Isaiah 19 (TOMA)
1 Keela wooi é wosu é lo Ezipete ʋa.Wɛlɛ Ɠɔoɠɔ GALAGI ʋa, é tonaɓiingi zu,é ʋaazu ga gaazuvilɛi Ezipete yooi zu.Ezipete ná-zɛɛ ɠalagiti ti ɠɛa unga wuulee tuɠɔ,Ezipete nuiti iɲɔ ge leʋea. 2 Ɠɔoɠɔ GALAGI ɠɛ ma:«Nà Ezipete nuiti daaʋilisu ɓɔɠɔ ma, ti ɠilagilagi pɛ,eyɛsu ti laalɛ ɓɔɠɔ wu,nuiti ti wuzeɠe ɓɔɠɔ laalɔɠɔma,taa wolaiti ti wuzeɠe ɓɔɠɔ laalɔɠɔma,masadaiti ti wuzeɠe ɓɔɠɔ laalɔɠɔma. 3 Ezipete nuiti tɔungi ɠa zeɠe ma,nà ti-yeavaiti supu.Naazu ta li, ti ɗa ta-zoɠoiti gaazaɠa,ta ta-yɛɛ ɠalagiti, ta gɔvɛ laawooleʋe nuiti,ta niiti gɔvɛiti ti ʋelela ʋele vaiti bosu ti ma. 4 Nà Ezipete yooi lɔ kundiɠi yeezu, nii ná-fai ɓaai,masa ɲɔi ɠa zei ti unda,»Maliɠii wooi ɠana, Ɠɔoɠɔ GALAGI, Fai-Pɛ-Maliɠii. 5 «Kpoloɗɛi ɠa vɔ su,ziɛ wolai ɠa vɔ, fufiligi ɠula daazuʋɛ. 6 Ziɛ yei ʋeleiti ti ti laai, ti-ɠugi ɠa ɠula.Ziɛ wolai Nile ma ɓekegiti maa ɠa ʋɛlɛ, ti ɗa vɔ.Seeligiti ta tɛmuiti ta ʋoolo. 7 Tufai pɛ é ziɛ wolai Nile ɠɔmaʋɛ ta toolaʋɛ,ta tii ɠɛɛ lɔɓɔi pɛ ziɛ wolai Nile kɔɔzu, ta vɔ,fiilɛi ti yɛʋɛ, ani nɔpɛ ge la yɛga ná. 8 Ziɛ ɓɛɛ nuiti ta ɠɛ ɓalasu, ti ɗa ɠɛ su vɔlɔvɔlɔ,ta niiti pɛ ti ɠɛni kalagi ʋilisu ziɛ wolai Nile wu,ta niiti ti ɠɛni tumɔi ʋilisu ziɛi ɠa,ti maa ɠa wɔin gola. 9 Niiti ti botii ɠɛɛzu ga gezei,niiti ti geze ɠitei vɛlɛzu, ti pɛ ta unfe. 10 Zooi zu zeɠe vɛlɛ nuiti pɛ ta ʋala zɛbɛi ma,sala zeɠe wotiɠɛ nuiti pɛ iɲɔ ka leʋe.» 11 Taa wolai Soan ma ɠundiɠiiti ti ɠɛa ga ɠimalala nuiti,Falaɠɔn ná-ɠima nuiti ti ɠɛni tɛnɛsu,ti ɠɛa ga ɠimalala nuiti.Wa zoo ɠale ɠɛɛzu Falaɠɔn ma:«Nà ga ɠima nu,gè ɠɛ ga masa pɔlɔiti ta-ɠaladopoi gila»? 12 Falaɠɔn, ɗa-ɠima nuiti ta mini?Ti ɠi fee lɛɛ è ʋɛ deɠɛmu, ti naa lɛ ga ɗe,nii Ɠɔoɠɔ GALAGI, Fai-Pɛ-Maliɠii deveai Ezipete laalɔɠɔma. 13 Soan ɠundiɠiiti titigɛ,Mɛmefise ɠundiɠiiti ta kibalamayai zu.Zou ɠundiɠii naati ka ti Ezipete yooi ɠakasu. 