Mark 2 (TOMA)
1 Foloi tanigaa ɠulaai ma su, Yesu ɠaleni ma Kapɛɛlɛnawume. Nuiti ti mɛnini ga toɠa pɛlɛi wu. 2 Bɛbɛ wolai ɠaalɛɛni ba ná, ti yɛ mɔinzu, nu losu nɔpɛ ge la mɔ ɠɛni ná, anɛɛ pɛlɛlaʋɛ ɓɔɠɔi. Yesu ɠɛni ná, é ɗa GALA daawooi laazeeli ti ma. 3 Nui tanigaa ti ʋaani pɔ ga kɔlɔsama nui ta, seɠeai zunu naanigɔ ʋɛ. 4 Kɛlɛ ti la ɠɛni zooni ti ʋa zeeli la Yesu ma, tɔɔzei bɛbɛi mɔin ʋelei ʋa. Ti zɛba ti lɛ pɛlɛ ɠɔmaʋɛ, ná ga dooɠo bosuʋɛ, ti ná ta ʋaaleʋe, é zoloo nɔ Yesu letegi ma tein, betei nii kɔlɔsama nui ɠɛni laani su, ti naa yei. 5 Yesu ta-ɠidaaleʋei ɠaai ma, é ɠɛni kɔlɔsama nui ma: «Dòun, ɗa-ɠotoiti suvaayɛga.» 6 Tama, tɔ kalamɔin tanigaa ti ɠɛni zeini ná, naati ti ɠɛni ɠisiɛzu yiimaʋɛ, ti ɗa ɠɛ ma: 7 «Lee vaa zu zunui nii zoosu é ɗa ɓɔɛ ɠani? Woo ɲɔu ɠa ga nuu é bosu GALA daalɔɠɔma! Ɓɛ ɠa a zoo kotoiti suvaayɛsu, é ɠula GALA gila kpe polu?» 8 Gaamago Yesu ta-ɠisiɛi ɠwɛɛni yiimaʋɛ, é ɠɛ ti ma: «Lee vaa zu wo ɠisiɛzu ɠana wo-yiimaʋɛti? 9 Ɓɛgele ɠa boda nɛai, nu ɠɛ kɔlɔsama nui ma: ‹Ɗa-ɠotoiti suvaayɛga,› ɓaa nu ɠɛ ma: ‹Wuzeɠe, è ɗa-ʋetei zeɠe, è ziɛ›? 10 Wa ma, wa kwɛɛ ga nii maaʋele ga zobogi ɠa Nu ná-Doun Zunui ʋɛ zooi ma ga é kotoiti suvaayɛ.» É ɠɛni kɔlɔsama nui ma: 11 «Ɗa ɠa gè ɓɔɛzu è ʋɔ, wuzeɠe, è ɗa-ʋetei zeɠe, è li ɗa-ɠoizu.» 12 Gaamago nɔ, zunui naa wuzeɠeni, é ná-betei zeɠe, ɛsɛ pɛ gaazuyɛ ba, é ɠula, é ɗa li. Ɛsɛ pɛ daavɔɔni, ti ɗa lɛbiyai ve GALA bɛ, ti ɗa ɠɛ ma: «Kaipa ade la dɛ nii ɠɛɠala vai ta ɠaani.» 13 Yesu liini mɔnɔ ga ziɛ wolai laa ʋelei. Bɛbɛiti ti ɠɛni daaɠomisu, é ɗa naati kala. 14 Siɛgi zu é ɠɛni leʋesu la, é Alefé ná-doun zunui Levi ɠaani, é zeini mulu zo nuiti ta-wotii ɠɛɛzuʋɛ. Yesu ɠɛni ma: «Ʋilɛ pòlu!» Levi wuzeɠeni, é ʋilɛ polu. 15 Tɛi Yesu ɠɛni laamiizu Levi ná-pɛlɛi wu ta ná-kaladopoiti, mulu zo nu mɔinmɔin ta kotoba nu mɔinmɔin ti ʋaani, ti ɗa laami ta tiye, tɔɔzei ti wola mɔinni, ti ʋilɛ polu. 16 Tɔ kalamɔin niiti ti Faliziɛinti ta-ɠuɠui zu, naati ti kaai ma ga Yesu ɠa daamii wosu ta mulu zo nuiti, naa ʋɛɛ kotoba nuiti ba, ti ná-kaladopoiti gaazaɠani, ti ɠɛ ma: «Lee vaa zu ti daamii wosu ta mulu zo nuiti, naa ʋɛɛ kotoba nuiti ba?» 17 Tɛi Yesu ti woomɛnini, é ɠɛni ti ma: «Zɔiti ti ɠɛdɛgai, naati kpɛdɛ la ɗɔɠɔtɔlɔi ʋa, kɛni seeɓɛ nuiti. Gè la ʋaani ga gè telebo nuiti toli, kɛni kotoba nuiti.» 