Numbers 24 (TOMA)

1 Ɓalaame pɛtɛni ga nɛɛʋɛ Ɠɔoɠɔ GALAGI ʋɛ ga tuyai loo Izilayɛle ʋɛ, é la mɔ ɠɛni liini kulakɛlɛma ɠili gaiziɛzu, eɠɛ pelegi é ɠɛni kɛɛzu la zɔɔma ziɛgiti su, kɛlɛ é ɠaazu latini teʋebai letema ʋelei. 2 É ɠaazuwuzeɠeni, é Izilayɛle ɠa ʋuuni, eɠɛʋelei ná-bolodaiti ti la. Názu ɠa GALA Zɛnvui yeini la tɔun ma. 3 Ɓalaame faalaalii nii laazeelini, é ɠɛ ma:«Ɓeyɔɔl ná-doun zunui Ɓalaame ná-keela wooi ɠaa,zunui nii gaazuzeɠeai ma, ná-keela wooi ɠaa, 4 nui nii é GALA gooiti mɛnisu, naa ná-keela wooi ɠaa,é Zɛbɛi-Pɛ-Maliɠii ná-kulakɛlɛmai ɠaazu,siɛgi zu é loozu la suɠili, gaazuzeɠe ma: 5 Ee Zakɔɓe, ɗa-zeɠe ɠotaiti wola ʋagɛ,ta è-ɲiizuʋɛti ɓalaa, Izilayɛle! 6 Ti ɗa yei ga zuviega eɠɛ laasamagiti,eɠɛ kpeleiti, ti ziɛ ɠobaʋɛ,eɠɛ alɔwɛ gului, Ɠɔoɠɔ GALAGI siingai,eɠɛ sɛdele gului, ti ziɛlaʋɛ. 7 Ziɛi ɠa yeizu, é ɗa ɠula seizuʋɛ,ziɛ mɔinmɔingiti ta ná-ani zuwuiti fae.Ná-masagi ɠa zobogi zɔlɔɔ Agage ma,ná-masadai zɛbɛi ɠa wɔɔlɔ. 8 GALA ge kulaʋɛ Ezipete yooi ʋa,teɠui zɛbɛi ɠɛɠalai ɠa é zea,toɠa zobo sɔlɔɔ ziiti ma, ti ga sili nuiti,é ti-ma ɠaeiti golowolo,é ti zɔ ga ná-mɛɛinti. 9 Toɠa ɓili, é ʋɛɛ eɠɛ zala zinɛi,eɠɛʋelei zala zaai la,ɓɛ ɠa a kata ga é wuzeɠe?Nui nii a tuya loo è ʋɛ, tuya ɠa naa ʋɛ,nui nii a è voovo, foovooi ɠa naa zo.» 10 Ɓalake yiiɠaawanani Ɓalaame ma, é yealoɠani, é ɠɛni Ɓalaame ma: «Gè è loligɛ ga è ʋa, è sìli nuiti foovo, wɛlɛ, ná zeizu ɠɛa saʋa, è ɗa tuya loo ti ʋɛ. 11 Tɛi é ɠɛa ɠana, liina ɗa-yooi zu! Gè boni ga nà faanɛɛ mɔinmɔin kɛ è ʋɛ, kɛlɛ Ɠɔoɠɔ GALAGI è ʋalagɛ faanɛɛiti sɔlɔɔ fai ma.» 12 Ɓalaame Ɓalake wooɠaaʋoteni, é ɠɛ ma: «Gè ɓɔɛni ɠani keelaiti pɔ, è ti leʋeni mà: 13 ‹Anɛɛ ni Ɓalake ɠa ʋaazu ga walii ta zanugi, nii é ná-masa pɛlɛi laavegai, é fe zèa, gè la zooga faa nɔpɛ kɛɛzu ga ma ʋagɔ, ɓaa ma ɲɔu, Ɠɔoɠɔ GALAGI ná-devei laalɔɠɔma. Nà naa nɔ wo, nii Ɠɔoɠɔ GALAGI a bo mà.› 14 Niizu nà ga li nà-nuɓusɛiti pɔ. Ʋa, nà naa lɛɛzu ga ɗe, nii Izilayɛle nuɓusɛiti ti ʋaazu kɛɛzu ga ɗa-nuɓusɛiti, yeeɠɛɠalaiti su ti ʋaazu.» 15 Ɓalaame faalaalii nii laazeelini, é ɠɛ ma:«Ɓeyɔɔl ná-doun zunui Ɓalaame ná-keela wooi ɠaa,zunui nii gaazuzeɠeai ma, ná-keela wooi ɠaa, 16 nui nii é GALA gooiti mɛnisu, naa ná-keela wooi ɠaa,nii é Anii-Pɛ-Unda ná-faaɠwɛgiti feai zea,é Zɛbɛi-Pɛ-Maliɠii ná-kulakɛlɛmai ɠaazu,siɛgi zu é loozu la suɠili, gaazuzeɠe ma: 17 Nà pɛtɛsu, kɛlɛ niizu laade dɛ,nà sumɔsu, kɛlɛ maa la dɛ ɓuɠani,ʋelela ʋelei, somideɠai ta ɠa ɠulazu Zakɔɓe mavofodai zu,masadai ma lukpɔi ɠa ɠɛ Izilayɛle zaama,nii a ɠɛ Moaɓe nuiti goizuloɠazu,toɠa Sɛte ná-doun zunuiti kpein doɠa tɔungi zu. 18 Toɠa Edɔme yooi zo, é ɠɛ ga nɔnɔ,sili nuiti su, Seyiil yooi ɠa zo,Izilayɛle ɠa ná-zeeɠaaɓaai lɛ. 19 Nui nii é ɠulazu Zakɔɓe mavofodai zu, naa ɠa masadai ɠɛ,toɠa naati undaaʋili, niiti ti ʋelazu, ti ɠula taaiti ba.» 20 Ɓalaame Amalɛke ɠaani. É faalaalii nii laazeelini, é ɠɛ ma:«Amalɛke ɠa é ga ziiti pɛ ti-ma mɔungi.Kɛlɛ gaaɓelasu, toɠa ɠoloɠolosu.» 21 É Ken nuiti kaani. É faalaalii nii laazeelini, é ɠɛ ma:«È-zeizuʋɛ logɛ kpe,è-laɠagi logɛ fasa ɠizei ma. 22 Kɛlɛ Ken nuiti ta ɠɛ ga abui laamianigi.Gaaɓelasu, Asuul nuiti ta li ga woye, ti wo ɠɛ ga kasoɠa nuiti.» 23 Gaaɓelasu, é faalaalii nii laazeelini, é ɠɛ ma:«Ee, maanɔɠɔi nii é ʋaazu! Ɓɛ ɠa a yɛ vulua GALA ná-kɛɛwotii luɠɔ? 24 Kɛlɛ keingiti ti ziɛi ɠa, ti ʋaazu, ti zeɠe Kitime,ta Asuul nuiti maanɔɠɔ, ti Eɓɛɛl nuiti maanɔɠɔ.Tɔ ɓalaa toɠa liizu undaaʋiligi zu.» 25 Ɓalaame liini, é ɠale ma ná-zooi zu. Ɓalake ɓalaagi liini ga ʋɔ pelei.

Numbers 24 (TOMA)

In Other Versions