Philippians 2 (TNFD)
1 Klays nɨbop gek gos sek mɨdebɨm. Ne nɨbop mapen lek gos kuŋay ma nɨŋɨd mɨdtep gebɨm. God Kawnan ne ak nɨb ayɨp jɨmñɨl mɨdebɨm. Mam ay okok kɨlop mapen nɨŋɨd gɨtep gebɨm. Takaw anɨb anep mɨdupsek mɨdeb, 2 anɨb ak tek nɨbi gos nokom nɨŋɨd, jɨmñɨl mapen lɨnɨmɨb. Pen chɨn ayɨp tap nokom gɨnɨgun agɨl gos nɨgɨnɨmɨb. Anɨgem, yɨp tep yɨbɨl gek mɨñmɨñ gɨnɨgayn. 3 Nɨbi gos chɨn ke nɨŋɨd kɨdek gɨl, chɨn nep binɨb awl yonɨgun agɨl gos ak ma nɨgɨnɨmɨb. Nɨbi pen, binɨb tam okok tek mɨdɨl, binɨb okok yɨb kɨlop dad aplanɨmɨb. 4 Chɨn ke mɨdtep gɨnɨgun agɨl gos ak ma nɨgɨnɨmɨb. Binɨb okok abe mɨdtep gɨlaŋ agɨl gos ak nɨŋɨd, kɨlop gɨtep gɨnɨmɨb. 5 Klays Jisas ne gos nɨgak tek ak, nɨbi gos anɨb ak nep nɨgɨnɨmɨb. 6 Ne God yek tek yek ak pen, yad God yɨb awl ne ak dɨnɨm agɨl gos ak ma nɨgak. 7 Ne ke God yek tek ak kelɨgɨl, bɨ wog gɨñeb tek yek. Bɨ sɨlokek, binɨb okok kɨli nop nɨgɨlak, ne ke bɨ yɨbɨl yek. 8 Yɨb ne ke dad ma aplanɨl, God agak tek nep gɨ dad amɨl, mɨd dad amɨl kumak. Mab bak alaŋ chɨpɨl pak tɨbɨk lel kumak. 9 Ne anɨgak anɨb ak tek, God Jisas nop dad aplanɨl, yɨb nop dad adek awl alaŋ aplanak. Pen yɨb teplep yɨbɨl olap nop agek, kɨles awl sek yɨb awl adek alaŋ sek dak. 10 God ne Jisas nop yɨb awl anɨgɨl agak ak nɨm, kɨli God man ne alaŋ mɨdɨl, lum awl mɨdɨl, lum muk okok mɨdɨl gɨnɨgabal okok, mɨdupsek kɨgom yɨmɨl nop agnɨgɨnɨgel. 11 Agnɨŋɨd, mɨdupsek agyɨkɨl agɨnɨgel, Jisas Klays ne Bɨawl mɨdeb agɨnɨgel. Anɨb agel, Bapi God yɨb nop dad aplanɨmuŋ. 12 12-13 Anɨb ak bogɨlak tep yad okok. Nɨbi ayɨp mɨdɨl, takaw agen pel nɨŋɨd kɨdek gelɨgɨpɨm tek, mɨñɨl okol mɨdebin ak, abe gɨnɨmɨb. Chɨn nopun, God ne nɨbop tɨg asɨk dɨl, nɨbi nab okok pelnep golɨgup. Ne ke nɨbop gos tep ne ak ñɨl, kɨles ñaknɨŋ, nop tep gɨnɨgab ak gun agɨl gɨpɨm. Anɨb ak nɨm, nɨbi jel gek pɨlɨkɨl wog kɨles gɨl gɨ mɨdem, God nɨbop tɨg asɨk dɨnɨgab ak, ne nɨbop gek anɨb ak dɨnɨgabɨm. 14 14-16 God gos ne anɨgɨl mɨdeb, nɨbi ñapay ne teplep yɨbɨl yenɨmɨb. Binɨb suŋtep takaw ma mɨdeb okok mɨdɨl, tap tɨmel olap nab nɨbi ma yenɨmɨb. Pen takaw pel mɨdep ak kɨles gɨl dɨnɨmɨb ak nɨm, gap pogɨlɨn wɨsɨp alaŋ mɨlek gup tek yenɨgabɨm, binɨb lum awl nab okok. Binɨb anɨb okok, kɨli gɨtep gep ak kelɨgɨl, pel gɨ tɨmel yɨbɨl gɨpal. Anɨb ak tek, tap okok mɨdupsek gɨnɨgabɨm ak, kɨmɨgel mɨdɨl gɨnɨmɨb. Takaw kuŋay ma agɨl, takaw penpen ma agɨnɨmɨb. Anɨgenɨgabɨm, Klays adɨkɨd ownɨgab ñɨn ak, nɨbi gɨtep gɨpɨm ak gos nɨgen yɨp tep yɨbɨl gɨnɨgab. Pen yad anɨb nɨgɨnɨgayn, wog awl nɨbop nab okok gɨtep gɨpin ak, yokɨp ma gɨpin. Takaw apin anɨb anep dɨpɨm. 