Jeremiah 6 (TOMA)
1 Ɓɛnzamɛn nuiti, à ʋela, wo ɠula Zeluzalɛme ʋa!À puʋugi vɛ Tekoa!À poogi lɛ geezu Ɓɛte-Kelɛme maazu!Mazɔlɔɔ maanɔɠɔi ɠa ʋaazu,é zeɠe lɛkpɛmaʋɛ nu ɠɔʋɛzu ʋelei,maanɔɠɔ zɛbɛlɛ gola ʋe. 2 Gè koloɠologa, Siyɔn anzalopoi, pagai, zaalamai! 3 Nuiti ta ʋa pɔ bɛ eɠɛ baala makɛ nuiti,ta-ʋaala kpulugiti ti ti ʋolu,ta ta-ɠɔɔlaaɠaiti to daalɔɠɔma maaɠoolii zu,ti ɠilagilagi ta-ɠuɠuiti ti ná,ʋɛ ta li ga ta-ɠɔɔ ɓulugiti ná. 4 Ta zezezu, ti ɠɛ ma: «À ɠɛʋele ɓɛtɛ,ade kɔɔi ɠɔ daalɔɠɔma!À wuzeɠe, ade so folo gaalɔgai zu.Ade maawɔinɗa, tɔɔzei foloi daa,kpɔkɔ niinigi zuwɔɔlɔa. 5 À wuzeɠe, ade so ga kpidii,ade ná-pɛlɛ ʋapagiti golo.» 6 Ɠɔoɠɔ GALAGI, Fai-Pɛ-Maliɠii wooi ɠaa:«À ná-gulu wolaiti pɔ,wo sasai ɠooli Zeluzalɛme ma,taa wolai maanɛai ga maaɠolo,tɔɔzei faa ɲɔi ʋa é ɠɛɛzu su. 7 Eɠɛʋelei kɔlɔyeɠei a ɗa ziɛi ʋili da,zekana é ná-faa ɲɔi ɠulazu la.Kɛni tooma vai ta faa ɲɔu vai nɔ ɠa nu a ɗa mɛni ná,yeenɔpɛ nu ɓɔlɔ vai ta nu maawana vai nɔ ɠa gè kaazu ná. 8 Va bu, è ʋa ɠima, ɗa ʋe Zeluzalɛme,ni naa laade, nà ɓeteʋezu è ʋa,gè è ɠɛ ga zooi koloɠologai, nu la su.» 9 Ɠɔoɠɔ GALAGI, Fai-Pɛ-Maliɠii wooi ɠaa:«Izilayɛle mɔtai zɛgai, à naa volo ba,eɠɛ leezɛn ɓelei ma ɠɔpɔgiti.À yee leʋe mɔinmɔin leezɛn ɓelei ma ɠɔpɔgiti ga,eɠɛʋelei kpele kɛɛ nu a ɗa kɛɛ lasiɛgi zu é ma waai ɠulazu la.» 10 Ɓɛ ɠa nà ɓɔɛ pɔ,ɓɛ ɠa nà tɛnɛ, ti ʋa woilo gòo ma?Ti woizuɓɔlɔʋɛ, ti la zooga ti ʋa ɠida faa wu.Wɛlɛ, Ɠɔoɠɔ GALAGI è-laawooi ɠa ti ya ga ɲɛɛvae gani nɔ.Naa wɔin la ti ma. 11 Nɔ̀un tetema, Ɠɔoɠɔ GALAGI,dàavegɛ ga ɗa-vai ma yiiɠaawanai,gè makɛ vai ma, naa ɠa kpɔ̀lɔzu. «Kula yiima ʋɔɔma, è pu doungoiti ma taazuʋɛ,ta buzeɠe niinɛgiti ti ɠaalɛai ba ti-ma ɓulugi.Mazɔlɔɔ anzazinigi ta anzanui ta zo,nu wɔlɔzaɠagi ta zɔi sii zuɠoozaai na,naati ta zo ɓalaa. 12 Ta-ʋɛlɛiti ta ɠɛ ga nu ɠiligaa tɔnɔ,ta-ɓalagiti ta ti-anzaiti ɓalaagi,ungo, nà zeei wuzeɠezu zooi nii zu nuiti pɛ daalɔɠɔma,»Ɠɔoɠɔ GALAGI wooi ɠana. 13 «Mazɔlɔɔ é zo ɓolomadɔɠɔiti ma, é li seizumaanɛgiti pɔ,ta ti-ɓɔɠɔ lɔnɔgi nɔ ɠaiziɛzu,é zo GALA goo wo nuiti ma, é li zalaɠa ɠula nuiti pɔ,ti pɛ ta ziɛzu ga yaavai. 14 Ta nà-nuɓusɛiti ta-ʋalai ɠaaʋɛ nɔ zalezu,ti ɠɛ ma: ‹É zolooga ga pagɔ, ti pɛ ti zolooga su,›tama faiti tanɔpɛ ge la liizu ga pagɔ. 15 Ta unfesu nɛi ɓaa ga kɔzɔba vaiti ti ɠɛɛni?Unfe ge la ti ma tago pa,ti la vɔlɔ zooga ti ʋa unfe.Naa ɠa é ba, ta loo ʋɔɔma, ta zɔiti ti loozu,ti ɓezeɠele naama yeeɠɛɠalai zu,yeei ge ɠɛɛzu la ti ʋoluvaawo,»Ɠɔoɠɔ GALAGI ɠa é boga. 16 Ɠɔoɠɔ GALAGI wooi ɠaa:«À lago lo dɛɛ pelei zu, nii wo ziaai la,à gwɛlɛi wo, wo gaazaɠa bo, é ʋilɛ faiti ba wo ziɛni ti zu.