Matthew 6 (TOMA)
1 «À dama ga wo ɠoloi ʋelei GALA bɛ, wo mina naa ɠɛ ga nuiti gaazu vaa nɔ, nii a kɛ ti ʋa ɗa wo ʋɛtɛ. Ni wa kɛɛna ɠana, wo la kulanuma zɔlɔɔga wo-Ɠɛɛ ya, nii é geeɠɔlɔgi zu. 2 «Naa ɠa é ba, siɛgi zu ɗa ɠɛ faaɓɔɠɔ ɠɛɛzu la bala nuiti bɛ, mina puʋu fɛ ɓɔɠɔ ma, ga woovele nuiti kɛʋele GALA dɛbi ʋɛlɛiti bu, ta pele zaamaʋɛti, ta ɗa naa ɠɛ, nii nɔ a kɛ nuiti ti ʋa ɗa ti lɛbi. Gè bo wo ma ga gaamai, ta-ɠulanumai ɠana ti sɔlɔɔgai niina. 3 Kɛlɛ ɗɔun, ɗa ɠɛna faaɓɔɠɔ nɔpɛ kɛa, è-ɠɔʋɛi mina faa ɠwɛɛ naa zu, nii è-yeezai kɛɛzu. 4 Ɗa-vaaɓɔɠɔi ɠɛ dɔɔɠuzu. È-Ɠɛɛ nii é wozaɠaazu dɔɔɠui zu, naa ɠa kulanuma ve è ya. 5 «Siɛgi zu wo GALA falizu la, à mina ʋokɔɠɔ woovele nuiti ma, niiti ta ɗa ɠaalɔ GALA dɛbi ʋɛlɛiti bu, ti ɗa GALA fali, ɓaa pele zaɠalaʋɛti, wɔin ɠa ɗa ɠɛ ti ma ga ɛsɛ pɛ ge ɗa ti ʋɛtɛ. Gè bo wo ma ga gaamai, ta-ɠulanumai ɠana ti sɔlɔɔgai niina. 6 Kɛlɛ ɗɔun, ɗa ɠɛna GALA falia, li è laa ʋɛlɛi wu, è pɛlɛi ʋilisu ɓɔɠɔ ma, è ɗa-ƓALA falii laazeeli è-Ɠɛɛ ma, nii é dɔɔɠuzuʋɛ. È-Ɠɛɛ nii é wozaɠaazu dɔɔɠuzuʋɛ, naa ɠa ɗa-ɠulanumai ve è ʋɛ. 7 «Wa-ƓALA faliiti su, à mina ɗa ga wooi wola mɔin su, ga zii ɠiligiti kɛʋele, naati ta ɗa ɠisiɛ ga ta wola ɓɔɛna, naa ɠa a kɛ GALA ge ti woomɛni. 8 À mina ʋokɔɠɔ ti ma, tɔɔzei wo-Ɠɛɛ kwɛɛ nii wo ɓɛdɛai ma, wo ʋa ɠɛ wo laa zeɠe ma, wo fali ma. 9 «Wɛlɛ ʋele ɠa wo maanɛai wo GALA fali la:Gi-Ɠɛɛ, ɗɛi è geeɠɔlɔgi zu,è-laaseigi ɲade. 10 Ɗa-masadai ʋaana,è-yiimai ɠɛ zooi ma,eɠɛʋelei é ɠɛɛzu la geeɠɔlɔgi zu. 11 Za ɠɔnɔgi ve gi ʋɛ. 12 Gi zuvaayɛ ga è wanama vaiti,ʋelei gá ɓalaa gi nuiti suvaayɛsu la ga gi wanama vaiti. 13 Mina va bu, gi ʋa loo tɛgai zu,kɛlɛ gi ɠizo faa ɲɔi ma.[Mazɔlɔɔ ɗa ɠa è-ʋo ge ga masadai,ta zobogi, naa ʋɛɛ lɛbiyai ʋa, eyɛsu ɠɔ. Amina.] 14 «Tɔɔzei ni wa zɔiti suvaayɛna ga ta-vaa ɲɔiti, wo-Ɠɛɛ, nii é geeɠɔlɔgi zu, naa ɠa wa ɓalaa wo zuvaayɛ. 15 Kɛlɛ ni wo la zɔiti suvaayɛni, wo-Ɠɛɛ ɓalaa ge la wo zuvaayɛga ga wa-vaa ɲɔiti. 16 «Siɛgi zu wo ɠɛɛzu zugi zosu da, à mina ɠaazuɠili ga woovele nuiti kɛʋele, ti ɠaazuɠilizu kɔlɔbɔbɔ, nii a kɛ ɛsɛ pɛ ge kwɛɛ ga ta zugi zu. Gè bo wo ma ga gaamai, ta-ɠulanumai ɠana ti sɔlɔɔgai niina. 