Isaiah 9 (YAPE)
1 Dariy kanawo’en miyad thay ko re gafgow ni bay yib e ngiyal’nem.Nam ko ganong rok Zebulun nge Naftali e un darifannag, machane bayi bingyal’ ma bay ni tay fan e re nam ney, ni tabab ko day ni Mediterranean me yan ko ngek nga ba’ nem e Jordan nge mada’ nga Galile ko gin be par girdi’en boch e nam riy. 2 Girdi’en fare nam ni uranod u fithik’ e lumore ka ra guyed ba tamilang ni ba ga’ ram’en!Ur pired u lan ba nam u fithik’ e rumug ni yam’,machane chiney e ke gal e tamilang nga dakenrad. 3 Somol kam pi’ e felfelan’ ni ba ga’ ngorad;kam gagiyeg nagrad kar felfelan’gad.Yad be felfelan’ ko n’en ka mu ngongliy,ni bod e felfelan’ ni be tay e girdi’ ko ngiyal’ ni yad be kunuy e ggan ko woldug rorad,ara ngiyal’ ni yad be f’oth e chugum nra koled u tan e mael. 4 Ya ka mu t’ar fare mat’ ni ur gafgowgad u tanggin,nge fare ley i gul ni un tay nga daken porad.I gur e kamgel ngak fare namni i gafgownag ma be fek ban’en rok e tirom e girdi’,ni bod rogom ni mu gel ngak e salthaw nu Midian kakrom. 5 Sus rok e salthaw ni m’ag e mael ko namnge mad rorad nike mak’ racha’ e bay ni urfiy! 6 Ka ni gargeleg bochi tir ngodad!Ka ni pi’ bochi pagel ngodad!Me ir e bayi mang pilung rodad.Ma bay nog fithingan ni “Tafonow nrib Manigil,”nge “Got ni Gubin ma Rayag Rok,” nge “Chitamangiy ni Manemus,”nge “Pilung ko Gapas.” 7 Gelngin lungun nib pilung e bay i ga’ i yan;gin bay i gagiyeg riy e yugu bay i par u fithik’ e gapas.Bayi gagiyeg ni ir e ke yan nga luwan David ni Pilung,ma gagiyeg ni bay i tay e mmat’aw ma ba yal’uw,e chiney nge yan i mada’ ko tungun.I SOMOL ni Gubin ma Rayag Rok e ke turguy ni nge rin’ urngin e pin’ey. 8 I SOMOL ni yog rogon e gechig ni nge aw nga daken e nam nu Israel, ni aram e pi’in owchen Jakob. 9 Urngin e girdi’ nu Israel, ni gubin e pi’in ma par u Samaria, ni bay ra nanged nike rin’ ni aray rogon. Machane riyad ba tolngan’ ma yad ba ufanthin. Ra ga’argad, 10 “Naun ni rengga e ke puth nga but’, machane bay gu toyed bayay e pi naun nem ko malang. Ren ko sycamore e ka ni th’ab nga but’, machane bay gon’ed luwan ni tin th’abi fel’ e gek’iy ni cedar.” 11 I SOMOL e k’aring e to’ogor rorad ni nge cham ngorad. 12 Syria ko ngek me Filistia ko ngal e kar falew langrow ni ngar ful’ew yu Israel. Ni yugu aram rogon ma damumuw rok SOMOL e daworimus; kab k’iyeg pa’ ni nge gechig. 13 Girdi’ nu Israel e da rir pi’ed keru’rad ko kireb rorad; ni yug aram rogon ni be gechig nagrad SOMOL ni Gubin ma Rayag Rok, ma kadawor rpigichelgad ngar sulod ngak. 14 U lan ta’reb e rran e ra gechignag SOMOL e pi tayugang’ nu Israel nge girdi’ riy; ni bay i thab’ lolugrad nge p’ebuk’rad nge mul. 15 Pi’in pi’lal nge pi’in yima ta’farad e aram e lolugen — ma p’ebuk e aram fapi profet ni tin yad be fil ngak e girdi’ e de riyul’. 16 Pi’in yad ma pow’iy e pi girdi’ ney e yad be ban nagrad ka ra olobochiyed yad. 17 Ere Somol e dabi digey reb e pagel nge thay nge mil ko gechig, ma dabi runguy e pi’in keyim’ figirngirad nge pi’in kanim’ rorad, ni bochan e ke gubin e girdi’ mada kurir liyorgad ngak Got ma ba kireb ngongolrad, ma urngin e pin’en yad be yog e thin ko balyang. Damumuw rok SOMOL e dawrimus, ni ka be par pa’ nib k’iy ni nge gechig. 18 Kireb ko girdi’ e be yik ni bod e daramram nma urfiy e pan ni bay e rachangal riy. Be mo’oruf ni bod e nifiy u lan e loway nma gabulbul e ath riy ngalang. 19 Bochan e damumuw rok SOMOL ni Gubin ma Rayag Rok, me mo’oruf daken e but’ ma girdi’ e mang ma’af ko nifiy; ndakuriy be’ ni yag ni ayweg walagen. 20 Girdi’ u ga’ngin yang u lan binaw e yad ma achbutheg e chu’uwi ggan ni yad be pir’eg, machane kiyad be par ni yad ba yam’ ko mak’iy. Mus ko bitir rorad ma yad be longuy! 21 Girdi’ nu Manasseh nge girdi’ nu Efraim e yow be togopluw ngorow, mi yow cheal ngar togopluw gow nga Judah. Ni aramrogon e chiney ni damumuw rok SOMOL e daworimus; ni pa’ e ka ba k’iy ni nge gechig.