Ɓɛgele ɠa é ga pele ʋagɔi?Naa ʋolu à ziɛ la, wa dooɠo sɔlɔɔ ɓɔɠɔ ʋɛ.Kɛlɛ ti gooɠaaʋoteni, ti ɠɛ ma:‹Ɓa-o, gi la ziaa la pɛ!› 17 Gè ada makɛ nuiti seiɗa wo zaama, ti ɠɛni wo ma:‹À dama ga puʋu fɛɛ wooi!›Kɛlɛ ti gaaʋoteni, ti ɠɛ ma:‹Gi la woiloga naa ma!› 18 Naa ɠa é ba, ee, zii ɠiligiti, à woilo gòoi ma!À ɠida bu, wo ɠɛ ga zeeleiti faiti suti ɠɛɛzu ti ʋɔ bɛ! 19 Zou, woilo!Wɛlɛ naa ɠa gè ʋaazu ga maanɔɠɔi niima nuɓusɛiti pɔ,ta-ɠisiɛ ɲɔiti sulɔnɔgi ɠana.Mazɔlɔɔ ti la woiloni dàawooiti ma.Ti ɠɛlɛni nà-tɔgiti ba. 20 Leeni ɠa gè kɛɛzu ga ansansegié zeɠezu Saɓa yooi zu,ɓaa seeli kpaɠa maku nɛɛnɛgi é zeɠezu zooi zu ná maaɠoozaai?Wa-ɠala zalaɠaiti maayo ge la bɛ̀,wa zalaɠaiti ti la nɛɛni bɛ̀.» 21 Naa ɠa é ba, Ɠɔoɠɔ GALAGI wooi ɠaa:«Nà ʋaazu kɔɠɔziɠa aniiti daazu niima nuɓusɛiti ta-ʋelei zu,toɠa ɠɛɛɠɛiti too ʋɔɔma ta doun zunuiti,ti-zeiɲɔɠɔiti ta ti-wɔɔlaiti ta saai zɔlɔɔ su.» 22 Ɠɔoɠɔ GALAGI wooi ɠaa:«Nuɓusɛiti ta ʋaazu,ti zeɠe lɛkpɛmaʋɛ nu ɠɔʋɛzu ʋele yooi gila su.Zii ʋe bɔɔlɔai gola é ʋilɛsu pelei ma,é zeɠe zou ɓela ga. 23 Ta-zalaʋusuiti ta mɛɛinti gaalɛɛzu ta kpɛɛinti.Ti zuɲɔuʋɛ, ti la maawɔinɠaa ɠɛa,ti ɗa zɔngɔ eɠɛ kpoloɗɛi a ɠɛ zɔngɔzu.Ta zeini sooiti kɔma,ti zeiɗai kpasu eɠɛ nu ɠila kɔɔɠɔ vai maSiyɔn nuɓusɛi laalɔɠɔma.» 24 Gi naama wooi mɛnigai ma,gi-yeeiti su ɠɛni yɔɔɠɛ,maaɠilii lɔɔni gi ma,taɓai gi zo eɠɛ anzanui a ɠɛna doin zɔlɔɔsu. 25 À mina li ɓalaɠai zu,à mina li pelea zu,mazɔlɔɔ nu ʋaa nuiti ta paai wosu ná,maalua vaa ʋe mini-o-mini! 26 Nà-nuɓusɛiti, à saa wɔlɔ wo seɠei ɠili zaama,wo ɠilikili zuʋui zu,à ɠaalɛi eɠɛ doun ɠila saai.À maawɔin wɔlɔ wuyei loo.Mazɔlɔɔ faa zuɠoloɠolo nui ɠa ʋaazu ade ʋɔ ga kulafilibai. 27 «Wɛlɛ, Zelemi, gè è logɛ eɠɛ nui é kɔlui ʋɛtɛsu,è nà-nuɓusɛiti poluɠula,ɗa ʋaazu ti-ziɛ ʋelei ʋɛtɛsu, è kwɛɛ. 28 Ta ga nuiti ti ɓakagai, ti vɔɔnɛ,tɔɠɔ ɠoloɠolo nuiti,ti ɓaaʋɛ eɠɛ kɔlu ɓɔigi ta kɔlui,ti pɛ ta ga faa ɲɔu ɠɛ nuiti. 29 Fuulɛi ɠa ɗa ɓokolo, é fiilɛi ʋu,kena kpui ɠa ɗa ɲɛɛlɛ abui ɠa.Kɛlɛ wafuun faa ɠa kɔlu ɠaawuun nui a ɗa kɔlui ɠaawuun da,ma ɲɔi kpein ge la ɗa ga ɠula ba. 30 Ta loli ga walii maayo ge la laani,mazɔlɔɔ Ɠɔoɠɔ GALAGI ti maayoseɠea.»