18 Yeeta Zan ná-kaladopoiti ta Faliziɛinti ti ɠɛni zugi zosu. Nui tanigaa ti ʋaani, ti Yesu ɠaazaɠa, ti ɠɛ ma: «Lee vaa zu Zan ná-kaladopoiti ta Faliziɛinti ta-ɠaladopoiti ti ɗa zugi zo, tama ɗa-ɠaladopoiti ti la ɗa ga so?» 19 Yesu ti wooɠaaʋoteni, é ɠɛ ti ma: «Nuiti ti loligai vulu ɠɛɛzuʋɛ, ta zoo ɓaa ti zugi zo, siɛgi zu anzazini niinɛi ti ʋa la dɛ? Ni anzazini niinɛi ɠa dɛ ti ʋa, ti la zooga ti ʋa zu so. 20 Kɛlɛ yeeɠɛɠalai ta ɠa ʋaazu, siɛgi zu ta anzazini niinɛi zeɠe la ti ʋa. Názu ta zugi zo niina.» 21 «Nu nɔpɛ ge la ɗa ga seɠe zaɠai zulaɠaga ga seɠe ɓuɠa niinɛi. Naa ɠa ɠɛɛna, seɠe ɓuɠa niinɛi ɠa seɠe zaɠai ʋali ga, naama ʋaligai zu ɠa ɗa ɓaɠo ma mɔungi ʋa. 22 Nu la ɗa ga dɔɔ niinɛi ʋu ɓalaa kɔlɔ woole wɔlɔmaiti su. Naa ɠa ɠɛɛna, dɔɔ niinɛi ɠa kɔlɔ woole wɔlɔmaiti fuka, dɔɔi ɠa ʋu ya, gooleiti ɓalaa ti ɠoloɠolo. Dɔɔ niinɛi maanɛɛʋɛ, é ʋu kɔlɔ woole niinɛiti su.» 23 Yeeta, dooɠo foloi, Yesu ɠɛni leʋesu molo ɓalagiti su. Ná-kaladopoiti ti ɠɛni ziɛzu, ti tɔɔzeini ga ti ɗa molo ɠɔpɔgiti gaaʋolososo. 24 Faliziɛinti ti ɠɛni ma: «Wɛlɛna ɗa-ɠaladopoiti ba! Lee vaa zu ti naa ɠɛɛzu, nii tɔgi la vaani bu ga nu kɛ dooɠo foloi?» 25 Yesu ti wooɠaaʋoteni, é ɠɛ ti ma: «Kaipa wo la dɛ naa ɠalani, nii Davide kɛɛni, siɛgi zu pului soni da ta siɛɲɔɠɔiti, tama daamiani ge la ti ya? 26 É lɛɛni GALA ná-seɠe ʋɛlɛ ɲadegai wu, zalaɠa ɠula ɠundiɠi wolai Aɓiataal ná-yeeɠɛɠalai, é ɓuluiti mi, ti veai GALA bɛ, é ta ve siɛɲɔɠɔiti zea, tama tɔgi deveni ga zalaɠa ɠula nuiti gila kpe nɔ ɠa ta ɓului naati mi.» 27 Naa ʋoluma, Yesu ɠɛni ti ma mɔnɔ: «Dooɠo foloi ɓɛtɛʋɛ nui vaa ma, kɛlɛ nui la ɓɛtɛni dooɠo foloi vaa ma. 28 Naa ɠa é ba, Nu ná-Doun Zunui ɠa vɔlɔ é ga dooɠo foloi Maliɠii.»