Isaiah 10 (TOMA)
1 Nimizai ɠa naama lɔ sei nuiti bɛ, ti telebotala lɔgi zeizu,ta niiti ti deveiti feezu, niiti kpɔlɔi zɔlɔɔsu ti zu, 2 ti pele leʋe bala nuiti tuɠɔ,ti mina losu zɔlɔɔ tukpɔɠaaleʋezuʋɛ,maanɔɠɔ nuiti ti nà-nuɓusɛiti saama,ti ta-ɠaamai ɠula ti ya.Ti poanzaiti kɛ ga laamianigi,ti loo podointi ma. 3 Leeni ɠa wa kɛ, potokula voloi a zeelina,siɛgi zu wo ɠoloɠolo zeelizu la, é zeɠe ɠoozama?Wa ɓizɛ, wo li ɓɛ ʋɔ bɛ, é ʋa ɓɔ wo ʋa?Wa wa-naavolo wolaiti dɔɔɠu mini? 4 Faa ɠili ge la ná wa kɛ,kɛni wo ɓili kasɔi wu wa kasoɠa nuiti,wo loo wa naati ti zaai.Kɛlɛ naa la Maliɠii ná-ziiɠaawanai ɓega pɛ,zeei wuzeɠeai ɠa yɛ de nɔ ɠɔ. 5 «Nimizai ɠa Asiili yooi ʋɛ, nà-ziiɠaawana ɓakɔi!Tɔ ɠa é ga tukpɔi é zèa, nii nà ɗa nà-ziiɠaawanai lɛɛ la. 6 Nà teʋesu zii laalɔɠɔma nii é la GALA kwɛɛ,gè lii la nuɓusɛiti daalɔɠɔma ti zìiɠaawanazu,ga é lɔ faa zuɠoloɠologi zu, é kɔɔzoganiiti so,é ɠɔɠɔlo ti zu, eɠɛ palaʋalai é koi yɔɠɔzuʋɛti. 7 Kɛlɛ zetaale Asiili yooi ʋa ɠɛ ɠisiɛzu la,toɠa ɠisiɛzu nɔ ga é suɠoloɠolo,é ziiti ma mɔinmɔin suwuɠaaleʋe. 8 Mazɔlɔɔ nii ɠa é bosu:‹Nà-salaʋusu ɠundiɠiiti ti la ga masagaa ɓaa? 9 É la ɠɛni ɠɛɛni ɠana, ɓaaKalano taai ʋa nɔnɔ zɔlɔɔ Kaalekemise ná-fai zu?Ɠamate ɓalaa nɔnɔ zɔlɔɔ Aalapade ná-fai zu,Samali ɓalaa nɔnɔ zɔlɔɔ Damase ná-fai zu. 10 Ni gè zooni gè yeeʋɛɛ zooiti ma,ta-ɠalagiti ti mɔinni é leʋe Zeluzalɛme geleiti ba ta Samali geleiti, 11 gè la Zeluzalɛme ta ná-kɔɔɠɔ ganigiti soga,eɠɛʋelei gè Samali ta ná-kɔɔɠɔ ganigiti soni da?› » 12 Siɛgi zu Maliɠii a ná-botii ɓena la Siyɔn gizei ma ta Zeluzalɛme, toɠa wuzeɠe niina Asiili masagi laalɔɠɔma, naa ziilaave fai zu ga wasogi ta gaazulɛɛi. 13 Mazɔlɔɔ é ɠɛni ma:«Nii kpein gè kɛɛni, nà-zobogi ɠa gè ti ɠɛɛni la,nà-ɠimalai zu, ta nà-keleɠelegi.Gè nuɓusɛiti ta-ɠwɛpelemaʋɛti daaʋilini,gè ta-naavoloiti kula ti ya,ta eɠɛ suɓaa nui, gè masagiti kulani ta-ɓɔkpɔgiti ga. 14 Eɠɛʋelei nu a ɗa yeelɔ la wɔni laɠagi zu,gè kɛɛni ɠana, gè nuɓusɛiti ta-naavoloiti zɛʋɛ.Ʋelei nu a ɗa wɔni ɠainti zɛʋɛ la, kɛlɛi wogai ti ʋa,gè ti pɛ zɛʋɛni eteai zu,nu nɔpɛ ge la ɠɛni ná, é ʋa ɠoʋegi ɲiikpi,ɓaa é ʋa lakulugi laalao, ɓaa é ʋa foe vɛ.» 15 Zoovɛi ɠa zoo nɛi é waso naama nui ma,nii é botii ɠɛɛzu la ɓaa?Sii ɠa zoo nɛi ɓaa, é gaazulɛ ɠula naama nui ya,nii é botii ɠɛɛzu la?Kɛɛʋɛ eɠɛ kpakɔi ɠa é zeɠe nui ɲiikpisu,kɛɛʋɛ eɠɛ tukpɔi a ɠɛ naa wuzeɠezu, nii é la ga gului! 