Ezekiel 32 (TOMA)
1 Kona puugɔ maazu velesiɛi (12), ma alu puugɔ maazu velesiɛi (12), ma volo mɔungi ma, Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, maawɔin wuyei loo Ezipete masagi Falaɠɔn ma, è ɠɛ ma:‹Ɗa ziiti saama eɠɛ zala ɓokpagi.Kɛlɛ ɗa faiti kɛɛzu eɠɛ falii,è ɗa maaɠɔɔ ɗa-ɗɛiti bu,è ɗa ziɛiti kpɔlɔ ga è-zapalagiti,è ɗa ma veinfeingiti kpɔlɔ. 3 Maliɠii Ɠɔoɠɔ GALAGI wooi ɠaa:Nà nà-tumɔi lɔɔzu è unga,siɛgi zu nuɓusɛiti ti mɔinzu la ti ɠaalɛ ba,ta è mɛɛn nà-seemai zu. 4 Nà è ʋili ya zooi ma, gè è la dɔɓɔi zu,wɔniiti pɛ ti ɗa ʋu è ma,dɔɓɔ zuaiti pɛ ti ʋa,ti è ma zuai ɠɛ ga laamianigi. 5 Nà è ma zuai vaza gizeiti ma,gè nɛmɛiti sulaave ga è ma ɓulukpulugiti. 6 Nà zooi maayɛɓɛ ga è ma ɲamai,é ɗa yei gizeiti ma,kɔtuɗɛi laazuʋɛti sulaa ɠa ve da. 7 Siɛgi zu è ɓesu la zɛnvui wo fai ʋa,nà geeɠɔlɔgi ɠaazulɔɔɠu,gè somideɠaiti gaazulɔɔɠu,gè foloi ɠaazulɔɔɠu ga tonaɓiingi,alugi la mɔ voloa. 8 Ɗɔun è maaʋele ma, anii kpein é geezuʋɛ,nà ti ma voloiti gaaʋa,gè kpidii ʋɛɛ ɗa-yooi ma,Maliɠii Ɠɔoɠɔ GALAGI wooi ɠana. 9 Nà nuɓusɛi ma mɔinmɔin kɛ unga wuulee,siɛgi zu gè ʋaazu la ga è ɠoloɠolo fai,ma wooi zeeli zooiti su,ʋɛti è la náti kwɛɛ. 10 Ti lɔtɔzu ɠa leʋe ɗa-vaa zu.Ta-masagiti sasu ɠa ɓali ɗa-vaa zu ga duai,nà ɠɛna nà-boɠa zɔkpɔi leʋeteʋe ti ɠaazu,è loobu voloi, ti zasu ɠa yɛ nɔ ɓalizu ɠɔ,ɛsɛ ge ɗa lua ga zɛnvui vaa. 11 Mazɔlɔɔ Maliɠii Ɠɔoɠɔ GALAGI wooi ɠaa:Ɓaɓilɔne masagi ná-boɠa zɔkpɔ ɠɔɔi ɠa loo è ma. 12 Nà zunu ɠɛzɛiti teʋe,ti ɗa-nuɓusɛ mɔinmɔingiti paa ga boɠa zɔkpɔi,tɛiti ti ziiti saama ga nu ɲɔu wolaiti.Nii kpein é ga Ezipete yooi ná-waso fai,ta naa pɛ suɠoloɠolo,ta ná-nuɓusɛ mɔinmɔingiti gaaleʋe. 13 Nà ɗa-loganiiti pɛ suɠoloɠolo ziɛ wolaiti kobaʋɛti.Nuɓusɛiti kɔɠɔi la mɔ ziɛi ɓɔlɔa,suaiti polokagi la mɔ kpɔlɔa ɓalaa pɛ. 14 Naazu ɠa nà ta-ɗɛiti da su la ga pagɔ,gè ɗa ta-ɗɛ wolaiti zei eɠɛ gulɔi,Maliɠii Ɠɔoɠɔ GALAGI wooi ɠana. 15 Nà Ezipete yooi zu ɠɛ ga teʋebai zu,gè ná-sɔlɔɔ bosuʋɛti pɛ kula zea,gè ná-nuɓusɛiti suwuɠaaleʋe.Ta suɠwɛɛ naazu ga nà ɠa gè ga Ɠɔoɠɔ GALAGI.› 16 «Maawɔin wuyei ɠaa, ta too, zii ɠiligiti ti-loun anzanuiti ta too Ezipete yooi ta ná-nuɓusɛiti faa zu,» Maliɠii Ɠɔoɠɔ GALAGI wooi ɠana. 17 Kona puugɔ maazu velesiɛi (12), ma alu puugɔ maazu velesiɛi (12) ma volo puugɔ maazu lɔɔlusiɛi (15) ma, Ɠɔoɠɔ GALAGI ɓɔɛni pɔ̀, é ɠɛ mà: 18 «Ɗa ʋe, zunui, wɔlɔ Ezipete nuɓusɛiti ta-vaa zu, ɗa wɔlɔ wooi yei ga tiye ta zobobɛ zii ɠiligi zɔiti zooi wu, naati pɔ bɛ, ti yeiɗai gɔvɛalaazu, 19 è ɠɛ ma: ‹È vizɔ ka bogai zɔiti ba ɓaa? Yei, ti è la tatipɛlɛʋolulala nuiti saama, ti zaani kɔɔi zu.