Deuteronomy 17 (TOMA)

1 À mina sua ɠula ga zalaɠa Ɠɔoɠɔ GALAGI wa-ƓALAGI ʋɛ, nii nɛɛʋuzuʋɛ tanɔpɛ ge ba, é ɠɛni ga nikɛi, ɓaa baalagi, ɓaa bolii, mazɔlɔɔ toɠa ɠɛ ga kɔzɔba ani Ɠɔoɠɔ GALAGI wa-ƓALAGI ʋɛ. 2 Tanisu taaiti Ɠɔoɠɔ GALAGI wa-ƓALAGI ti veezu wo ʋɛ, zunui ta, ɓaa anzanui ta ɠa ɠɛ ta zu, é ɗa wa-ƓALAGI Ɠɔoɠɔ GALAGI wanama vai ɠɛ, é ná-minazeɠegi ɠoloɠolo, 3 é li, é ɗa gala kiligiti dɛbi, é ɗa nɔkɔ ti wu, é ɗa nɔkɔ foloi wu, ta alugi, ɓaa somideɠaiti kpein, nii é devei laalɔɠɔma nii gè feeni. 4 Wa ma woo mɛnina feya, wo ɠwɛɛ faa ɠɛ su, à ná wola wuuɓɛ ga pagɔ. Ni gaama ʋe, fai naa ɠoleʋɛ, kɔzɔba vai naa ɠɛɛʋɛ Izilayɛle nuiti saama, 5 nu ɲɔi naa, é ɠɛni ga zunu ɓaa anzanu, wa ʋaa la nu lɛɛzuʋɛ taazuʋɛ, wo sɔ ga kɔtuiti, é za. 6 Nii maanɛai é za, zeele felegɔ ɓaa saʋagɔ ná-zeele wooi ɠa wa lo ma, wo paa, zeele ɠila ná-zeele woo la kula ɠɛa su. 7 Zeeleiti ta ɠɛ ga ma mɔungi ti kɔtuiti pili ma, paa vai zu, nuɓusɛi mɔtaiti ta ɓɔ ti ʋa niina. Wa faa ɲɔi ɠula ɓɔɠɔ zaama ɠana. 8 Ni fai ta a ʋaana, é ʋilɛ nu ʋaa vaa ʋa, ɓaa kpɔɛ vaa, ɓaa nu maawana vaa, ɓaa faa ta, nii kpaai, wa li ga naa, ʋɛ Ɠɔoɠɔ GALAGI wa-ƓALAGI yeelosu ná ʋa. 9 Wa li, wo Levi nuiti pɛtɛ, ti ga zalaɠa ɠula nuiti, ta tukpɔɠaaleʋe nui é ná. Wa ti ɠaazaɠa, ti tukpɔi ɠaaleʋe wo ʋɛ. 10 Wa kɛ ɠana, eɠɛʋelei ta tukpɔi ɠaaleʋe la wo ʋɛ, ʋɛ Ɠɔoɠɔ GALAGI yeelosu ná ʋa. Wa ɠaaɓa, wo ziɛ ga naa, nii ta wo ɠala da. 11 Wa ziɛ ga tɔ gooi, ta wo ɠala da, ta tukpɔi naa ti gaaleʋezu, wo mina zeɠe ta-levei gila kpalaa ba. 12 Ni nui ta a ɠɛlɛna ga ná-wasogi maaʋele, é la woiloni zalaɠa ɠula nui wooi ma, nii é Ɠɔoɠɔ GALAGI wa-ƓALAGI ná-botii zu, ɓaa tukpɔɠaaleʋe nui é ná, zunui naa ɠa za. Wa faa ɲɔi ɠula ɠana Izilayɛle nuiti saama. 13 Nuɓusɛiti ta mɛnina, dualuagi ɠa ti kpein so, nu nɔpɛ ge la mɔ waso fai naa ma zii ta ɠɛa. 14 Siɛgi zu wo lɛɛzu la naama yooi zu, nii Ɠɔoɠɔ GALAGI wa-ƓALAGI feezu wo ʋɛ, wo seɠe ga wɔnɔ, wo zei su, tanisu wa ʋaazu ɠɛɛzu ma: «Ade masa sei ɓɔɠɔ unda, eɠɛʋelei zii zɔiti ti la, ti de-maaɠoolii zu.» 15 Wa masagi naa zei ɓɔɠɔ unda, nii Ɠɔoɠɔ GALAGI wa-ƓALAGI a yiimazeɠe la. Zou loin ta ɠa wa seɠe, wo sei ɓɔɠɔ unda, wo la zooga wo ʋa yeelo wɛɛn ʋa ga wa-masagi. 16 Masagi naa mina sooi wola mɔin ɓɔɠɔ ya, é mina nuɓusɛiti teʋe Ezipete yooi zu, ga ti li, ti soo mɔinɗa ɠeya ná. Mazɔlɔɔ Ɠɔoɠɔ GALAGI ɠɛni wo ma: «À mina mɔ ɠale ma, wo ʋa ziɛ ga pelei ná.» 17 Anzai mina mɔin, kigi a ʋa ʋote, a ʋa zeɠe GALA ba. É mina walii wola ɠaalɛ ba, ɓaa zanugi. 18 Siɛgi zu a zeina la masa kpɔkpɔgi ɠa, toɠa tɔ sɛʋɛi zɛʋɛ ɓɔɠɔ ʋɛ, sɛʋɛi ta zu, toɠa bo Levi nuiti ma, ti ga zalaɠa ɠula nuiti, ga ti fe zea. 19 Naama zɛʋɛi mina ɠula zea, é ɗa kala sii ma voloi pɛ su, naa ɠa a kɛ é Ɠɔoɠɔ GALAGI ná-GALAGI ɠaazuluaba vai maaɠɔli, é tɔ gooiti kpein so, ta deveiti, é ɗa ziɛ ga tiye, 20 naa ɠa a kɛ, é mina ʋili kibɔɔlɔmai zu, é ʋa waso zou nuiti ma, é ʋa zeɠe devei gila kpalaa ba, nii a kɛ, sii zuɠooza ná-masadai zu, ta mavofodaiti, Izilayɛle nuiti saama.

Deuteronomy 17 (TOMA)

In Other Versions