Genesis 14 (TOMA)

1 Naama ziɛgi zu, Sineyaal masagi Amalafɛle, ta Elazaal masagi Aliyɔke, ta Elame masagi Kedɔɔl-Lawomɛɛl, ta Gɔyime masagi Tideyale, 2 yeeta naati ti kɔɔi ʋɛɛni Sɔdɔme masagi Ɓela ʋa ta Gomɔɔl masagi Ɓiilisa, ta Adema masagi Sineyaɓe, ta Seɓoyime masagi Semeyebɛɛl, ta Ɓela masagi (taai naa laa ɠa ga ɓalaa Sowaal). 3 Naati kpein ti ɠaalɛɛni ba Sidime nɛmɛ wolai zu, nii maaɓɔlegai za ga Kpoloɗɛ Wanai. 4 Kona puugɔ maazu felegɔ (12) laawu, ti ɠoloa ɠɛni de Kedɔɔl-Lawomɛɛl ʋɛ, kɛlɛ kona puugɔ maazu zaʋasiɛi (13) ma, ti ɓakani. 5 Kona puugɔ maazu naanisiɛi (14) ma, Kedɔɔl-Lawomɛɛl ta masagiti ti ɠɛni polu, ti ʋaani, ti zobo sɔlɔɔ Lefa mavofodaiti ma Asatelɔte-Kaalenayime, ta Zuze mavofodaiti ti Ɠame, ta Eme mavofodaiti ti Savé-Kiliyatayime, 6 ta Woli nuiti ti ta-ɠizeiti su Seyiil, eyɛsu é zeeli Palan sɛne guluiti pɔ bɛ, nii é teʋebai ɠobaʋɛ. 7 Naa ʋolu, ti ɠaleni ma, ti li En-Misepate, nii é ga Kadɛse, ti zobo sɔlɔɔni Amalɛke nuiti ma, ta-yooi ná pɛ su, é ʋɛɛ Amool nuiti ba, ti ɠɛni zeini Ɠasason-Tamaal. 8 Názuʋɛ ɠa Sɔdɔme masagi, ta Gomɔɔl masagi, ta Adema masagi, ta Seɓoyime masagi, ta Ɓela masagi nii é ga Sowaal, naati ti kɔɔi ɠɛʋele ɓɛtɛni la ti laalɔɠɔma Sidime nɛmɛ wolai zu. 9 Elame masagi Kedɔɔl-Lawomɛɛl, ta Gɔyime masagi Tideyale, ta Sineyaal masagi Amalafɛle, ta Elazaal masagi Aliyɔke, ti ɠɛni ga masa naanigɔ, dɔɔlugɔi laalɔɠɔma. 10 Mana zeɠei wola mɔinni Sidime nɛmɛi zu, Sɔdɔme masagi ta Gomɔɔl ʋele geleiti ti ɠɛni ʋelazu, ti ɗa li, ti ɗa loo zeɠei naati su. Mɔtaiti ti ʋelani, ti li gizei ma. 11 Niiti ti zobogi zɔlɔɔni, naati ka ti Sɔdɔme ta Gomɔɔl naavoloiti kpein seɠeni, ta daamiani makɛgaiti, naa ʋolu ti li. 12 Ti Abalame deɠe loin Lote ta kɔligiti soni, ti li ga tiye, mazɔlɔɔ Lote ɠɛni zeini Sɔdɔme. 13 Pela nu ɠila ge ʋaani, é daazeeli Eɓulu nui Abalame ma, nii é ɠɛni zeini Amool nui Mamelé ná-sɛne guluiti saama. Mamelé ɠɛni ga Esekɔleni ta Anɛɛl ti-ɠɛɛloin, niiti ti minazeɠeni Abalame ʋɛ. 14 Abalame mɛnigai ma ga deɠe loin zogɛ, é ná-botiɠɛ nu unsaʋagɔ nu puugɔ maazu lɔsaʋa (318) maaɠilini, niiti ti zuzeeliai kɔɔɠɔ vai ma, ti zɔlɔɔgai ná-pɛlɛi wu, naati ti ʋilɛni masagiti polu, eyɛsu ti zeeli Dan. 15 É ná-botiɠɛ nuiti balini su, é sili nuiti so kpidii. É zobo sɔlɔɔni ti ma, é yɛ ti ʋolu, ti zeeli Woɓa, nii é Damase ɠɔʋɛzu ʋelei. 16 É ɠaleni ma ga kɔɔzoganiiti kpein. É ɠaleni ma ɓalaa ga deɠe loin Lote, ta zeaɠɔligiti, ta anzanuiti ɓalaa, ta kɔɔ luɔiti. 17 Naa ʋoluma, Abalame ɠaleni ma, é zobogi zɔlɔɔgai ma Kedɔɔl-Lawomɛɛl ma, ta masagiti ti ɠɛni polu. Sɔdɔme masagi ɠulani, é daaɠomi Savé nɛmɛi zu, nii é ga Masa Nɛmɛi. 18 Mɛlekizedɛke, Salɛme masagi ʋaani ga ɓului ta dɔɔi. É ɠɛni ga GALA nii é Anii-Pɛ-Unda, naa ná-zalaɠa ɠula nui. 19 É tuya looni Abalame ʋɛ, é ɠɛ ma: «GALA ge tuya loo Abalame ʋɛ, GALAGI nii é Anii-Pɛ-Unda, é geeɠɔlɔgi ta zooi ɓɛtɛai! 20 Mamagi ɠa GALA bɛ, nii é Anii-Pɛ-Unda, nii é vaa bu, è zobogi zɔlɔɔ è zili nuiti ma!» Abalame kɔɔzoganiiti pɛ ma ʋuusiɛi veeni zea. 21 Sɔdɔme masagi ɠɛni Abalame ma: «Nuiti fe zèa, è naavoloiti ta sɔɔlaiti seɠe ʋɛ.» 22 Abalame ɠɛni Sɔdɔme masagi ma: «Gè ɠonaa Ɠɔoɠɔ GALAGI ma, nii é Anii-Pɛ-Unda, é geeɠɔlɔgi ta zooi ɓɛtɛai, 23 nii dɔin é ga ɗɔnɔi, gè la ani nɔpɛ seɠea naa ʋa, anɛɛ geze ɠaali ɠilagi ɓaa saʋala galu ɠilagi, naa ɠa a kɛ è mina ɠɛ ma: ‹Gè Abalame ɠɛɛʋɛ ga kpɛtɛ nu.› 24 Gè la ani nɔpɛ makɛsu nà ɓɔɠɔi bɛ̀, kɛni niigi zunu loungoiti ti miai, ta zunui naati tɔnɔi, niiti gi ɠɛa siɛi zu, Anɛɛl ta Esekɔle ta Mamelé, naati ta tɔnɔ zeɠe.»

Genesis 14 (TOMA)

In Other Versions