Genesis 11 (TOMA)

1 Eteai pɛ ge ɠɛni zii woo ɠilagi wosu, ti ɠɛni ɓɔɛzu ga woo ɠilagi. 2 Ti zeɠeni ga folo ɠulazu ʋelei, ti nɛmɛ wola ɠila kaani Sineyaal yooi zu, miná ɠa ti zeini ná. 3 Ti ɠɛni ɓɔɠɔ ma: «Ade li, ade ɓilikiiti doɠa, ade ti ɠala abui zu.» Ɓilikii ɠɛni ti ʋɛ ga pɛlɛ lo kɔtui, ti ɗa sei ga managi. 4 Ti ɠɛni ɓɔɠɔ ma mɔnɔ: «Ade li, de taai ta lo ɓɔɠɔ ʋɛ, ta pɛlɛ ɠaaɠoozagi nii nɔungi a zei geei ʋa. Ade ɓɔɠɔ lɔɠɔɠula, naa ɠa a kɛ ade mina vaza zooi ɠa ná pɛ.» 5 Ɠɔoɠɔ GALAGI yeini taai ʋɛtɛsu ta pɛlɛ ɠaaɠoozagi, nii nuiti ti ɠɛni tosu. 6 Ɠɔoɠɔ GALAGI ɠɛni ma: «Wɛlɛ, ta ga zii ɠilagi nɔ, woo ɠilagi nɔ ɠa é ti-la. Ni ta tɔɔzeina ɠani, ani nɔpɛ ge la mɔ pele ɓesaga ti luɠɔ naa ɠɛɛ vai zu, nii a ɠɛ ti ɠisu. 7 Ade yei, de li, de ti-laawooi zupu, naa ɠa a kɛ, ti mina ɓɔɠɔ laawooiti mɛni.» 8 Ɠɔoɠɔ GALAGI ti zuvazani, ti maaɠooza ná ʋa, ti li eteai zu ná pɛ. Ti looɠoni taai lo fai ʋa. 9 Naa ɠa é kɛai taai naa laasei pɛai ga Ɓaɓɛle, mazɔlɔɔ miná ɠa Ɠɔoɠɔ GALAGI eteai kpein gooi zupuai ná. Ná ɠa Ɠɔoɠɔ GALAGI ti zuvazani ná, ti li eteai zu ná kpein. 10 Sɛme mavofodai ɠaa: Ziɛve golai leʋegai ma, é ɠɛ ga kona felegɔ, Sɛme ná-konagi ɠɛni ga ungila (100), é Aalapakasade zɔlɔɔni. 11 Aalapakasade zɔlɔɔga ʋoluma, Sɛme kona undɔɔlugɔ (500) ɠili kɛɛni. É doun zunui ta doun anzanui taɠiligaa zɔlɔɔni. 12 Aalapakasade ná-konagi ɠɛai ma ga puusaʋagɔ maazu lɔɔlugɔ (35), é Sela zɔlɔɔni. 13 Sela zɔlɔɔga ʋoluma, Aalapakasade kona unnaanigɔ kona saʋagɔ (403) ɠili kɛɛni. É doun zunui ta doun anzanui taɠiligaa zɔlɔɔni. 14 Sela ná-konagi ɠɛai ma ga puusaʋagɔ (30), é Eɓɛɛl zɔlɔɔni. 15 Eɓɛɛl zɔlɔɔga ʋoluma, Sela kona unnaanigɔ kona saʋagɔ (403) ɠili kɛɛni. É doun zunui ta doun anzanui taɠiligaa zɔlɔɔni. 16 Eɓɛɛl ná-konagi ɠɛai ma ga puusaʋagɔ maazu naanigɔ (34), é Pelɛge zɔlɔɔni. 17 Pelɛge zɔlɔɔga ʋoluma, Eɓɛɛl kona unnaanigɔ puusaʋagɔ (430) ɠili kɛɛni. É doun zunui ta doun anzanui taɠiligaa zɔlɔɔni. 18 Pelɛge ná-konagi ɠɛai ma ga puusaʋagɔ (30), é Leyu zɔlɔɔni. 19 Leyu zɔlɔɔga ʋoluma, Pelɛge kona unfelegɔ kona taaʋuugɔ (209) ɠili kɛɛni. É doun zunui ta doun anzanui taɠiligaa zɔlɔɔni. 20 Leyu ná-konagi ɠɛai ma ga puusaʋagɔ maazu felegɔ (32), é Seluge zɔlɔɔni. 21 Seluge zɔlɔɔga ʋoluma, Leyu kona unfelegɔ kona dɔfela (207) ɠili kɛɛni. É doun zunui ta doun anzanui taɠiligaa zɔlɔɔni. 22 Seluge ná-konagi ɠɛai ma ga puusaʋagɔ (30), é Naɠɔɔl zɔlɔɔni. 23 Naɠɔɔl zɔlɔɔga ʋoluma, Seluge kona unfelegɔ (200) ɠili kɛɛni. É doun zunui ta doun anzanui taɠiligaa zɔlɔɔni. 24 Naɠɔɔl ná-konagi ɠɛai ma ga puufelegɔ maazu taaʋuugɔ (29), é Tela zɔlɔɔni. 25 Tela zɔlɔɔga ʋoluma, Naɠɔɔl kona ungila puugɔ maazu taaʋuugɔ (119) ɠili kɛɛni. É doun zunui ta doun anzanui taɠiligaa zɔlɔɔni. 26 Tela ná-konagi ɠɛai ma ga puulɔfela (70), é Abalameni sɔlɔɔni ta Naɠɔɔl ta Ɠalan. 27 Tela mavofodai ɠaa: Tela Abalameni sɔlɔɔni ta Naɠɔɔl, ta Ɠalan. Ɠalan Lote zɔlɔɔni. 28 Ɠalan zaani kɛɛɠɛ Tela luɠɔ, sɔlɔɔ zooi zu, ʋɛ ná ga Uul, Ɓaɓilɔne yooi zu. 29 Abalame ta Naɠɔɔl ti anzaiti seini. Abalame anzai laaseigi ɠɛni ga Salayi. Naɠɔɔl anzai laaseigi ɠɛ ga Milika. Milika ta Yisekani ti-ɠɛɛ ɠɛni ga Ɠalan. 30 Salayi maaloni, doun la ɠɛni bɛ ɲɛgɛlɛin. 31 Tela ná-doun zunui Abalame zeɠeni, ta ná-dounloin Lote, Ɠalan ná-doun zunui, ta ná-doun anzai Salayi, Abalame anzai. Ti ɠulani ʋɔɔma Uul ʋa Ɓaɓilɔne yooi zu, ti li Kanaan yooi zu ʋele. Ti zeelini Ɠalan, ti zei ná. 32 Tela zii ma voloi kpein ge ɠɛni ga kona unfelegɔ kona dɔɔlugɔ (205), naa ʋolu Tela zaani Ɠalan.

Genesis 11 (TOMA)

In Other Versions