Job 7 (TOMA)

1 «Nii deveai nuɓusɛi ma eteai zu, kpaaʋɛ eɠɛ salaʋusulai,sii ma voloiti kulaʋɛ eɠɛ nui é zalai ɠaiziɛzu. 2 Eɠɛ duɔi é foloi ɠa, é niinigi maaɓɔunsu,ta eɠɛ botiɠɛ nui é zalai maaɓɔunsu, 3 zekana gè la, gè alugiti kɛa taɓai zu,nà kpidiiti kɛɛzu nɔ kpɔlɔi zu. 4 Nà laana nɔ feya, nà ɗa ɠisiɛ ga: ‹Nà wuzeɠe siɛ kpɛgele zu?›Siɛgi zu kpidii zuɠoozazu la, dàa ɠa vesu ga kɛunga wuuleegi eyɛsu geelaalao. 5 Koegi ʋua kpùsɛi ʋa ná pɛ, kɔ̀lɔgi ɓaa ga pɔlɔi ɠɛʋelei,kɔ̀lɔgi ɗa ʋaliʋali, é ɗa ɠula ɓɔɠɔ ʋa. 6 Nà-eteai ɠa leʋesu ga maavilɛ, é leʋe seɠe vɛlɛ nui ná-keingi ʋa.Toɠa liizu, é ɓe, kito nɔpɛ ge la ɠɛa ná. 7 «Ee, GALA, ɠizɛ su ga zɛ̀nvui ɠa ga fiilɛi nɔ,gàazuʋɛ la mɔ undaanɛɛi ɠaa ʋolu eyɛsu ɠɔ. 8 È-ɠaazuɠɛzɛi è ɠɛa wɛlɛzu mà la, naa la mɔ zooga é ʋa kà,siɛgi zu è wɛlɛzu la, gè la mɔ ɠɛa ná. 9 Tonaɓiingi ɠa ɗa ɲɛɛlɛ, é li,zekana é la, zɔi é yeizu gɔvɛalaazu, é la mɔ lɛa ʋolu. 10 É la mɔ ɠalega ma ʋolu, é ʋa ʋa ná-pɛlɛi wu,ta yeema ma seizuʋɛ ɓɔɠɔi. 11 «Naa ɠa é ba, gè la mɔ maaɠɛsu kpɔ ʋolu,zɛ̀nvui ɠa kidaaʋiligi laawu, kɛni mu gè ɓɔɛ.Nà kpalagi wosu nà-ziiɓɔlɔi laawu. 12 Nà ga kpoloɗɛi ɓaa, ɓaa kpoloɗɛ wu zua wolai,è nua ʋilɛsu dàalɔɠɔma ga ti ɗa wɛlɛ mà? 13 Siɛgi zu gè ɠɛɛzu ma la: ‹Nà-betei ɠa gàanɛɛnɛ,dàazuʋɛ ɠa ɓɔ bà ta zeɠe nà-taɓai ʋa,› 14 naazu ɠa è màaluazu la ga se wuulewuulegi,è gàalua ga kulakɛlɛmaiti. 15 Wɔ̀inʋɛ ga è dɔ̀ɔɓa,Ungo, saai vizɔgɛ mà, gè ʋa lia yɛsu ga mà ɠaei nɔ! 16 Faa kula ɠɛa, gè la yɛga ná ɠɔ,zɛ̀nvui la ga ani nɔpɛ, zɛ̀ ná dɔin. 17 «Nuɓusɛi ɠa ga leeni, è ʋa wola ɠigaiziɛ ná-faa zu,ta ná-fai wola ʋa ɠɛ è-yii ma, 18 è ʋa ɗa ná-fai wuuʋɛtɛ sobu-o-sobu,ta è ɗa ʋa poluɠulazu yeeɠɛɠalai pɛ su? 19 Siɛgi ɓɛgele ɠa è-ɠaazuʋɛ zeɠezu la bà?Siɛgi ɓɛgele ɠa è ɓesu la bà, gè dàaɗɛi ɓɔle? 20 Tɔun, anɛɛ ni gè koto ɠɛɛni, leeni ɠa gè kɛai ga ɗe, ɗɛi è wɛlɛzu nuɓusɛiti ma?Leeni vaa zu è daalogai nà nɔ bà?Gè ɠɛa ga kasɔ, ɓaa? 21 Leeni vaa zu è la nà-tɔ koloɠologiti suvaayɛsu,è ʋa ɓudɛ nà-faaɠaaza golai maazu?Mazɔlɔɔ nágo ʋe na, gè ʋa la fufiligi zu.Ɗa gàiziɛ, kɛlɛ gè la mɔ ɠɛa ná.»

Job 7 (TOMA)

In Other Versions