1 Timothy 6 (TOMA)

1 Niiti kpein ti ga duɔiti, ti maanɛɛʋɛ ti unfemai ve ti-maliɠiiti bɛ, naa ɠa a kɛ nu nɔpɛ ge mina woo ɲɔu wo GALA daaseigi laalɔɠɔma ta kala gooi ma é wosu. 2 Duɔi niiti ti-maliɠiiti ti ga kidaaleʋe nuiti, ti mina ti ʋɛlɛlala, ti ʋa sumɔ kɛɛɠɛloun vai ma. Kɛni tɔun ti boti ɠɛ ti ʋɛ sɛsɛ ga pagɔ, tɔɔzei niiti duɔi naati ti ta-wotii zulɔnɔgi zɔlɔɔsu, ta ga kidaaleʋe nuiti, ti nɛai ga ʋe ta tiye.Naa ɠa maanɛai è ma ɠalagi wo, è tɛnɛgi wo da. 3 Ni nui ta a kala kili bona, é la vaani ade-Maliɠii Yesu Kilista ná-gaama ɓɔɛiti bu, ta kalagi nii soloogai ada-ɠidaaleʋei ma, 4 naa laavegɛ ga wasogi, é la faa nɔpɛ kwɛɛ. Maaɠaali zeeɓɛi ɠa é ba, ta kpɔɛleʋei é ʋilɛ wooiti ba. Naa ɠa tolo ɲɔi ɠulazu su, ta sakpegiti, ta tɔɠɔ ɠoloɠologi, ta sooʋima ɲɔiti, 5 ta maaɠaaliiti ti la ɓega nuiti zɔɠɔzu, ti-ɠigi ɠoloɠologai, ti la mɔ gaamai ɠwɛɛ pɛ, ti ɗa ɠisiɛ ga ta ɠidaaleʋena GALA ma, naa ɠa é ga tɔnɔ sɔlɔɔ saɓui, ti ʋa ɓɛtɛ. 6 Tama nu a ɠidaaleʋena GALA ma, naa ɠa nui ʋɛ ga kpɛtɛ wola, ni ná-sɔlɔɔgi é zea, naa a ɛnɛkɛna. 7 Mazɔlɔɔ de la ʋaani ga ani nɔpɛ niima eteai zu, de la zooga de ʋa ani nɔpɛ seɠe ya, de ʋa lii la. 8 Ni daamianigi ɠa de ya, ta seɠeiti, naati maanɛɛʋɛ ti de yiilɛi. 9 Niiti ti pɔ ga ti ɓɛtɛ, ta ɗa loo tɛgai zu, ti ɠɔ ga ɠimalala yiimaɠɛɛ ɲɔi ma ʋalii ma mɔinmɔin, nii a ɗa nuiti koloɠolo, é ti lɔ undaaʋiligi zu. 10 Mazɔlɔɔ walii ná-nɛɛbɛi ɠa ga faa ɲɔi ma zii pɛ ma zapei. Tanigaani ti ʋilɛga sɔlɔɔ fai ma ɠaazuɠulapɔi ʋolu, ti ɓɔɠɔ loo ya, ti maaɠooza kidaaleʋei ʋa, ti ɗa ɓɔɠɔ yiiɓɔlɔ ga maanɔɠɔ mɔinmɔin. 11 Kɛlɛ ɗɔun, GALA nui, ɓeteʋe niima vaiti ba. Telebodai ɠaiziɛ, ta GALA gaazuluabai, ta kidaaleʋei, naa ʋɛɛ nɛɛbɛi ʋa, ta ziilɔɔi, ta sɛsɛbogi. 12 Kidaaleʋe ɠɔɔ ʋagɔi ɠɔ, è ɠɔoɠɔ zɛnvui zo kpe, mazɔlɔɔ GALA ge è lolini ga è zɛnvui naa ɠwɛɛ siɛgi zu è ma zeele woo ʋagɔi woni da zeele mɔinmɔin gaazu. 13 Nà è levezu GALA gaazu nii é zɛnvui veezu anii pɛ zea, ta Yesu Kilista ɠaazu, nii é zeele woo ʋagɔi woni Pɔnse Pilate ɠaazu: 14 Ɠolo devei ʋɛ, makɛ ma ɲadedai zu, peelalazu mina ɠɛ è ʋa, eyɛsu de-Maliɠii Yesu Kilista ɠula kɛlɛma. 15 GALA ge kulazu kɛlɛma yeeɠɛɠalai zu, é deveai. Toɠa ga Undaanɛ Nui, é kundiɠii pɛ unda, masagiti ta-Masagi ʋe, maliɠiiti ti-Maliɠii ʋe. 16 Tɔ ɠila kpe ka é la zaa pɛ. Toɠa zeini wozakalagi zu, nu nɔpɛ ge la zooga é ʋa maaɓuɠaa ba, nu nɔpɛ ge la kaani, ta la zooga é ʋa ka. Toɠa nɔnɔ ga bɔɔlɔi ta zɛbɛi ɠɔoɠɔ! Amina! 17 Devei ve niima eteai zu naavolo nuiti zea, ga ti mina waso, ti mina ɠito naavoloi ʋa, nii é la yɛsu ná, kɛlɛ ti ɠito GALA ba, nii é anii pɛ feezu ade ʋɛ, é pooʋa ma, naa ɠa a kɛ de ɠoozunɛ. 18 Bo ti ma ga ti ɗa faa ʋagɔi ɠɛ, ti ɠɛ ga kpɛtɛ nua ti-ɠɛɛwoti ʋagɔiti su, ti ɠɛʋele ɓɛtɛ yeenɔpɛ ga ti nu ɠula faa zu. 19 Ʋele ɠana ta naavolo ʋagɔ ɠitei ɠaalɛ ba la ɓɔɠɔ ʋɛ, yeeɠɛɠalai vaa ma é ʋaazu, naazu ta zoo ti zɛnvu ɠitei zɔlɔɔ. 20 Ee, Timɔte, nii kalivaai è ma, naa makɛ ga pagɔ. Wafuun kpɔɛiti zɛ ná, niiti ti la zolooni kidaaleʋei ma, ta maaɠaali ɓɔɛiti, niiti ti tanigaa ti ɠɛɛzu ma kazemazu, ɠimalai ɠa ti zu. 21 Tanigaani ti ɓɔɠɔ ɠɛɛni ga naama vaaɠwɛ nuiti, ti ɠaka, ti ɓɔɠɔ zeɠe kidaaleʋe ʋelei ʋa.GALA ná-zaalai yɛ wo ʋa!

1 Timothy 6 (TOMA)

In Other Versions