› 20 Ezipete nuiti ta za ga boɠa zɔkpɔi kɔɔɠɔzuʋɛ. Boɠa zɔkpɔiti kɛʋele ɓɛtɛʋɛ niina ga ti paai wo. Ti li ga Ezipete ta su nuɓusɛiti pɛ saai ʋɔ! 21 Kɔɔɠɔ nu wolaiti ta zɔiti ti ɠɛni ɓɔsu ba, naati ta yɛ gɔvɛalaazu, ti ɠɛ ma: ‹Wɛlɛ lɛɛ tatipɛlɛʋolulala nuiti ba, ti zaai ga boɠa zɔkpɔi kɔɔɠɔzuʋɛ, tiya ɠa ti yeizu, ti la gi zaama gɔvɛalaazu!› 22 «Asiili ɠa ná, maaɠooliʋɛ ga ná-salaʋusuiti ta-ɠabaiti, ti pɛ ka ti zaani kɔɔɠɔzuʋɛ. 23 Ti ta-ɠabayeɠeiti bɔɔni zeɠei ɓogi wu, toɠa na maaɠooliai ga ná-salaʋusuiti. Ti pɛ ti ɠɛni ga zɛkɔɔzuiti, tɛiti mɔungi ti ɠɛni maalua vai ɠɛɛzu fulu nuiti ta-eteai zu. 24 «Elame ɠa ná, ná-kabai maaɠooliai ga ná-salaʋusuiti tɔnɔ ma ɠabaiti, ti pɛ ti zaani kɔɔi zu. Ti la ɠɛni latini pɛlɛʋolu, ti yei zooi wu, tɛiti ti ɠɛni maalua vai ɠɛɛzu fulu nuiti ta-eteai zu. Ta-ɓaaɠulamai yɛni ti ʋa ta naati pɛ, ti yeini gɔvɛiti pɔ pelei. 25 Ti Elame laani naati saama, niiti ti ti ʋaani. Ná-kabai maaɠoolini ga ná-salaʋusuiti ta-ɠabaiti, tatipɛlɛʋolulala nui naati pɛ ti zaani kɔɔi zu, tɛiti ti ɠɛni maalua vai ɠɛɛzu fulu nuiti ta-eteai zu. Ta-ɓaaɠulamai ɠɛni ti ʋa ta naati, niiti ti yeini zeɠei zu. Ti-laazuʋɛ ɠa gɔvɛiti saama, niiti ti zaani kɔɔɠɔzuʋɛ. 26 «Mesɛke ta Tuɓale ta ná, ta ta-ɠɔɔɓɔgiti, ti ta-ɠabaiti maaɠoolii zu. Tatipɛlɛʋolulala nui niiti pɛ ti zaani kɔɔi zu, tɛiti ti ɠɛni maalua vai ɠɛɛzu fulu nuiti ta-eteai zu. 27 Ti la ɠɛni ti maaɠuluni wɔlɔwɔlɔ ɠɔɔɠuluɓaiti saama, niiti fulu nuiti ti ɠɛni luazu ti ʋa eteai zu, ti ɠɛni yeizu gɔvɛalaazu ga ta-ɠɔɔɠɔ zɔɔlaiti pɛ, ti boɠa zɔkpɔi la nɔungi wu, ti kɔɔɠɔ zɛpɛgi ʋɛɛ ma. 28 Ɗa ʋe, Falaɠɔn, ɗa ɠana è zuɠaleɠaleai tatipɛlɛʋolulala nuiti saama. Ungo, ɗa ɠana wo laani, wa niiti ti zaani kɔɔɠɔzuʋɛ. 29 «Edɔme nuiti ta ná, ta ta-masagiti, ta ta-ɠundiɠiiti pɛ. Anɛɛ ta-zulogi pɛ, ti ti zoni ga zɛkɔɔzui zɔiti kɛʋele. Ti ti laani zooi wu ta tatipɛlɛʋolulala nuiti pɛ ti yeini zeɠei zu. 30 «Kundiɠiiti kpein ti lɛkpɛmaʋɛ nu ɠɔʋɛzuʋɛ, naati pɛ ta ná, ta Sidɔn nuiti pɛ, ti yeini, ti la gɔvɛiti ma. Ta-yeeɠaaɓaai dualuagi lɔɔni nuiti pɛ su, kɛlɛ niizu, tatipɛlɛʋolulala nui tɛiti ti laa ada ɠila ta gɔvɛiti, ɓaaɠula ti ma ga unfegi, ta zɔiti ti ɠɛni ga zɛkɔɔzuiti. Ta-ɓaaɠulamai ɠɛni ti ʋa ta naati, niiti ti yeini gɔvɛiti pɔ pelei. 31 «Falaɠɔn a naama ɠɔɔɠuluɓaiti pɛ kaana, zii lago ɠa la, tɔɔzei naama nu ɓulugi vaa ʋa, ta ná-salaʋusuiti ti zaani ga boɠa zɔkpɔi, ta tɔ ɓɔɠɔi é zaani kɔɔɠɔzuʋɛ,» Maliɠii Ɠɔoɠɔ GALAGI wooi ɠana. 32 «Mazɔlɔɔ gè Falaɠɔn yɛni ná, é ɠɛ ga fulu nuiti maalua ani eteai zu, kɛlɛ tɔ ɓɔɠɔi maa ɠa ɠulu tatipɛlɛʋolulala nuiti saama, ta niiti ti ɠɛni ga zɛkɔɔzuiti, ná-nuɓusɛ mɔinmɔingiti,» Maliɠii Ɠɔoɠɔ GALAGI wooi ɠana.