Philippians 2 (TNTIK)

1 Kamba mwahailumba na Kilisito na kugangamala, kamba unogelwa wake wowasamhusa, kamba moilumba na Loho Yang'alile na kamba mwahawa na mizoyo inogile na kuyonela bazi mweye kwa mweye, 2 avo itendeni ndeng'helelo yangu yenele kwa kugesa kinhu kimoja na unogelwa umoja na moyo umoja na muwe na nzewele imoja. 3 Sekemuwe na gahigahi hebu magoda gelibule kinhu, lakini kwa uhole muwagese wayagwe kuwa wanoga kubanza mweye. 4 Kila munhu sekeyalole kiyolonda mwenyego kiiyeka, lakini vivija yalole kiwolonda wanhu wayagwe. 5 Mugese kamba viyagesile Yesu Kilisito. 6 Kilisito viyali kakala kweli Mulungu,lakini hagesile bule kamba kuigala na Mulungu kinhu cha kunanahila, 7 lakini kwa kulonda mwenyego,kaleka vinhu avo vose kaitenda kamba viyali mtumwa,kaleligwa kamba viwoleligwa wanhu,kaoneka kwa kihanga cha wanhu. 8 Kaitenda mwenyego mdodo, munhu yotegeleza mbaka ifa yake,ona ifa yake mumsalaba. 9 Lekaavo Mulungu kamwinula mbaka uchanha ng'hani,kamgwaa twaga kulu kubanza matwaga gose. 10 Avo kwa ukulu wa twaga da Yesu,vinhu vose viumbigwe, vili kuulanga na vili mwiisi na kuwochola wanhu wafile,vose vimfugamile, 11 na kila lulimi lulonge kuwa Yesu Kilisito ayo Mndewa,kwa ukulu wa Mulungu Tata. 12 Mbwiga zangu siku zose vinikalile na mweye munitegeleza, na hata sambi nakutali na mweye wambeni kunitegeleza. Kwa bwembwe na kugwaya sang'haneni muladi ukombozi wenu utelele, 13 kwavija Mulungu ayo yosang'hana siku zose mgati mmwenu, kuwatenda musulukile kusang'hana kamba viyolonda mwenyego. 14 Tendeni kila kinhu bila kuiyalala hebu kuibamilila, 15 muladi munoge na mung'ale na muwe wana wanogile wa Mulungu, wokala mwiisi ya wanhu wapotele na wene nzambi. Mweye mong'ala hagati yao kamba nhondo zili kuulanga, 16 mugoge mbuli ya ugima muladi mdisiku da Kilisito niigodele mweye kamba kugaya kwangu na sang'hano yangu havagile bule. 17 Hata kamba ugima wangu wogidigwa uwe nhambiko mna isang'hano yenu ya kutamaniligwa ili nhosa kwa Mulungu, yahawa avo, nodeng'helela ng'hani na mweye modeng'helela na niye. 18 Avo na mweye vivija mudeng'helela na kusekelela hamoja na niye. 19 Mndewa Yesu yahalonda, nolopola kumtuma Timoseo kumwenu, muladi nahahulika mbuli zenu nisamhuke. 20 Kuduhu munhu yoyose iyagwe yowagesa ng'hani kamba heyo. 21 Wanhu wayagwe hawamsang'hanila Yesu Kilisito, ila wosang'hanila mbuli zao wenyego. 22 Lakini mweye wenyego mumjuwa goya Timoseo viyofaya, heyo na niye, tusang'hana hamoja kamba munhu na mwanage kuwapetela wanhu Mbuli Inogile. 23 Avo nogesa kumtuma kumwenu hima nahakona mbuli zangu vondaziwe. 24 Avo, nomtamanila Mndewa kuwa niye mwenyego sikawa kwiza kumwenu. 25 Lakini nogesa kumbweza kumwenu ndugu yangu na msang'hanaji miyangu Epafuladito, yailumbile na niye kuigombela Mbuli Inogile na vivija msenga wenu mumtumile yanitaze. 26 Kwavija kowagelegeza ng'hani na konyunyuwala ng'hani kwavija mweye muhulika heyo kakala mtamu. 27 Ona, kakala mtamu, na kalonda kufa. Lakini Mulungu kamonela bazi, siyo heyo yaiyeka, vivija kanyonela bazi niye, muladi sambi ninyunyuwale ng'hani. 28 Avo nolonda ng'hani kumtuma kumwenu, muladi vondamumone kabili mudeng'helele na kunyunyuwala kwangu kumale. 29 Mumbokele goya kamba miyenu kwa Mndewa. Na muwategeleze wanhu waigalile na heyo, 30 kwavija kalonda kufa mbuli ya sang'hano ya Kilisito, nayo kauhonza ugima wake muladi yanitaze kija kimulemelwe mweye kunhaza.

Philippians 2 (TNTIK)

In Other Versions