Matthew 9 (TOMA)
1 Yesu lɛɛni keingi ta zu, é ziɛi ɓudɛ, é li ná-taazu. 2 Ti ʋaani pɔ ga kɔlɔsama nui ta, é laani betei zu. Yesu ta-ɠidaaleʋei ɠaai ma, é ɠɛni kɔlɔsama nui ma: «Dòun, zɛbɛzeɠe! Ɗa-ɠotoiti suvaayɛga.» 3 Tama, tɔ kalamɔin tanigaa niiti ti ɠɛni ná, ti ɠisiɛni, ti ɗa ɠɛ ma ɠisu: «Zunui nii ɠa woo ɲɔiti bosu GALA daalɔɠɔma!» 4 Yesu ta-ɠisiɛi ɠwɛɛni, é ɠɛ ti ma: «Lee vaa zu wo kisiɛ ɲɔi naa wosu wo-yiimaʋɛti? 5 Ɓɛgele ɠa boda nɛai, nu ɠɛ ma: ‹Ɗa-ɠotoiti suvaayɛga,› ɓaa nu ɠɛ ma: ‹Wuzeɠe, è ziɛ›? 6 Wa ma, wa kwɛɛ ga nii maaʋele ga zobogi ɠa Nu ná-Doun Zunui ʋɛ zooi ma ga é kotoiti suvaayɛ.» É zɛba é ɠɛ kɔlɔsama nui ma: «Wuzeɠe, è ɗa-ʋetei zeɠe, è li ɗa-ɠoizu.» 7 Zunui naa wuzeɠeni, é li ná-koizu. 8 Bɛbɛi miná ɠaai ma, ti wola luani, ti ɗa lɛbiyai ve GALA bɛ, nii é nii ɠɛɠala zobogi veai nuiti bɛ. 9 Yesu zeɠeni ná, é ɗa li. Siɛgi zu é ɠɛni leʋesu la, é zunui ta ɠaani, é zeini mulu zo nuiti ta-wotii ɠɛɛzuʋɛ, daaseigi ɠɛni ga Matiyo. Yesu ɠɛni ma: «Ʋilɛ pòlu!» Matiyo wuzeɠeni, é ʋilɛ polu. 10 Tɛi Yesu ɠɛni laamiizu pɛlɛi wu, mulu zo nu mɔinmɔin ta kotoba nu mɔinmɔin ti ʋaani, ti ɗa laami, ta Yesu ta ná-kaladopoiti. 11 Faliziɛinti ti miná ɠaai ma, ti Yesu ná-kaladopoiti gaazaɠani, ti ɠɛ ma: «Lee vaa zu wa-ɠalamɔin daamii wosu ta mulu zo nuiti, naa ʋɛɛ kotoba nuiti ba?» 12 Kɛlɛ tɛi Yesu ti woomɛnini, é ɠɛni ti ma: «Zɔiti ti ɠɛdɛgai, naati kpɛdɛ la ɗɔɠɔtɔlɔi ʋa, kɛni seeɓɛ nuiti. 13 À li mu, wo niima wooi ʋoluʋɛ ɠaaɠa, nii GALA ge boni ga: ‹Wɔ̀inʋɛ ga gaazumaawɔinɠai, é leʋe zalaɠaiti ba.› Tɔɔzei nɔ̀un gè la ʋaani ga gè telebo nuiti toli, kɛni kotoba nuiti.» 14 Zan ná-kaladopoiti ti zɛba ti maaɓuɠa Yesu ʋa, ti gaazaɠa, ti ɠɛ ma: «Lee vaa zu gɔun gá Faliziɛinti, gi ɗa zugi zo, tama ɗa-ɠaladopoiti ti la ɗa ga so?» 15 Yesu ti wooɠaaʋoteni, é ɠɛ ma: «Nuiti ti loligai vulu ɠɛɛzuʋɛ, ta zoo ɓaa ti ɠɛ gaazuɠilii zu, siɛgi zu anzazini niinɛi ti ʋa la dɛ? Ɓa-o! Kɛlɛ yeeɠɛɠalai ta ɠa ʋaazu, siɛgi zu ta anzazini niinɛi zeɠe la ti ʋa. Názu ta zugi zo niina. 16 Nu nɔpɛ ge la ɗa ga seɠe zaɠaiti seiɗa ta seɠe ɓuɠa niinɛi. Naa ɠa ɠɛɛna, seɠe ɓuɠa niinɛi ɠa seɠe zaɠai ʋali ga, naama ʋaligai zu ɠa ɗa ɓaɠo ma mɔungi ʋa. 17 Nu la ɗa ga dɔɔ niinɛi ʋu ɓalaa kɔlɔ woole wɔlɔmaiti su. Naa ɠa ɠɛɛna, kɔlɔ woole wɔlɔmaiti ta vuka, dɔɔi ɠa ʋu ya, gooleiti ta ɠoloɠolo. Maanɛɛʋɛ ga dɔɔ niinɛi ʋu kɔlɔ woole niinɛiti su, naazu