Luke 24 (TOMA)
1 Dɔɔɠɔi ma volo mɔungi sobuzobui, ti liini kabalaʋɛ ga tufa maku nɛɛnɛgiti, niiti ti ti ɓɛtɛni. 2 Ti kɔtui ɠilikiligai ɠaani, seɠeai kabai la. 3 Ti lɔɔni su, kɛlɛ ti la ɠɛni Maliɠii Yesu ma ʋoomai ɠaani su. 4 Tɛi ti ɠidaaʋilini ga naama vai, zunu felegɔ ɠulani kɛlɛma ti ʋɛ, ti ɠɔba zeɠeiti ti ɠɛni volozu. 5 Dualuagi maaʋele ma, ti unpilɛni zooi ma. Naati ti ɠɛni ti ma: «Leeni ʋe zɔi é vulua, wo naa ɠaiziɛzu gɔvɛiti saama? 6 É la mɔ ʋɛ, é wuzeɠea, é ɠula saai ya. À ɠitoo gooi zu, kɛai ma wo ʋa Galilé yooi zu, 7 é ɠɛni ɠɛɛzu ma: ‹Kɛni ta Nu ná-Doun Zunui lɔ kotoba nuiti zeezu, é ɓadɔ saa wului ma, foloi zaʋasiɛi é wuzeɠe, é ɠula saai ya.› » 8 Ti-ɠi ge looni naazu Yesu wooiti su. 9 Ti zeɠeni kabalaʋɛ, ti li, ti naa pɛ bo kaladopo puugɔ maazu ɠilagiti ma (11), ta zɔiti pɛ ma. 10 Niiti ti naama vaiti boni keelaiti ma, ti ɠɛni ga: Magedala nui Mali, ta Zane, naa ʋɛɛ Zake dee Mali ʋa, ta anzanu ɠiligi zɔiti ɓalaa ti ɠɛni ti ʋolu. 11 Kɛlɛ naama wooiti ti ɠɛni ti ɠaazu eɠɛ kpɔɛ ɲaka, ti la ɠɛni laani anzanui naati gooi la. 12 [Kɛlɛ Piyɛlɛ wuzeɠeni, é ɓizɛ, é li kabalaʋɛ. É unmaalaagai ma, é la ɠɛni ani ɠili kaani, kɛni seɠe zakpaiti nɔ. Naa ʋolu, é zeɠeni ná, daavɔai ga naama vai, nii é ɠɛɛni.] 13 Naama volo ɠilagi nɔ, kaladopo felegɔ ɠɛni liizu taa goi ta zu, ná laa ga Emawuse. Ná maaɠoozani Zeluzalɛme ʋa ga kilo puugɔ maazu felegɔ (12) ɠɛɠala. 14 Ti ɠɛni yɛpɛzu ga naama vaiti pɛ, niiti ti leʋegai. 15 Ti ɠɛai ma yɛpɛzu, Yesu ɓɔɠɔgoi maaɓuɠani ti ʋa, ti ɗa li ʋɔɔma. 16 Kɛlɛ ti ɠaazumaaɓidini ga ti mina kwɛɛ. 17 Yesu ɠɛni ti ma: «Wa-yɛpɛ wooiti ta ga ɓɛgele, wo ti wosu, wo ɗa ziɛ?» Ti loni kpɛ, ti ɠaazuɠiliai. 18 Ti ɠila ge ɠɛni ná, nii daa ɠɛni ga Kelewopase, naa gooɠaaʋoteni, é ɠɛ ma: «Ɗa ɠila nɔ ɠa è ɲii wosu Zeluzalɛme, è la kwɛɛ, nii kɛai niima voloiti?» 19 Yesu ɠɛ ma: «Ɓɛgele ɠa ga naa mu?» Ti gooɠaaʋoteni, ti ɠɛ ma: «Nii kɛai é ʋilɛ Nazalɛte nui Yesu ʋa, nii é ɠɛa ga GALA goo wo nu, zɛbɛi ba kɛɛwotiiti ta kpɔɛzuɠulaiti su, GALA ta nuɓusɛiti pɛ gaazu. 20 Gá-zalaɠa ɠula ɠundiɠiiti ta gá-ɠundiɠiiti ti teʋegɛ ga ti peelala ga ti paa, ti kpadɔ saa wului ma. 21 Tɔ ɠa gi-ɠi ge ɠɛa ba ga toɠa Izilayɛle unmɔɔ. Kɛlɛ wɛlɛ niima vaiti kɛɛʋɛ ma voloi zaʋasiɛ ɠa ga za. 22 Gaama ʋe ga, anzanui tanigaa niiti ti gi zaama, ti gi laavɔɔʋɛ. Ti liiʋɛ kabalaʋɛ gosui, 23 kɛlɛ ti la ma ʋoomai ɠaani. Ti ɠalegɛ ma, ti ɠɛ geezuɠeelaiti kulaʋɛ ti ʋɛ kɛlɛma, naati ti ɠɛ ti ma: ‹Toɠa vulua.› 24 Gi zaama, nui tanigaa liiʋɛ kabalaʋɛ, ti faiti ka nɔ, ʋelei anzanuiti ti bogai la, kɛlɛ ti la tɔ ɓɔɠɔi ɠaani.» 25 Názu ɠa Yesu ɠɛni la ti ma: «Ee, wa vaa ɠaaɠaazu ɓaaʋɛ! Wo nɛkɛgɛ ti laazu naa la, nii GALA goo wo nuiti ti bogai! 