Exodus 7 (TOMA)
1 Ɠɔoɠɔ GALAGI ɠɛni Moize ma: «Wɛlɛ, nà è losu GALA tosuʋɛ Falaɠɔn ʋɛ, è-liɛ Aalɔn ɠɛ ga è laavaawo nui. 2 Ɗɔun, ɗa naati kpein bo, nii gè ʋaazu è levezu ma. È-liɛ Aalɔn ɠa lati, é ti wo ʋolu Falaɠɔn ma, ga é ɓe Izilayɛle nuiti ba, ti ɠula ná-zooi ʋa. 3 Nà ma, nɔ̀un, nà Falaɠɔn ɠigi ɓaazu, nà nà-poogiti ta nà-laavɔɔ vaiti kɛ, ná zeizu ɠɛ mɔinmɔin Ezipete yooi zu. 4 Kɛlɛ Falaɠɔn la ʋaazu woilosu wo-wooi ma. Názuʋɛ, nà yeeʋɛɛzu Ezipete yooi ma, gè nà-nu ɓulugiti kula Ezipete yooi ʋa, nà-nuɓusɛiti ti ga Izilayɛle nuiti, ga tukpɔɠaaleʋe wolai maaʋele. 5 Ezipete nuiti ta suɠwɛɛ naazu ga nà ɠa gè ga Ɠɔoɠɔ GALAGI, siɛgi zu gè ʋaazu yeemaalesu da Ezipete yooi maazu, gè Izilayɛle nuiti kula ti zaama.» 6 Moize ta Aalɔn ti naa ɠɛɛni, eɠɛʋelei nɔ kpein Ɠɔoɠɔ GALAGI devei veeni la ti ya. 7 Moize ná-konagi ɠɛni niina ga puulɔsaʋa (80), Aalɔn ná-konagi ɠɛ ga puulɔsaʋa maazu saʋagɔ (83), siɛgi zu ti liini la, ti ɓɔɛ Falaɠɔn ʋɔ. 8 Ɠɔoɠɔ GALAGI ɠɛni Moize ta Aalɔn ma: 9 «Ni Falaɠɔn a ɓɔɛna wo ʋɔ, é ɠɛ wo ma: ‹À laavɔɔ vaa ɠila kɛ,› ɗa ɠɛ Aalɔn ma: ‹Ɗa-lukpɔi zeɠe, è pili Falaɠɔn ɠakala zooi ma.› Toɠa ɠɛ ga kaalii.» 10 Moize ta Aalɔn ti liini Falaɠɔn ʋɔ bɛ, ti naa ɠɛɛni, nii Ɠɔoɠɔ GALAGI valini la ti ma. Aalɔn ná-tukpɔi ʋilini zooi ma Falaɠɔn ɠakala ta ná-botiɠɛ nu wolaiti, naa latini, é ɠɛ ga kaalii. 11 Kɛlɛ Falaɠɔn molikulagiti tolini, ta zoɠoiti. Tiya ɓalaa, ti naa ɠɛɠalai ɠɛɛni ga ta-zoɠolaiti maaʋele. 12 Ti kpein ti ta-lukpɔiti pilini zooi ma, naati ti latini, ti ɠɛ ga kaaliiti. Kɛlɛ Aalɔn ná-tukpɔi ta-lukpɔiti kpɔleni. 13 Falaɠɔn ɠigi ɓaani, é la ɠɛni woiloni Moizeni ta Aalɔn wooi ma pɛ, eɠɛʋelei nɔ Ɠɔoɠɔ GALAGI boni la. 14 Ɠɔoɠɔ GALAGI ɠɛni Moize ma: «Falaɠɔn ɠigi ɓaa, é la kɛɛzu, é ʋa ɓe nuɓusɛiti ba, ti ʋa li. 15 Li Falaɠɔn ʋɔ bɛ sobui nɔ, toɠa ɠulazu, é ɗa li ziɛ wolai Nile laaʋɛ. Tukpɔi zo ya, nii é latini, é ɠɛ ga kaalii. 16 Ɗa ɠɛɛzu Falaɠɔn ma: ‹Ɠɔoɠɔ GALAGI, Eɓulu nuiti ta-ƓALAGI, tèʋegɛ è ʋɔ bɛ ga gè bo è ma ga è ɓe ná-nuɓusɛiti ba, ti li, naa ɠa a kɛ ti dɛbi teʋebai zu. Kɛlɛ ɗɔun, zaaɠaza é la dɛ kɛɛni. 