Isaiah 9 (TOMA)

1 Nuɓusɛi niiti ti ɠɛni ziɛzu kpidii zu,naati ti wozakala golai ʋɛtɛga.Niiti ti ta-eteai ziɛzu kpidi yooi zu,wozakalagi voloa naati ma. 2 Ɠɔoɠɔ GALAGI, è ta-ɠoozunɛɛi zuwɔɔlɔa,è koozunɛ wolai vazaga,ta ɠoozunɛɛzu è ɠaazu,eɠɛʋelei a ɗa ɠɛ la molo leʋe ziɛgi zu,ɓaa eɠɛʋelei koozunɛ wooi a ɗa ɠula la,ta ɠɛna kɔɔzoganii ɠaaɠwɛa. 3 Eɠɛʋelei è kɛɛni la názuʋɛ,siɛgi zu è Madiyan nuiti kpɛɛni la,unbawului é ɠɛni kulazu ga ɗa-nuɓusɛiti,kpakɔi é ɠɛni loɠazu la poluʋɛ,maanɔɠɔ nuiti ta-wulu ɓuɠai,ɗa è naati pɛ suɠaleɠaleni. 4 Mazɔlɔɔ kɔɔɠɔ zaʋalagi nii pɛ pogi ɠɛa yɛsu zooi ʋa,ta ma lookɔba wolaiti ɲamai ʋogi ti ʋa,naati pɛ ta ʋu abuzogi ɠa,ga ti ɠɛ ga abui ɠɔnɔgi. 5 Mazɔlɔɔ doun zɔlɔɔga ade ʋɛ,doun zunu veeʋɛ ade ʋɛ,toɠa masadai ɠɛ.Toɠa loli ga Tɛnɛbo Nui Gola Ʋagai,Zeeɠaaɓaa ƓALAGI, Ɠɔoɠɔ Kɛɛɠɛi, Ziilɛi Masagi. 6 Ná-masadai ɠoma ɠa wɔɔlɔ,é ziilɛigi zei, nii kpela ge la ba.Toɠa zei Davide ná-masa kpɔkpɔgi ɠa, é masadai ɠɛ.Toɠa naa zei, é makɛ ma ga sɔledai ta telebodai,é zo niizu ma eyɛsu ɠɔ.Wɛlɛ naa ɠa Ɠɔoɠɔ GALAGI, Fai-Pɛ-Maliɠii a kɛ ná-nɛɛbɛ wolai zu. 7 Maliɠii kpɔɛ woga Zakɔɓe mavofodaiti daalɔɠɔma,é loa Izilayɛle ma. 8 Nuɓusɛiti pɛ kwɛɛ faa ɠa ɠɛ su,Efelayime nuɓusɛiti ta Samali nuiti ti bosu ga wasogi ta ɲaɠai, ti ɠɛ ma: 9 «Ɓilikiiti ti loa,gá tosu ga kɔtu zaɠaai,sikɔmɔɔl guluiti ti leʋe ga,gá ti maavalibo ga sɛdele guluiti.» 10 Ɠɔoɠɔ GALAGI ɠa fɔnifaamai vea ti zili nui Lesin ya,é ti zili nuiti daaʋiliga ti ma. 11 Siili nuiti ti folo ɠulazu ʋeleita Filisiti nuiti ti folo liizu ʋelei,ta Izilayɛle zunuma ga ti-ɲiiga wolaiti.Kɛlɛ naa la Maliɠii ná-ziiɠaawanai ɓega pɛ,zeei wuzeɠeai ɠa yɛ de nɔ ɠɔ. 12 Nuɓusɛiti ti la ɠaleni ma,ti ʋa ʋa Ɠɔoɠɔ GALAGI ʋɔ, nii é ɠɛni ti loɠazu,ti la ɠaaʋoteni Ɠɔoɠɔ GALAGI, Fai-Pɛ-Maliɠii ma. 13 Naa ɠa é ba, folo ɠila nɔƓɔoɠɔ GALAGI ɠa ma ungi ta ma wɔɔngiti teʋe Izilayɛle ʋa,dɔɔi ɠaalaagi ta seeli kpaɠai. 14 Kɛwolai ta seizumaanɛgi, ma ungi ɠana,GALA goo wo nui é zɛɛ ɠalagi wosu, ma wɔɔngi ɠana. 15 Niima nuɓusɛiti ta-lotuɠɔiti ta ti ɠakasu,niiti ti ʋilɛsu totuɠɔiti polu, naati ti pele ɲɔi zeɠea. 16 Naa ɠa é ba, Maliɠii la yeezɛlɛga ta-nu niinɛiti maazu,é la ta-ʋodointi ta ta-ʋoanzaiti maawɔinɠaa,mazɔlɔɔ ti pɛ ta ga GALA gaazuluabalala nuiti, ti ɗa faa ɲɔi ɠɛ,ti pɛ ti ɗa ɠimalala vaiti kɛ.Kɛlɛ naa la Maliɠii ná-ziiɠaawanai ɓega pɛ,zeei wuzeɠeai ɠa yɛ de nɔ ɠɔ. 17 Mazɔlɔɔ suɲɔi ɠa ɗa galai wo eɠɛ abui,é kpolo ɠaingiti ta ɠaingiti galazu,toɠa ɗa so dɔɓɔi zu wulu ɓiiliiti ba.Ma luului ɗa lɛ geezuʋɛ eɠɛ tɔngɔlɔ fiilɛi. 18 Ɠɔoɠɔ GALAGI, Fai-Pɛ-Maliɠii ná-ziiɠaawanai zu,zooi ɠa ɗa ɠɛ abuzogi zu,eɠɛ nuɓusɛiti ti ga abui laamianigi.Tanɔpɛ ge la seiɲɔɠɔ maawɔinɠaazu. 19 Ti ɗa kpedagi wo yeezazuʋɛ, pului ti ma nɔ,ti ɗa ɓɔɠɔ mi ɠɔʋɛzuʋɛ, kɛlɛ ti la yiɠoa.Ɛsɛ ge ɗa zeei ma zuai mi. 20 Manasé ɗa vala Efelayime ʋa,Efelayime ɓalaa ɗa vala Manasé ʋa,ti felegɔ pɛ ti ɗa li, ti loo Zuda ma.Kɛlɛ naa la Maliɠii ná-ziiɠaawanai ɓega pɛ,zeei wuzeɠeai ɠa yɛ de nɔ ɠɔ.

Isaiah 9 (TOMA)

In Other Versions