26 Kilista maa la ɠɛni nɛɛni, é ʋa ɓɔlɔ ɠana, aisa é ʋa lɛ ná-lɛbiyai zu ɓaa?» 27 Naa ʋoluma, nii kpein GALA Sɛʋɛi bogai, é ʋilɛ tɔ ɓɔɠɔi ʋa, é tɔɔzeini ga naa yɔɠɔzulɛa ga tiye, é tɔɔzei Moize ná-sɛʋɛiti ma, é li GALA goo wo nui zɔiti ta-zɛʋɛiti pɔ. 28 Ti zeeliai ma taa loaʋɛ, ʋɛ ti ɠɛni liizu ná, Yesu kulani eɠɛ a ɠɛ liizu poun. 29 Kɛlɛ ti vɔɔnɛni ba, ti ɠɛ ma: «Yɛ gi ɠoba, foloi ɠana li, fitili ɠana pɛɛ.» É lɛɛni pɛlɛi wu naazu ga é yɛ ti ɠoba. 30 Ti ɠɛai ma daamii wosu taɓalii ɠa, é ɓului zeɠeni, naa ʋoluma kpegai ma ga mama fee ƓALA falii wo, é galeɠaleni, é fe ti ya. 31 Názu ɠa ti-ɠaazuʋɛti ti zeɠeni la ma, ti kwɛɛ, kɛlɛ é ɲɛɛlɛni ti ɠaazu. 32 Ti ɠɛni ɓɔɠɔ ma: «Koozunɛɛi ɠɛni de ʋɛ, siɛgi zu é ɠɛa GALA sɛʋɛiti zɔɠɔzulɛɛzu la ga deye pelei zu.» 33 Ti wuzeɠeni naama yeeɠɛɠalai nɔ, ti ɠale ma Zeluzalɛme, ti kaladopo puugɔ maazu ɠilagiti (11) ka, ta niiti ti ɠɛni ti ʋa. 34 Naati ti ɠɛ ti felegɔ ma: «Maliɠii wuzeɠea, é ɠula saai ya ga ɠite, kulaʋɛ kɛlɛma Simon ʋɛ.» 35 Tiya ɓalaa ti naa zuɠulani, nii é ɠɛɛni pelei zu, ta ʋelei ti kwɛɛni da, siɛgi zu é ɓului ɠaleɠaleni la. 36 Ti yɛni nɔ naama ɓɔɛiti bosu dɛ, eyɛsu Yesu ɓɔɠɔgoi lo ti zaama, é ɠɛ ti ma: «Ziilɛigi ɠɛ wo ʋɛ.» 37 Dualua golai leʋeni ti zu, ti ɠɛni kaazu ga ti zɛnvui ta ɠa. 38 Kɛlɛ Yesu ɠɛni ti ma: «Lee ʋe wo yiiɓɔlɔzu? Lee vaa zu inɛinɛgi wo ɠisu? 39 À wɛlɛ lɛɛ zèei ta kɔ̀ɠɔiti ba, nà ɓɔɠɔɓɔɠɔgi ʋe. À vɔɔɠu bà, wa kwɛɛ, tɔɔzei kɔlɔ ge la zɛnvui ma, kae la su ga kɛ̀ʋelei.» 40 É naama wooiti bogai ma, é zeeiti ta kɔɠɔiti dɛɛni ga tiye. 41 Tɛi ta ɠoozunɛɛi zu, ti la ɠɛni dɛ laani da, ta ti laavɔai, é ɠɛni ti ma: «Daamiani ka wo ya ʋɛ?» 42 Ti kale mɔgai ma ɓuɠa ɠila feeni zea. 43 Ti ɠaazuyɛni ba, é seɠe, é mi. 44 Naa ʋoluma, é ɠɛni ti ma: «Naama vaiti ka gè ɠɛni ti wosu wo ma, ade ɠɛai ma ʋa, ga fai kpein é zɛʋɛni nà-faa zu Moize ná-tɔgi zu, ta GALA goo wo nuiti ta-zɛʋɛiti su, ta GALA Sɛʋɛi ma wuyeiti su, ti laa ɠa zeeli.» 45 É ti-ɠigiti daalaoni názuʋɛ, nii a kɛ ti GALA sɛʋɛiti gaaɠa. 46 É ɠɛni ti ma: «Naa ɠa é zɛʋɛni GALA Sɛʋɛi zu ga: Kilista a la ɓɔlɔ, foloi zaʋasiɛi é wuzeɠe, é ɠula saai ya. 47 Daaseigi zu, nu ziɛ ʋelei maavalibo fai ta kotoi ma zuvaayɛgi ma wooi laa ɠa zeeli ziiti pɛ ma, é tɔɔzei Zeluzalɛme ma. 48 Wa ga naama vaiti ma zeelei. 49 Nà ʋaazu naa leʋesu wo ma, nii Kɛ̀ɛ minazeɠeai la. Kɛlɛ kɛni dɛ wo yɛ Zeluzalɛme taazuʋɛ, eyɛsu wo zɛbɛi zɔlɔɔ, é zeɠe geezuʋɛ.» 50 É loni ti luɠɔ, eyɛsu ti maaɓuɠa Ɓetani ʋa, naa ʋoluma é yeeiti buzeɠeni, é tuya loo ti ʋɛ. 51 Kɛai ma tuyai loozu ti ʋɛ, é zeɠeni ti ʋa, é lɛ geeɠɔlɔgi zu. 52 Tiya mu, ti ɓegai ma ga dɛbi, ti ɠaleni ma Zeluzalɛme ga koozunɛ wolai, 53 siɛnɔpɛ su ti ɠɛni nɔ ɠɔ GALA sei ʋɛlɛi wu, ti ɗa GALA mama.