak. 25 25-26 Won anɨb ak Jisas agak, Bapi, nad Bɨawl man nad alaŋ sek lum awl sek kod mɨdeban ak, gos nad ak ke nɨge tep gup adek ak gɨpan agak. Binɨb chɨn binɨb awl gos tɨpagɨl nopun apal okok kɨlop nɨŋɨd, gos tep nad ak dɨ we gɨpan agak. Binɨb chɨn gos tep ma mɨdobun, ñapay sɨkol tek mɨdobun apal okok kɨlop dɨl, gos tep ñɨban ak, nep tep agebin agak. 27 Bapi tap ne ak mɨdupsek yɨp ñub agak. Binɨb okok Ñɨ ak ma nepal, Bapi ne nokom nop nɨgup agak. Pen Bapi nop abe binɨb okok ma nepal, Ñɨ anɨb ak ne nop nɨgup agak. Pen Ñɨ ak ne binɨb gos tep ñin agɨl nɨgup okok gos tep ñɨnɨmuŋ, Bapi nop nepal agak. 28 Anɨb agɨl agak, Nɨbi binɨb wog kɨles gɨl koslam mɨdebɨm okok mɨdupsek, yɨp yɨl apem, gen kɨmɨgel mɨdɨl añɨŋ lɨnɨgabɨm agak. 29 Yad bɨ sayn tep kɨmɨgel mɨdebin tek, yad ayɨp nep ajɨl yad gɨtep gɨpin ak nɨgtep gɨl nɨm, yad gen kɨmɨgel mɨdtep gɨnɨgabɨm agak. 30 Pen wog yad ak nɨbop ñɨl gɨnɨmɨb apin ak, koslam ma gɨnɨgabɨm tek agak. Gem nɨbop tep gɨnɨgab agak.