Isaiah 43 (TOMA)

1 Niizu è Ɓɛtɛ Nui, ɗɛi è ga Izilayɛle,zɔi é wo ɓɛtɛa, wɔi wo ga Zakɔɓe ná-nuɓusɛiti,Ɠɔoɠɔ GALAGI wooi ɠaa:«Maaɠili mina ɠɛ è ma, mazɔlɔɔ gè è unmɔɔni,gè è lolini ga è-laaseigi, ɗa ga nɔ̀nɔ! 2 Siɛgi zu è ziɛiti maazuɓudɛzu la,nà ɠɛ è ʋa,siɛgi zu è ziɛ wolaiti maazuɓudɛzu la,ti la è maaɓɔlega.Siɛgi zu è ziɛzu la abui zu,è la ɓɔɠɔ ɠalaa,abuzogi la è ɠalaa. 3 Mazɔlɔɔ nà ga Ɠɔoɠɔ GALAGI, ɗa-ƓALAGI,Izilayɛle ná-GALA Ɲadegai, nà ga è Ɠizo Nui.Nà Ezipete yooi ve ga è unmɔɔ ganii,gè Etiyopi ta Seɓa yooiti fe ga è-ʋotogi. 4 Tɔɔzei è-zɔngɔi wɔɔlɔʋɛ gàazu,tɔɔzei unfe ka è ma, ta gè è nɛa ʋɛ,nà nuiti fe è-ʋotogi zu,gè nuɓusɛiti fe è-yɛnvui vai zu. 5 Maaɠili mina ɠɛ è ma,mazɔlɔɔ nà è ʋa.Nà ʋa ga è-mavofodai, é zeɠe folo ɠulazu ʋelei,gè ɗɔnɔiti gaalɛ ba, ti zeɠe folo liizu ʋelei. 6 Nà ɠɛ lɛkpɛmaʋɛ ma nu ɠɔʋɛzuʋɛ: ‹Ti ve,›ta lɛkpɛmaʋɛ nu yeezazuʋɛ: ‹Mina makɛ ti ʋa!›Ʋa ʋolu ga dòun zunuiti ti miná,ta dòun anzanuiti ti zou ɓela ga, 7 nii kpein dàaseigi ʋɛai ba,gè kpɛtɛni nà-lɛbiyai vaa ma,gè kazaʋi, gè kpɛtɛ.» 8 Nuɓusɛi nii ti ɠula kɛlɛma,gaazuʋɛ ti ʋɛ, kɛlɛ ti la wozaɠaazu,goi ti ʋa, kɛlɛ ti la faa mɛnisu. 9 Zii ɠiligiti pɛ ti ɠaalɛ ba,nuɓusɛiti ti maaɓɔ.Ti zaama, ɓɛ ɠa é niima vaiti boni?Faiti ti leʋegai, ɓɛ ɠa é naati boni?Ti ta-zeeleiti dɛɛ, naati ti woozuɠula,ti woilo ti-wooi ma, ti ʋa ɠɛ ma: «Gaamai ʋe!» 10 «Nà-zeeleiti ta ga woye, nà-nuɓusɛiti,wa ga nà-botiɠɛ nui, gè yiimazeɠeai la.Kìsu vai gè wɔinni, wo kwɛɛ,wo ɠidaaleʋe mà, wo gaaɠa,ga nà ɠila kpe ka gè ga GALAGI.Gala kili ge la ɓɛtɛni nɔ̀un tuɠɔ,nɔ̀un poluma, taɠili ge la ɠɛa ná pɛ,»Ɠɔoɠɔ GALAGI wooi ɠana. 11 «Nà ya, nà ɠa gè ga Ɠɔoɠɔ GALAGI,é ɠula nɔ̀un polu, kizo nu ɠili ge la ná ɲɛgɛlɛin. 12 Nà ɠa pàai ga kizo vai,nà nɔ ɠa gè daazeelizu,gè dɛɛ, é ɠula kɛlɛma,gala kili taade, nii nu a la ka wo zaama.Wa ga zeeleiti ga nà ga GALA,»Ɠɔoɠɔ GALAGI wooi ɠana. 13 «Nà ɠana nɔ, kaite wɔlɔwɔlɔ,nu nɔpɛ ge la ná, a zoo é zèe laavie ani ma.Nii gè kɛɛzu, ɓɛ ɠa a wuzeɠe naa laalɔɠɔma?» 