Deuteronomy 17 (YAPE)

1 “Dab mu pi’ed e garbaw fa saf ni maligach ngak SOMOL ni Got romed ni bay bang u downgin nib kireb; ya dabun SOMOL. 2 “Fa’an gimed ra pir’eg u lan reb fa yochi binaw romed be’ nib mo’on fa be’ ni bpin nike denen nib togopluw ngak SOMOL ke th’ab fare m’ag ni ngongliy Got u thilmed 3 ni bochan e be pigpig ma be tay fan yug boch e got, ara yal’, ara pul, ara t’uf, nib togopluw ko tin keyog SOMOL. 4 Ma fa’anra kam rung’aged ban’en ni aray rogon, mi gimed muruwliy ngari mich u wun’med ko rriyul’ fa dangay. Ya fa’anra riyul’ nike buch ban’en ni aray feni kireb u lan yu Israel, 5 ma aram e ngam feked facha’ nga wuru’ fare binaw ngam malang niged nge yim’. 6 Machane, rayag ni ngan thang e pogofan rok ni fa’anra l’agruw fa bo’or ko l’agruw e girdi’ nra micheg nike rin’ facha’ e kireb. Dab ni thang e pogofan rok facha’ ni fa’anra kemus ni ta’abe’ e micheg e tin ke rin’. 7 Fapi girdi’ ni yad e mich ko kireb nike rin’ facha’, e yad e som’on ni ngar malang niged, mfini malangnag gubin e girdi’, aray konawo’en mi gimed thang mit e biney e kireb. 8 “Fa’anra bay yu pa’ e oloboch ni kay gi mo’maw’ ngak e pi tapuf oloboch u lan binaw ni ngar pithged, ni bod e yu pa’ i oloboch u mat’wey ko binaw, ara maad’ad ni kantay ku be’, ara pi oloboch ni kan thang e pogofan ku be’ nderyag i ki’eg ko ni kal riy ara ni leamnag. Re yodro’ ban’en, ma ngan yan ko fa ta’gin’en tagil’ e liyor ni SOMOL ni Got romed e turguy, 9 mi gimed fek fare pa’ i oloboch i yan ngak fapi prist ko Levi nge ngak e cha’ ni ir e tapuf oloboch e ngiyal’nem. Me mangyad e ra pithged fare pa’ i oloboch. 10 Yad e bay ra dugliyed, ma gimed e ngam rin’ed nrogon ni karoged ngomed. 11 Mu faned e tin kar dugliyed mi gimed rin’ e tin karogned ni dab mu paged bochiyang riy. 12 En nra tun ngan’ ndabi fol rok fare tapuf oloboch fa fare prist ni ir e be pigpig e ngiyal’nem e yira thang e pogofan rok; aray kanawo’en me math mit e biney e kireb u Israel. 13 Ma aram mra rung’ag gubin e girdi’ murung’agen miyad rus, ma dakriy be’ ni ku ra tun ngan’ ni nge rin’ e biney e ngongol. 14 “Nap’an ni gimed ra thap ngalan fare nam ni bayi pi’ SOMOL ni Got romed ngomed, ni ngam pired riy, ma aram e bay mu turguyed nib t’uf ni nge yag reb e pilung ngomed ni bod urngin e pi nam nib liyegmed. 15 Dabisiy nre mo’on ni ngam mel’egned ni nge mang pilung e ir e cha nike mel’eg SOMOL. Dab mu ted ba milekag ni nge mang pilung romed; dabisiy ni kabigmed. 16 En nra pilung e dabi leamnag ni nge yo’ornag e os rok ni fan ko ba’ rok e salthaw, ma dabi l’oeg e girdi’ nga Egypt ni ngar chuw’iyed e os. Ya keyog SOMOL ni girdi’ rok e dakuriy bi’id ni ngki sul ngaram. 17 Fare pilung e dabi yo’or le’engin, ya irera’ e n’en nra k’aring nge pi’ keru’ ngak SOMOL; ma ku dabi marweliy ni nge fel’ rogon ko silber nge gol. 18 Ma nap’an nra mang pilung, ma thangri yoloy ngalan bake babyor fapi motochiyel rok Got nge pin’en ni i fil Got ngak e girdi’ rok. Pi motochiyel ney e nge fek ko fa ken nem e babyor nth’abi som’on, ni bay rok fapi levitical prist. 19 Mi i tay e re ke babyor ney u charen, ngi i be’eg u n’umngin nap’an e yafos rok. Ya nge yag ni i par madgun SOMOL u wan’, mi i yul’yul’ ngi i fol u gubin e tin kanog riy ni ngan rin’. 20 Irera’ rogon ma dabi leamnag nib sorok boch ngak e pi’in yad nu Israel, ma dariy e ngiyal’ ni nge pi’ keru’ ko tin keyog SOMOL ni ngan rin’. Ma aram e ra par ngi i gagiyeg nib yo’or e duw, ma pi’in owchen e bay ur gagiyeg niged piyu Israel nib yo’or e mfen.

Deuteronomy 17 (YAPE)

In Other Versions