ti felegɔ ti makɛgɛ ga pagɔ.» 18 Siɛgi zu Yesu ɠɛni naa wosu la ti ma, Zuifu ɠundiɠii ta ʋaani, é ʋilɛ ɲiibiɠa kɔɠɔwu, é ɠɛ ma: «Dòun anzanui zaa ɠani nɔ feya, kɛlɛ ʋa, è yeela ma, toɠa vulu ʋolu.» 19 Yesu ta ná-kaladopoiti ti ʋilɛni polu, ti ɗa li. 20 Anzanui ta ʋaani, nii é kɛɛni ɲama ɠula koozu zeeɓɛi zu ga kona puugɔ maazu felegɔ (12). É maaɓuɠani Yesu ʋa ga poluʋelei, é yeevɔɔɠu ná-seɠei laamaʋɛ ʋa. 21 Tɔɔzei é ɠɛni bosu ɠisu ga: «Ni nà zoona nɔ gè yeevɔɔɠu ná-seɠei ʋa, nà ʋalo.» 22 Yesu latini, tɛi é kaani, é ɠɛni ma: «Dòun anzanu, zɛbɛzeɠe, tɛi è laa dà, è ʋaloa.» Gaamago nɔ, anzanui ʋaloni. 23 Siɛgi zu Yesu zeelini la Zuifu ɠundiɠii ná-pɛlɛi wu, é koole vɛɛ nuiti kaani ta bɛbɛi, ti ɗa zɔngɔi wo. 24 É ɠɛni ti ma: «À zeɠe ʋɛ, tɔɔzei anzanu loungoi la zaani, toɠa ɲiizu nɔ.» Kɛlɛ nuiti ti ɠɛni ɲɛɛɠulazu su. 25 Ti nuiti kulaai ma eteaʋɛ, é lɛɛni pɛlɛi wu, é anzanu loungoi zoni zeei ʋa, naa wuzeɠe. 26 Naama vai ma wooi vazani ná maaɠoolii zu ná pɛ. 27 Tɛi Yesu ɠɛni liizu, gaazuɠole nu felegɔ ʋilɛni polu, ti ɗa kpeei loo, ti ɗa ɠɛ ma: «Davide ná-Doun Zunui, gi ɠaazumaawɔinɠa!» 28 Siɛgi zu é lɛɛni la pɛlɛi wu, gaazuɠole nu felegɔiti ti maaɓuɠani ba. Yesu ɠɛni ti ma: «Wo laaʋɛ da nɛi ga nà zoo gè naa ɠɛ wo ʋɛ?» Ti ɠɛni ma: «Gi laaʋɛ naa la, Màliɠii.» 29 É zɛba é yeevɔɔɠu ti-ɠaazuʋɛti ba, é ɠɛ ti ma: «É ɠɛ wo ʋɛ eɠɛʋelei wa-ɠidaaleʋei la.» 30 Tama ti-ɠaazuʋɛti ti zeɠeni ma gaamanɔ. Yesu ti laa maaɓakpani kpaan, é ɠɛ ti ma: «Nu nɔpɛ ge mina faaɠwɛ niima vai zu pa.» 31 Kɛlɛ ti liini, ti ɗa Yesu ná-fai wo naama yooi zu ná pɛ. 32 Ti ɠula ziɛgi zu pɛlɛi wu, nui tanigaa ti ʋaani pɔ ga inɛ su nu ɠila, é ga ɓoɓoi. 33 Tɛi Yesu inɛgi ɓɛɛni nɔ feya, ɓoɓoi tɔɔzeini ga é ɗa ɓɔɛ. Bɛbɛi wola laavɔɔni, ti ɗa ɠɛ ma: «Kaipa nii ɠɛɠala vai ta la dɛ ɠɛɛni Izilayɛle yooi zu.» 34 Kɛlɛ Faliziɛinti ti ɠɛni ɠɛɛzu ma: «Inɛ kundiɠii ná-zobogi ɠa é inɛgiti kpɛɛzu la.» 35 Yesu ɠɛni leʋeteʋesu taa goiti ta taa wolaiti pɛ su, é ɗa kalagi wo ta-ƓALA dɛbi ʋɛlɛiti bu, é ɗa GALA ná-masadai ma Woo Niinɛ Ʋagɔi laazeeli, ta é ɗa seeɓɛi ta maalɛɠɛfɛgi ma zii pɛ kɛdɛ. 36 É bɛbɛi ɠaai ma, ti maawɔin soni, tɔɔzei ti ɓɔlɔni, ti iɲɔteʋeai eɠɛ baalagi niiti makɛ nu la ti ʋɛ. 37 Yesu zɛba é ɠɛ ná-kaladopoiti ma: «Molo mɔɔi wola zuwɔɔlɔʋɛ, kɛlɛ botiɠɛ nuiti ti la mɔinni. 38 À kpala kɛɛ nui maanɛɛnɛ mu, é botiɠɛ nuiti teʋe ná-molo leʋezuʋɛ.»