14 Ɠɔoɠɔ GALAGI wooi ɠaa,wo Unmɔɔ Nui, Izilayɛle ná-GALA Ɲadegai:«Wa-vaa ɠa gè nu ɠila teʋegai la Ɓaɓilɔne laalɔɠɔma.Ɓaɓilɔne nuiti ti ʋelazu,nà ti yeizu bu ɓatoiti su,ʋɛ ti ɠɛa koozunɛ ɓaingi wosu ná. 15 Nà ga Ɠɔoɠɔ GALAGI, wa-ƓALA Ɲadegai,Izilayɛle Ɓɛtɛ Nui, wa-Masagi.» 16 Ɠɔoɠɔ GALAGI wooi ɠaa,tɔungi é pelei laazu kpoloɗɛi zuʋɛ,é nu leʋesu ɓɛtɛ ziɛ wolaiti suʋɛ, 17 é kɔɔɠɔ wotoloiti ta sooiti pilɛsu siɛi laawu,ta kɔɔɓɔgiti ta salaʋusu ɠɛzɛiti,naati ta loona bu, ti la mɔ wuzeɠea ʋolu pɛ,ti za ba, ti ɠalaai eɠɛ lanbo zalaʋai: 18 «À mina mɔ ɠigaiziɛ faa wɔlɔmaiti su, ti leʋegai,à mina mɔ ɓala ga wɔlɔwɔlɔ vaiti, ti leʋegai. 19 Wɛlɛ, nà faa niinɛ ɠɛɛzu,toɠa na ʋa ɠulazu kɛlɛma,wo la kwɛɛ ɓaa?Nà pelei laazu teʋebai zu,gè ziɛ wolaiti da zou vɔɔi zu. 20 Dɔɓɔ zuaiti, koʋeiti, saa wɔnigiti,ti pɛ ta lɛbiyai ve bɛ̀,tɔɔzei nà ziɛi laaleʋezu teʋebai zugè ziɛ wolaiti da ada vɔɔiti.Mazɔlɔɔ nà pɔ gè kpɔɔle ɗɛ ve nà-nuɓusɛiti zea,gè yiimazeɠeni ga tiye. 21 Nà-nuɓusɛiti gè ti ɓɛtɛni nà ɓɔɠɔ ʋɛ,ta màamusɛ adaʋɛ pɛ.» 22 «Ee, Zakɔɓe, nà laade, è ʋa wooɠula mà.Mazɔlɔɔ wo ɓɔlɔa bà, Izilayɛle nuɓusɛiti. 23 Nà la ɠɛni de, è ʋa ɠɛni baala ziʋo zalaɠaiti kulazu bɛ̀ ga gala zalaɠai,ɗa-zalaɠaiti ti la ɠɛni lɛbiya veezu bɛ̀.Gè la ɠɛni è ɠɛɛni ga duɔ,gè ʋa ɠɛ ma kɛni è vebɛania ve bɛ̀,gè la ɠɛni è ɓɔlɔni ga kɛni è ansanse fe bɛ̀. 24 È la ɠɛni wali ɠulani ɓɔɠɔ ma nà-faa zu,è ʋa seeli kpaɠa maku nɛɛnɛ geya,è la ɠɛni dàawuuni ga zalaɠa zuaiti ma wulɔiti.Kɛlɛ è kɛ̀ɛni ga ɗa-luɔi ɗa-ɠotoiti faa zu,è kpɔ̀lɔni ga ɗa-vaaɠaaza golaiti. 25 «Kɛlɛ nà ya, nà ɠila kpe ka gè ɗa-lɔ koloɠologiti gaaʋaazu nà ɓɔɠɔi màaʋele ma,gè la ɗa-ɠotoiti devea ga faa nɔpɛ. 26 Ɠigaiziɛ nà-faa zu, de felegɔ de yɔɠɔzuɠula.Faiti dɛɛ ɗa ɓɔɠɔi, è kula kɛlɛma ga gaamai ɠa è ya. 27 Mɔunpa, è-mɛmɛwola mɔungi kotoi ɠɛɛni dàalɔɠɔma,è-laavaawo nuiti ti wuzeɠe dàalɔɠɔma. 28 Naa ma ka é kɛɛni gè ɓaaɠulani seizu ɲadegai ma ɠundiɠiiti ma,gè yeeɓe Zakɔɓe ná-nuɓusɛiti ba, ti ti zuwuɠaaleʋe,gè ɠɛlɛ Izilayɛle ʋa, gè zɛ sili nuiti ta-ʋoomugi laawu.»

Isaiah 43 (TOMA)

In Other Versions