17 Nɨbi Klays nop gos lɨnepɨm ak, gos anɨb ak God nop tap sɨbog ñeb tek gɨpɨm. Pen yad ma nepin, yɨp paklel kumen, nɨkɨm yad sogɨnɨgel tek lup akaŋ? Anɨgenɨgabal, nɨkɨm yad ñɨg wayn sɨbog ñɨnɨgel tek dɨl, tap nɨbi God nop sɨbog ñɨbɨm ak sek dɨl, omɨŋal gɨl sogenɨgel, yɨp tep gek mɨñmɨñ gɨnɨgayn. Yad nɨbi ayɨp mɨdupsek mɨñmɨñ gɨnɨgabun. 18 Pen tap okok anɨgɨnɨgab ak nɨŋɨd, abe mɨñmɨñ gɨlɨg tep gaknɨŋ yenɨmɨb. Nɨbi yad ayɨp mɨñmɨñ gɨnɨgabun. 19 Bɨawl Jisas yaw agenɨgab, ñɨn wulep Timoti nop agyoken am nɨbop nɨgɨnɨgab. Nɨŋɨd adɨkɨd apɨl, nɨbi tɨtay dɨl mɨdebɨm takaw anɨb ak agek, yɨp tep gɨnɨmuŋ. Yɨp anɨgɨl agɨnɨmuŋ agɨl, nop agyokɨnɨgebin. 20 Timoti ne nokom yad gos nepin tek nɨgup. Yad nɨbop yɨmug nepin tek nɨŋɨd, kɨlop gɨñɨnɨm agɨl pel gos nɨgup. 21 Bɨ ogɨnap, kɨli mɨdupsek tap kɨli ke nep gos nɨŋɨd, Jisas Klays tap nop ak gos ma nepal. 22 Timoti ne pen yɨp kodek, bɨ apɨlmɨŋal tek takaw teplep ak agñɨl wog gɨpul. Anɨb ak ne bɨ tep yɨbɨl mɨdɨl wog gɨtep gup ak, nɨbi nepɨm. 23 Anɨb ak pen yɨp tɨtay dɨnɨgab ak kod mɨdɨl nɨgɨnɨgebin. Nɨgjuwɨl, won anɨb ak nop agyoken am nɨbop nɨgɨnɨgab. 24 Pen yad anɨb ak nepin, Bɨawl ak yɨp kod mɨdaknɨŋ, wulep mɨdeb yad abe apɨl nɨbop nɨgɨnɨgayn. 25 Pen yad nepin, mam Epaploditus nop agyoken, adɨkɨd am nɨbop nɨgɨnɨmuŋ. Ned nɨbi nop agyokem yɨp gɨñɨnɨg owak. Apek, chɨl bɨ chɨm kadɨŋ gep tek mɨdɨl, God wog ak jɨmñɨl gɨpul. 26 Mɨñɨl pen ne nɨbop nɨgin agɨl pel gos kɨles gɨl nɨgup. Pen ne nɨgup, nop tap gup agel nepek, anɨb ak chɨbol yul awl yɨbɨl nɨgup. Anɨgek, yad nop agyoken am nɨbop nɨgɨnɨmuŋ. 27 Nɨŋɨd apun, nop tap awl gek kubɨkop ak pen, God ne nop mapen nɨgak. Pen nop nokom mel, yɨp abe mapen nɨgak. Ne kubɨkop ak, yɨp mɨŋel awl yɨbɨl gaknɨŋ mɨdebɨnep ak nɨm, nop gek ma kumak. 28 Anɨb ak Epaploditus nop agyokin agɨl gos nokom nɨŋɨd, agyoken amjakek nop nɨgɨnɨmɨb. Nop nɨŋɨd, tepayaŋ mɨñmɨñ gɨnɨmɨb ak nɨm, gos kuŋay nepin tek ma nɨgɨnɨm. 29 29-30 Nɨbi yɨp gɨñɨnɨg gos nɨgɨlɨg yelɨgɨpɨm ak nɨm, nop agyokem yɨp owak. Apɨl wog gɨl, Klays wog ne ak gɨl kumnɨg gak. Ñɨn anɨb ak yad ke mɨdtep gɨnɨm agɨl gos ma nɨgak. Yɨp gɨñɨnɨg owak wog anɨb ak nep gos nɨgak. Mɨñak awl gak ak pen, mɨñak gos ak ma nɨŋɨd pel wog kɨles gɨl gak. Anɨb ak tek ne amjakek, mam chɨn Bɨawl yɨl ayɨp mɨdobun agɨl, nop mɨñmɨñ gɨlɨg ag dɨdeg lɨnɨmɨb. Ne ayɨp, bɨ kɨli ne wog gɨtep gup tek gɨpal okok ayɨp, kɨlop yɨb awl lɨnɨmɨb.
In Other Versions
Philippians 2 in the BOHNTLTAL
Philippians 2 in the KBT1ETNIK
Philippians 2 in the TBIAOTANT