Nehemiah 8 (TOMA)

1 Ti pɛ ti ɠaalɛɛni ba Zeluzalɛme ɠi gilagi zu, ti zeini lawugi zu, nii é Ziɛ Ziɠidaʋɛ ɠakalaʋɛ. Ti ɠɛni sɛʋɛ ɠɛ nui Ɛsedalase ma, é ʋa ga Moize ná-tɔ sɛʋɛi, nii Ɠɔoɠɔ GALAGI feai Izilayɛle ya. 2 Alugi lɔfelasiɛi ma volo mɔungi ma, zalaɠa ɠula nui Ɛsedalase ʋaani ga tɔ sɛʋɛi bɛbɛi ɠakala nii gaalɛai ba, zinaa ta anzaa, niiti ta zoo naa ɠaaɠaazu, nii ti mɛnisu. 3 É tɔ sɛʋɛi ɠalani ti ʋɛ, é tɔɔzei sobui, eyɛsu foloi gaalɔ, é loni ada ɠilagi lawugi zu, nii é Ziɛ Ziɠidaʋɛ ɠakalaʋɛ. Nuɓusɛiti kpein goiloga ɠɛni de ga pagɔ, zunuiti ta anzanuiti, naa ʋɛɛ naati kpein ba, ta zoo faa ɠaaɠaazu. 4 Ti Ɛsedalase losuʋɛ ɓɛtɛni ga gului, gaalɛbai naama vai zu, miná ɠa é ɠɛni loni ná. Nui niiti ti ɠɛni loni zeezazuʋɛ, naati kaa: Matitia, Sema, Anaya, Ilii, Yilikiya, ta Maaseya. Zɔiti ti ɠɛni loni ga kɔʋɛzu ʋelei, naati kaa: Pedaya, Misayɛle, Malikiya, Ɠasume, Ɠasebadana, Zakali, ta Mesulame. 5 Ɛsedalase sɛʋɛi laalaoni nuɓusɛiti pɛ gaazu, tɔɔzei gaaɠoozani nuɓusɛi pɛ ba. É daalaogai ma, ɛsɛ pɛ ge kaani, ti wuzeɠe, ti lo. 6 Ɛsedalase Ɠɔoɠɔ GALAGI mamani, nuɓusɛiti pɛ ti-yeeiti tɛɛni geezuʋɛ, ti gooɠaaʋote, ti ɠɛ ma: «Amina-o! Amina!» Naa ʋoluma ti maayeini zooi ma, ti nɔkɔ Ɠɔoɠɔ GALAGI wu. 7 Ti ɠaalɔni, Levi nui niiti ka ti ɠɛni nuɓusɛiti kalasu ga tɔ sɛʋɛi zu wooiti: Zozuwe, Ɓani, Seleɓia, Yamin, Akuɓe, Saɓetayi, Wodiya, Maaseya, Kelita, Azalia, Yozaɓade, Ɠanan, Pelaya. 8 Ti ɠɛni GALA ná-tɔ sɛʋɛi ɠalasu gaaɠala fo, ti ɗa poluʋɛ zuɠula nuiti ma, nii a kɛ naati ti gaaɠa ga pagɔ. 9 Nuɓusɛiti ti tɔ sɛʋɛi zu wooiti mɛnigai ma, ti pɛ ti ɠɛni wɔlɔzu. Názu ɠa Neɠemi, nii é ɠɛni ga kundiɠii, ta Ɛsedalase é ga zalaɠa ɠula nui ta sɛʋɛ ɠɛ nui, naa ʋɛɛ Levi nuiti ba, niiti ti ɠɛni nuɓusɛiti kalasu, ti ɠɛni la nuɓusɛiti pɛ ma: «Za voloi ɠa ga Ɠɔoɠɔ GALAGI nɔnɔ, nii é ga wa-ƓALAGI. É la zolooni ga wo ʋa ɠɛ gaazuɠilii zu, wo ʋa ɗa wɔlɔ.» 10 Ɛsedalase ɠɛni ti ma ʋolu: «À liina wa-ʋɛlɛiti bu, wo daamiani pagɔiti mi, wo kpɔleɓɔle gani pagɔiti kpɔle, wo ta ve naati bɛ, niiti ta ɠɛʋele la ɓɛtɛni ti ʋɛ ta-ʋɛlɛiti bu. Mazɔlɔɔ za voloi ɠa ga ade-Maliɠii nɔnɔ, à mina ɠaazuɠili pa! Koozunɛɛi nii Ɠɔoɠɔ GALAGI feezu, naa ɠa é ga wo-zɛbɛi.» 