16 Naa ɠa é ba, Ɠɔoɠɔ GALAGI, Fai-Pɛ-Maliɠii ɠa ta-zalaʋusuiti undaaʋili niiti ti ɓakpaai.Abui ɠa vaza ná-nu wolaiti saama, eɠɛ abuzogi. 17 Mazɔlɔɔ Izilayɛle ná-wozakalagi ɠa ɠɛɛzu eɠɛ abui,Izilayɛle ná-GALA Ɲadegai ɠɛ eɠɛ abuzogi,nii é ʋaazu Asiili ná-ɠain guluiti ta ná-kpolo ɠaingiti galazu ga folo ɠila nɔ. 18 Toɠa ná-dɔɓɔi ta ná-gulu ɓelei ná-pagi ɠoloɠolo mɛtu.Ma yiiɠilii ka ɠɛ de eɠɛ nu a ɠula seeɓɛ zu. 19 Gulu wolai a yɛ Asiili yooi ma lɔɓɔi zu maa ɠa ʋɛlɛ gola,eyɛsu doungo ɠa zoo é tiegɔi ɠaalu, é sɛʋɛ. 20 Naama volo ná, Izilayɛle nui mɔtaiti ta yɛ vulua ta Zakɔɓe ná-nuɓusɛi mɔtaiti, ti la mɔ ɠalivaa naa ma, nii é ɠɛni ti loɠazu. Kɛlɛ ta ʋoluzei ga ladalai pɛ Ɠɔoɠɔ GALAGI ʋa, Izilayɛle ná-GALA Ɲadegai. 21 Mɔta goi ɠa ɠale ma é ʋa, Zakɔɓe mavofodai mɔtai ɠa ʋa Zeeɠaaɓaa ƓALAGI ʋɔ. 22 Mazɔlɔɔ, ee, Izilayɛle, anɛɛ ni ɗa-nuɓusɛiti ta mɔinzu, eɠɛʋelei kpoloɗɛi ɠobaʋɛ ma ɲaɠaegi la, mɔta go nɔ ɠa é ɠalesu ma ʋolu, mazɔlɔɔ GALA ge ɗa-nuɓusɛiti suwuɠaaleʋe vai levea, toɠa ʋaazu ga telebodai eɠɛ ziɛve gola. 23 Mazɔlɔɔ naama zuwuɠaaleʋe vai deveai ná, Ɠɔoɠɔ GALAGI, Fai-Pɛ-Maliɠii ɠa naa ba, é ɗa kɛ zooi zu. 24 Naa ɠa é ba, Ɠɔoɠɔ GALAGI, Fai-Pɛ-Maliɠii wooi ɠaa: «Ee, nà-nuɓusɛiti, wɔi wo zeini Siyɔn, à mina lua Siili nuiti ba! Ta wo loɠazu ga kpakɔi, ti ɗa ta-lukpɔi wuzeɠe wo maazu, ʋelei Ezipete nuiti ti ɠɛni kɛɛzu la. 25 Kɛlɛ ná tago nɔ ʋe na, nà-ziimaleʋei zeɠe ga è laalɔɠɔma, kɛlɛ tɔun nà-ziiɠaawanai ɠa ɠaaʋote ti ma, nii a kɛ gè ti ɠoloɠolo. 26 Ɠɔoɠɔ GALAGI, Fai-Pɛ-Maliɠii ɠa ná-kpakɔi lɛɛzu ga, ga é Asiili loɠa la, eɠɛʋelei é kɛɛni la Madiyan nuiti daalɔɠɔma Wolɛɓe vasai ʋɔ bɛ. Toɠa ná-kpakɔi wuzeɠe kpoloɗɛi maazu, eɠɛʋelei é kɛɛni la Ezipete yooi laalɔɠɔma. 27 Naama volo ná, ná-kasɔi ɠa zeɠe è unma,ná-unbawului ɠula è ɠɔba.Unbawului naa ɠa ɠaleɠale,seizu ve dituɠɔma vaiti bɛ.» 28 Tiya ɠana ti ʋaazu Ayate laalɔɠɔma,ti leʋe Migilon,ti ta-ɠasɔiti zɛ Mikemase. 29 Ti leʋe pɛtugi zu, ti ɠɛ ma:«Ade ʋu Geɓa!»Nuiti ta luazu, ti ɗa ɓali Lama.Nuiti ti ɗa ʋela Sayile ná-taazuʋɛ, Giɓea. 30 Galime nuiti, à ɠaazuɗɛi ʋu.Dama, Layise!Maanɔɠɔi ɠa è luɠɔ, Anatɔte! 31 Mademena ɠa ʋelazu,Geɓime nuiti ta lɔɔɠuzu ɠaiziɛzu. 32 Za nɔ nu ɲɔi lopele ɓɛtɛa Nɔɓe,é yeeɓuunga, é ʋa Siyɔn maalua, Zeluzalɛme ɠizei. 33 Wɛlɛ, Ɠɔoɠɔ GALAGI, Fai-Pɛ-Maliɠiiɠa gulu ɓeke pagɔiti teʋezu ba ga ziiɠulagi.Gulu wola ɠaaɠoozagiti ti leʋeni ga,niiti ti wola ɠaaɠoozani, ti looni zooi ma. 34 Toɠa dɔɓɔ wolaiti toozu bu ga zoovɛi,Liɓan ɠa ɲɛɛlɛzu Zobobɛ Nui luɠɔ.