17 Ɠɔoɠɔ GALAGI wooi ɠaa: Ɗa ʋaazu kwɛɛsu nii maaʋele ma, ga toɠa ga Ɠɔoɠɔ GALAGI. Nà ʋaazu ziɛ wolai Nile loɠazu ga tukpɔi é zoni zèa, toɠa ʋaazu latisu, é ɠɛ ga ɲamai. 18 Kaleiti kpein ti ziɛ wolai Nile wu, ta za, ziɛ wolai Nile makugi ɠa ɠula, Ezipete nuiti ta ɠaaɓa wafuun ga ti ziɛ wolai Nile ta ɓɔle.› » 19 Ɠɔoɠɔ GALAGI ɠɛni Moize ma: «Ɠɛ Aalɔn ma: ‹Ɗa-lukpɔi zeɠe, è yeemaale Ezipete nuiti ta-ɗɛiti ma: ta-ɗɛ wolaiti, ta-ma ɓekegiti, ta-ɓoigiti, ta ta-ɗɛ yeɠe goiti. Ta ɠɛ ga ɲamai, ɲamai ɠa ɠɛ Ezipete yooi kpein su, gulu aniɲakaiti su ta kɔtu aniɲakaiti.› » 20 Moize ta Aalɔn ti naa ɠɛɛni, nii Ɠɔoɠɔ GALAGI valini la ti ma. É tukpɔi wuzeɠeni, é ziɛ wolai Nile loɠa Falaɠɔn ɠaazu, ta ná-botiɠɛ nu wolaiti gaazu, Nile ɗɛi kpein ge latini ga ɲamai. 21 Kaleiti ti zaani ziɛ wolai Nile wu. Ziɛ wolai Nile makugi ɠulani, Ezipete nuiti ti la mɔ ɠɛni zoosu ti ʋa ziɛ wolai Nile ɓɔle. Ɲamai ɠɛni Ezipete yooi kpein su. 22 Kɛlɛ Ezipete molikulagiti ti naa ɠɛɠalai ɠɛɛni ga ta-zoɠolaiti maaʋele. Falaɠɔn ɠigi ɓaani, é la woiloni Moizeni ta Aalɔn woo ma, eɠɛʋelei nɔ Ɠɔoɠɔ GALAGI boni la. 23 Falaɠɔn ɠaleni ma, é li ná-masa pɛlɛi wu, é la vɔlɔ ɠisɔlɔɔni niima vai ma ɲɛgɛlɛin. 24 Ezipete nuiti kpein ti zeɠeiti bɔɔni ziɛ wolai Nile maaɠoolii zu, ga ti kpɔɔle ɗɛ zɔlɔɔ, mazɔlɔɔ ti la ɠɛni zoosu ti ʋa ziɛ wolai Nile ta ɓɔle. 25 Ɠɔoɠɔ GALAGI ziɛ wolai Nile ɠoloɠologai ma, é kɛɛni su ga folo lɔfela. 26 Ɠɔoɠɔ GALAGI ɠɛni Moize ma: «Li Falaɠɔn ʋɔ bɛ, è ɠɛ ma: ‹Ɠɔoɠɔ GALAGI wooi ɠaa: Ɓe ná-nuɓusɛiti ba, ti li, naa ɠa a kɛ ti dɛ̀bi. 27 Ni è la ɠɛ kɛɛni, è ʋa ɓe ti ʋa, ti ʋa li, nà ʋaazu ɗa-yooi kpein suɠoloɠolosu ga zɔlɔgiti. 28 Ziɛ wolai Nile wuulaa ɠa ve ga zɔlɔgiti, ta ɠula bu, ti lɛ ɗa-masa pɛlɛi wu, ti lɔ è laa ʋɛlɛi wu, ta ɗa-ʋetei zu, ti lɛ ɗa-wotiɠɛ nuiti ta-ʋɛlɛiti bu, ta ɗa-nuɓusɛiti pɔ bɛti, ta ʋu ɗa-ɓulu mɔ zeɠeiti su, ta ɗa-ɓulu vukɔ ɠaayɔ aniɲakaiti su. 29 Zɔlɔgiti ta lɛ wo ma, wa ɗa-nuɓusɛiti, ta ɗa-wotiɠɛ nuiti kpein.› »