14 Ɠɔoɠɔ GALAGI gaazulati zɛnvui yeiʋɛ ti ma,ti Ezipete nuiti kaka ti-ɠɛɛ vaiti pɛ su,eɠɛ dɔɔzo nui é ɓɔɠɔ ɠakasu ná-unpiligi zu. 15 É zo maazu é yei bu,nu nɔpɛ ge la mɔ faa ɠɛa Ezipete ma vaa ma,anɛɛ dɔɔ laagi ɓaa seeli kpaɠai. 16 Naama volo ná, Ezipete nuiti ta ɠɛ eɠɛ anzanui zɛbɛ la ba, ti zasu ɠa ɓali, ti lua, siɛgi zu Ɠɔoɠɔ GALAGI, Fai-Pɛ-Maliɠii yeei wuzeɠezu la ti laalɔɠɔma. 17 Zuda yooi ɠa ɠɛ Ezipete yooi ʋɛ ga maalua anii. Zuda laaseigi a wona feya gaazu, kɛni é lua, tɔɔzei devei ʋa Ɠɔoɠɔ GALAGI, Fai-Pɛ-Maliɠii bogai daalɔɠɔma. 18 Naama volo ná, taa wola lɔɔlugɔ ɠa ɠɛ Ezipete yooi zu, ʋɛ nuiti ta ɠɛ ɓɔɛzu ná ga Eɓulu wooi, ti ɗa minazeɠe ná ga ta ga Ɠɔoɠɔ GALAGI, Fai-Pɛ-Maliɠii nɔnɔiti. Ma taa gila daasei ka ɠɛ ga: «Foloi Ná-Taai». 19 Naama volo ná, zalaɠa ɠulazuʋɛ ɠa lo Ɠɔoɠɔ GALAGI ʋɛ Ezipete yooi zaamaʋɛ, kizɛsu ɠɔtui lo bɛ Ezipete yooi ma ɠwɛpelemaʋɛ. 20 Ta ɠɛ ga poogi ta zeeleiti Ɠɔoɠɔ GALAGI, Fai-Pɛ-Maliɠii ʋɛ Ezipete yooi zu. Siɛgi zu Ezipete nuiti ta wooɠulana la Ɠɔoɠɔ GALAGI ma ga é ti unmɔɔ, ti ɠula ti zili nuiti zea, toɠa kizo nui leʋe ti ma, nii a ti maalobo, é ti unmɔɔ. 21 Ɠɔoɠɔ GALAGI ɠa ɠula kɛlɛma Ezipete nuiti bɛ. Ezipete nuiti ta Ɠɔoɠɔ GALAGI ɠwɛɛ naama volo ná. Ta dɛbi ga zalaɠaiti naa ʋɛɛ vebɛaniiti ba, ti ɗa minazeɠegiti bo bɛ, ti ɗa ti laazeeli. 22 Ɠɔoɠɔ GALAGI ɠa Ezipete nuiti doɠa, é ti ʋalo, tiya ɓɔɠɔi ta ɠale ma Ɠɔoɠɔ GALAGI ʋɔ. Toɠa ti wooɠaaʋote, é ti ʋalo. 23 Naama volo ná, pelei ɠa ɠɛ Ezipete yooi zu, é li Asiili yooi zu. Asiili nuiti ti ɗa li Ezipete, ta Ezipete nuiti ti ɗa li Asiili yooi zu. Ezipete nuiti ta Asiili nuiti ta ɗa nɔkɔ Ɠɔoɠɔ GALAGI ʋɛ ʋɔɔma. 24 Naama volo ná, Izilayɛle ɠa ɠɛ ga zooi zaʋasiɛi, ta Ezipete yooi, ta Asiili yooi, ta ɠɛ eteai pɛ bɛ ga tuya yooi. 25 Ɠɔoɠɔ GALAGI, Fai-Pɛ-Maliɠii ɠa tuya loo eteai pɛ bɛ ɠani: «Nà tuya loozu nà-nuɓusɛiti bɛ, Ezipete nuiti, ta Asiili yooi, gè kpɛtɛai ga zèeiti, ta Izilayɛle yooi, é ga kpɔ̀ɠɔ gelei!»