Judges 13 (TOMA)

1 Izilayɛle nuiti ti Ɠɔoɠɔ GALAGI wanama vai ɠɛɛni mɔnɔ. Ɠɔoɠɔ GALAGI ti lɔɔni Filisiti nuiti zeezu kona ʋuunaanigɔ (40) laawu. 2 Zunui ta ɠɛni Soleya, Dan ná-bolodai zu, daa ɠɛni ga Manoa. Anzai ɠɛni ga doun zɔlɔɔtala nui, é la ɠɛni zooni é ʋa doun zɔlɔɔ. 3 Foloi ta, Ɠɔoɠɔ GALAGI ná-geezuɠeelai ɠulani kɛlɛma anza nui naa ʋɛ, é ɠɛ ma: «Wɛlɛ, ɗa ga doun zɔlɔɔtala anzai, è la dɛ doun zɔlɔɔni, ɗa kogi zeɠezu, kɛlɛ è doun zunu zɔlɔɔ. 4 Niizu, dama ga ɓɔɠɔ, mina dɔɔ ɓɔle, ɓaa ani nɔpɛ a nu ɠaazulati, ta è mina ani mi, nii kɔzɔai. 5 Mazɔlɔɔ ɗa ʋaazu kogi zeɠezu, è doun zunu zɔlɔɔ. Doungoi naa ɠa yɛsu dee ɠoozu, é ɠaliva GALA ma, eyɛsu pɛ, maa la nɛɛni, é ʋa nɔungi wo, ɓaa kpɛlɛi. Toɠa a tɔɔzei ga Izilayɛle ɠula Filisiti nuiti zeezu.» 6 Anzanui liini ná-koizu, é ɠɛ sinigi ma: «GALA nui ta ʋaaʋɛ pɔ̀ bɛ, é ɠɛa ɠulani ga GALA ná-geezuɠeelai ta, gaamazu maayikiʋɛ. Gè la gaazaɠani ga ʋɛ seɠeai ná, ta é la laasei dɛɛni ga ze. 7 Kɛlɛ kɛɛʋɛ mà: ‹Wɛlɛ, ɗa ʋaazu kogi zeɠezu, è doun zunu zɔlɔɔ. Niizu mina dɔɔ ɓɔle, ɓaa gaazulati gani, ta mina ani mi, nii kɔzɔai, tɔɔzei doungoi naa yɛgɛ dee ɠoozu, é ɠaliva GALA ma, eyɛsu saa voloi zeeli.› » 8 Manoa Ɠɔoɠɔ GALAGI valini, é ɠɛ ma: «Ee, Màliɠii, GALA nui è teʋeni, é ʋaana mɔnɔ gi ʋɔ bɛ, é gi ɠala ga nii maanɛai gi kɛ doungoi ná-fai zu, nii é zɔlɔɔsu!» 9 GALA ge Manoa wooi mɛnini, GALA ná-geezuɠeelai ʋaani mɔnɔ anzanui ʋɔ bɛ, siɛgi zu é ɠɛni zeini la kpalagaʋɛ, sinigi Manoa la ɠɛni ba ná. 10 É suvilɛni é ɓizɛ, é li, é bo sinigi ma, é ɠɛ ma: «Wɛlɛ, zunui nii é ʋaani pɔ̀ bɛ zɔizu, é ɠula kɛlɛma bɛ̀ mɔnɔ.» 11 Manoa wuzeɠeni, é ʋilɛ anzai ʋolu, ti li zunui ʋɔ bɛ, é ɠɛ naa ma: «Ɗa ɠa nɛi è ɓɔɛai anzanui nii ʋɔ?»Naa gooɠaaʋoteni, é ɠɛ ma: «Nà ʋe.» 12 Manoa ɠɛni ma: «Niizu è-laawooi a ʋilɛna su, tɔgi ɓɛgele ɠa gá so doungoi ná-faa zu, leeni ɠa gá kɛ?» 13 Ɠɔoɠɔ GALAGI ná-geezuɠeelai gooɠaaʋoteni, é ɠɛ ma: «È-anzai maanɛɛʋɛ é ɓɔɠɔ zo naa pɛ su, nii gè boni ma. 14 É mina leezɛn ansaɠɔgi ma waai mi, é mina dɔɔ ɓɔle, ɓaa gaazulati gani, é mina ani nɔpɛ mi, nii kɔzɔai, é ziɛ ga devei naa, eɠɛʋelei gè boni ma la.» 15 Manoa ɠɛni Ɠɔoɠɔ GALAGI ná-geezuɠeelai ma, naazu: «Va bu gi è zuzo, gi boli yiʋo ɠila kpɛtɛ è ʋɛ.» 16 Ɠɔoɠɔ GALAGI ná-geezuɠeelai gooɠaaʋoteni, é ɠɛ ma: «Anɛɛ ni ɗa sùzosu, gè la ɗa-laamianigi ta mia, kɛlɛ ni ɗa pɔ è gala zalaɠai ɠula Ɠɔoɠɔ GALAGI ʋɛ, naa ɠɛ!» Manoa la ɠɛni kwɛɛ ga Ɠɔoɠɔ GALAGI ná-geezuɠeelai ʋe. 17 É geezuɠeelai ɠaazaɠani, é ɠɛ ma: «È-laaseigi? Naa ɠa a kɛ, nii è bogai, naa laa a zeelina, gi zoo gi è wɔɔlɔ.» 18 Ɠɔoɠɔ GALAGI ná-geezuɠeelai gooɠaaʋoteni, é ɠɛ ma: «Lee vaa zu è gàazaɠasu dàaseigi ma? Daasei be maayikiai.» 19 Manoa boli yiʋoi zeɠeni, é kpɔ vebɛ zalaɠai ʋa, é gala zalaɠa ɠula kɔtu wolai ma Ɠɔoɠɔ GALAGI ʋɛ. Laavɔɔ vaa ɠɛɛni, siɛgi zu Manoa ta anzai ti ɠɛni wɛlɛzu la, 20 abuzogi ɠɛni lɛɛzu geezu ʋelei, é ɗa zeɠe zalaɠa ɠulazuʋɛ, Ɠɔoɠɔ GALAGI ná-geezuɠeelai lɛɛni zalaɠa ɠulazuʋɛ ma abuzogi zu. Manoa ta anzai ti naa ɠaai ma, ti looni zooi ma, ti laaʋɛ. 21 Ɠɔoɠɔ GALAGI ná-geezuɠeelai la mɔ ɠɛni ɠulani kɛlɛma Manoani bɛ ta anzai. Manoa kwɛɛni naazu ga Ɠɔoɠɔ GALAGI ná-geezuɠeelai ɠɛni de. 22 Manoa ɠɛni anzai ma: «Da zaazu ti, mazɔlɔɔ de GALA kaa.» 23 Anzai gooɠaaʋoteni, é ɠɛ ma: «Ni Ɠɔoɠɔ GALAGI ɠɛni pɔ ga é de ʋaa, é la ɓena da-vebɛ zalaɠai ta gala zalaɠai zo, é la ɓena naama vaiti kpein dɛɛ ga deye, é la ɓena naama vaiti kpein bo de ma.» 24 Anzanui doun zunu zɔlɔɔni, é daasei pɛɛ ga Samesɔn. Doungoi wɔɔlɔni, Ɠɔoɠɔ GALAGI tuya looni bɛ. 25 Ɠɔoɠɔ GALAGI ná-Zɛnvui tɔɔzeini ga botii ɠɛa la Maɠané-Dan, Soleya ta Esetawɔle ti yɔɠɔzuʋɛ.

Judges 13 (TOMA)

In Other Versions