17 Kɛlɛ ɗɔun, siɛgi zu è zugi zosu da, ɠaazugba fo, è gulɔ maku nɛɛnɛgi ziɛ ɗɔungi ma, 18 nii a kɛ è mina dɛɛ ga nuiti ga ɗa zugi zu. Kɛni è-Ɠɛɛ ɠila kpe nɔ, nii é è ɠoba dɔɔɠuzuʋɛ, tama è-Ɠɛɛ nii é wozaɠaazu dɔɔɠuzuʋɛ, naa ɠa kulanuma ve è ya. 19 «À mina naavolo ɠaalɛ ba ɓɔɠɔ ʋɛ zooi ma, ʋɛ ɓaɠaɓaɠaiti ta koikoigi ti aniiti koloɠolosu ná, ta ʋɛ unma nuiti ti pɛlɛiti daaɠalezu ná, ti unmai wo. 20 Kɛlɛ à naavoloi ɠaalɛ ba ɓɔɠɔ ʋɛ geeɠɔlɔgi zu, ʋɛ ɓaɠaɓaɠaiti ta koikoigi ti la ani nɔpɛ koloɠolosu ná, ta ʋɛ unma nuiti ti la pɛlɛiti daaɠalezu ná, ti ʋa unmai wo. 21 Mazɔlɔɔ ʋɛ ɗa-naavoloi ná, miná ɠa è-yii ná ɓalaa. 22 «Nu ɠaazuɠɛzɛiti ta ga eɠɛ lanboi kpusɛi ʋɛ. Naa ɠa é ba, ni è-ɠaazuɠɛzɛiti kɛdɛgɛ, è-ɓusɛi pɛ daa ɠa ve ga wozakalagi. 23 Kɛlɛ ni è-ɠaazuɠɛzɛiti ti la ɠɛdɛni, è-ɓusɛi pɛ daa ɠa ve ga kpidii. Ni wozakalagi nii é è-ɠɔlɔ su, naa ɠa valibona ga kpidii, naama ɓidii è su, daawɔɔlɔʋɛ ɗɛ! 24 «Nu nɔpɛ ge la zooga botii ɠɛɛzu maliɠi felegɔ ʋɛ ʋɔɔma. Kɛni nɔ é gila wɔinzeɠe, é zɔi nɛɛ ʋɛ, ɓaa é ɠili zɔi ʋa kpaan, é zɔi ʋɛlɛlala. Wo la zooga botii ɠɛɛzu GALA ta naavoloi ʋɛ ʋɔɔma. 25 «Naa ɠa é ba, nà bosu wo ma ga: À mina yiizoolɛ ga ɠɔnɔgi ma vaa ɓaa wo ɓɔɔle anii ma vaa, niiti wo ɓɛdɛi ti ʋa wo ʋa zɛnvui wo, ɓaa maaɠili zɔɔlaiti wo-ɓusɛi vaa zu. Nu yɛnvui la leʋeni ɠɔnɔgi ʋa ɓaa? Nu ɓusɛi la leʋeni maaɠili zɔɔlaiti ba ɓaa? 26 À wɔniiti pɛtɛ dɛɛ. Ti la molo vazasu, ti la molo leʋezu, ti la ti-ɠɔnɔ gaalɛɛzu ba kota zu. Tama wo-Ɠɛɛ nii é geeɠɔlɔgi zu, naa ɠa ti ɠɔnɔkulazu. Wo la vizɔni wɔniiti ba ɓaa? 27 Tɔun vɔlɔ wo zaama, ɓɛ ɠa a zoo ná-ziizoolɛi zu, é ta ɓɔ sii ma voloiti ba? 28 «Lee vaa zu wo yiizoolɛzu ga maaɠili zɔɔlaiti fai? À pɛtɛ ʋelei tufa ʋuaiti ti wɔɔlɔzu la. Ti la botii ɠɛɛzu, ti la ɓalaa seɠe vɛlɛzu. 29 Tama nà bosu wo ma ga: Anɛɛ Salomɔn ɓɔɠɔi yɛgɛ ná-lɛbiyai pɛ su, kɛlɛ é la ɓɔɠɔ maaɠilini pɛ, é ʋa zeeli ti ɠila kpalaa su. 30 Ni GALA ka dɔɓɔzu lufai maaɠilizu ɠana, nii é ná za, lina é ʋaazu ʋilisu abui zu, é la wo maaɠilia, é ʋa leʋe tufai ʋa ɓaa? Ee, wa-ɠidaaleʋei lɔiʋɛ dɛ ɗɛ! 31 À mina yiizoolɛ mu, wo ʋa ɗa ɠɛ ma: ‹Lee ɠa ada mi?› ɓaa ‹Lee ɠa ada kpɔle?› ɓaa ‹Lee ɠa ada ɓɔɠɔ maaɠili la?› 32 Tɔɔzei, GALA kwɛɛtala nuiti ka ta ɗa naama aniiti pɛ gaiziɛ. Wo-Ɠɛɛ nii é geeɠɔlɔgi zu, naa kwɛni ga wo ɓɛdɛi ɠa naati pɛ ba. 33 Kɛlɛ, à GALA ná-masadai ta ná-telebodai ɠaiziɛ mɔunpa, naa ʋoluma naa pɛ ka la maazu, é ve wo ya. 34 À mina yiizoolɛ mu ga lina, lina ɠa yiizoolɛ ga ɓɔɠɔ. Folo ɠilagilagi ná-kpɔlɔi ɠa kula ɠɛ la.