11 Levi nuiti ti ɠɛni nuɓusɛiti pɛ gaanɛɛnɛzu, ti ɗa ɠɛ ma: «À maaɠɛ kpɔ, mazɔlɔɔ za voloi ɲadegɛ, à mina ɠaazuɠili.» 12 Nuɓusɛiti pɛ ti liini, ti daamii wo, ti ɗa ti ɠɔnɔgiti gaaɠwɛ ʋa ta niiti ani la ti ya, ta ti ɗa ɠoozunɛ ga gola. Mazɔlɔɔ ti naama wooiti pɛ gaaɠaani, nii ti suɠulani ti ma. 13 Foloi velesiɛi pɛlɛyeɠe ɠundiɠiiti kpein, ta zalaɠa ɠula nuiti, ta Levi nuiti ti ɠaalɛɛni ba sɛʋɛ ɠɛ nui Ɛsedalase ʋɔ bɛ, nii a kɛ ti tɔ sɛʋɛi zu wooiti kala ga pagɔ. 14 Ti kaani tɔ sɛʋɛi naa zu, nii Ɠɔoɠɔ GALAGI feeni Moize ya, ga Izilayɛle nuiti maanɛɛni ti ɗa ɲi kotaiti bu, kota vɛtii ma voloiti pɛ daawu, alugi lɔfelasiɛi ma. 15 Fɛti naa ɠula vai zu, kɛni ti zeze ta-laa wolaiti pɛ su, ta Zeluzalɛme, ti ɠɛ ma: «À ɠula, wo lɛ gizei zu, wo ʋa ga wolive wului ma laagiti, nii siingai ta nii é dɔɓɔi zu, wo ʋa ga milɛte daagi ta dɔɔ wului ma laagi, naa ʋɛɛ gulu ɓiiliiti gaalaagiti ba, nii a kɛ wo kotaiti to, ʋelei sɛʋɛai la.» 16 Nuɓusɛiti ti ɠulani, ti ʋa ga daaiti, ti kotaiti to, tanigaa ti to ta-ʋɛlɛ ɠɔmaʋɛ, ná ɓɛtɛai ga dooɠo bosuʋɛ, tanigaa ti to ta-ɠoi zaamaʋɛ, tanigaa ti to GALA sei ʋɛlɛi ma ɠoizuʋɛ, ta lawugi zu nii é Ziɛ Ziɠidaʋɛ ɠakalaʋɛ ta lawugi zu nii é Efelayime Ziɠidaʋɛ. 17 Nuɓusɛi niiti kpein ti ɠulani duɔlai zu, ti ʋa, ti pɛ ti kotaiti toni, ti ɗa ɲi ti wu. É zo Nun ná-doun zunui Zozuwe ná-siɛgi ma, é zeeli nuuma voloi ma, Izilayɛle la ɠɛni dɛ kɛɠala vɛti ɠulani. É ɠɛɛni ga koozunɛ vaa wola. 18 Fɛtii ma voloi ɠilagilagi kpein ti ɠɛni GALA ná-tɔ sɛʋɛi zu wooi ta ɠalasu, fɛtii yɛni ga folo lɔfela, foloi lɔsaʋasiɛi ti gaalɛba wolai ɠɛ, eɠɛʋelei deveai la tɔgi zu.

Nehemiah 8 (TOMA)

In Other Versions