Numbers 6 (TOMA)
1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɓɔɛ Izilayɛle nuiti pɔ, è ɠɛ ti ma: Siɛgi zu zunui ta, ɓaa anzanui ta ɓɔɠɔ ɠalivaazu la Ɠɔoɠɔ GALAGI ʋɛ, é ɓɔɠɔ ɠalivaa minazeɠegi wo, 3 kɛni é ɓɔɠɔ zo, é mina dɔɔ ɓɔle, ɓaa kpɔɔle ani nɔpɛ a nu ɠaazulati, é mina dɔɔ laɓa ɓɔle, anɛɛ kpɔɔle ani laɓai ta ma zii nɔpɛ nii a nu zo, é mina leezɛin ma ɗɛi ta ɓɔle, é mina leezɛin ta mi, ma wundui ɓaa ma vɔɔi. 4 Eyɛsu kalivaa ziɛgi ɓe, é mina leezɛin ʋaalobazuʋɛ tanɔpɛ mi, é zo ma ɠaei ma, é li ma ɠɔlɔ pɔ. 5 «Naama yeeɠɛɠalai kpein daawu, niiti kalivaai ti zu Ɠɔoɠɔ GALAGI ma, nɔungi mina wo, eyɛsu naama yeeɠɛɠalaiti daazeeli, toɠa ɲade niina, é nɔundeɠai ta kpɛlɛiti zɛ ná. 6 «Yeeɠɛɠalai kpein daawu, é deveai ga é ɓɔɠɔ ɠaliva Ɠɔoɠɔ GALAGI ma, é mina maaɓuɠa nu ʋooma ʋa. 7 É mina ɓɔɠɔ ɠɔzɔ tɔgi letemazu, kɛɛɠɛ ʋɛ, ɓaa dee, ɓaa kɛɛɠɛloun zunu ʋɛ, ɓaa baazeela ʋɛ, ni naa ta a zaana, mazɔlɔɔ ná-kalivaa vai GALA ma, naama ʋoogi ɠa unmaʋɛ. 8 Kalivaa ziɛgi kpein daawu, toɠa ga nu ɲadegai Ɠɔoɠɔ GALAGI ʋɛ. 9 «Ni nui ta a zaana koba kpaun, nɔungi é kalivaai, naa ɠɔzɔa, toɠa nɔungi wo ta kpɛlɛi, folo lɔfelasiɛi ma, ná-ɲade foloi. 10 Foloi lɔsaʋasiɛi, toɠa li ga kpumago felegɔ ɓaa poopo kpokpa felegɔ zalaɠa ɠula nui ʋɔ, GALA daaɠomi seɠe ʋɛlɛi laaʋɛ. 11 Zalaɠa ɠula nui ɠa gila kula ga koto gba zalaɠai, é zɔi ɠɛ ga gala zalaɠai, kotoi kɛai ga é yeevɔɔɠu poomai ʋa, naa gbaai ɠana. Naama voloi nɔ zu, toɠa nɔungi ɠaliva mɔnɔ ga niinɛ. 12 Toɠa ɓɔɠɔ ɠaliva ʋolu ga niinɛ Ɠɔoɠɔ GALAGI ma, ná-kalivaa yeeɠɛɠalaiti faa zu é ɠɛa deveni. Toɠa kona gila baala sinɛi ɠula ga faazuɓɛtɛ zalaɠai. Foloiti ti leʋegai, é mina mɔ naati gaalu, tɔɔzei ná-kalivaa voloiti ti ɠɔzɔni. 13 «Tɔgi ʋɛtɛ é ʋilɛ ɓɔɠɔ ɠalivaa vai ʋa: Foloi ná-kalivaa vai ɓesu la, naama voloi ta ʋaa la GALA daaɠomi seɠe ʋɛlɛi laaʋɛ. 14 Toɠa ná-zalaɠai ɠula Ɠɔoɠɔ GALAGI ʋɛ: kona gila baala sinɛ ɠila, nii nɛɛʋuzu la ba, naa ɠa ɠɛ ga gala zalaɠai, ta kona gila baala saa ɠila, nii nɛɛʋuzu la ba, naa ɠa ɠɛ ga koto gba zalaɠai, ta baala sinɛ wolai, nii nɛɛʋuzu la ba, naa ɠa ɠɛ ga ziilɛi zalaɠai. 15 Ɓului lɛʋɛ la su, toɠa ʋa ɓalaa ga naama ɓɔlɔgi: ɓului kpɛtɛai ga ɓulu vukɔ ʋagɔi, gaayɔgai ga gulɔi, ta ɓulu lɛɛvɛiti lɛʋɛ la su, gulɔi ʋuai ma, é ɓɔ ta-vebɛ zalaɠaiti ba, ta ta-ʋuya zalaɠaiti. 16 Zalaɠa ɠula nui ɠa ʋa ga ti pɛ Ɠɔoɠɔ GALAGI ɠakala, é ná-koto gba zalaɠai ɠula, ta ná-gala zalaɠai. 17 Toɠa baala sinɛ wolai ɠula ga ziilɛi zalaɠai Ɠɔoɠɔ GALAGI ʋɛ, ta ɓului lɛʋɛ la su, naama ɓɔlɔgi, é kpɔ ná-vebɛ zalaɠai ʋa ta ná-puya zalaɠai. 18 Nui kalivaai, naa ɠa nɔungi wo, GALA daaɠomi seɠe ʋɛlɛi laaʋɛ. Toɠa nɔundeɠai zeɠe ta kpɛlɛi, é ti ʋili abui ɠa, nii é ziilɛi zalaɠai wu. 19 Zalaɠa ɠula nui ɠa baala sinɛ wolai ma ɓakigi zeɠe, nii giliai, ta ɓulu ɠila lɛʋɛ la su, ta ɓulu lɛɛvɛ ɠila lɛʋɛ la su, é fe nui naa ya, nii é ɓɔɠɔ ɠalivaai, naa a ɓena ga nɔungi wo. 20 Naa ʋolu, zalaɠa ɠula nui ɠa ti latɛɠɛ vai ma ʋoogi ɠɛ Ɠɔoɠɔ GALAGI ɠaazu. Daamianigi naati ɲadegɛ, ta ɠɛ ga zalaɠa ɠula nui nɔnɔ, é ɓɔ ma ɠekegi ta ma ɓalai ʋa, niiti ti ɠula ga datɛɠɛ vai ma ʋoogi. Naa ɠɛa ʋoluma, nii é ɓɔɠɔ ɠalivaai, naa ɠa zoo é dɔɔi ɓɔle niina. 21 «Tɔgi ɠana é ʋilɛ naama nui ʋa, nii é ɓɔɠɔ ɠalivaazu, é minazeɠegi ɠɛai, nii maanɛai é kula ga zalaɠai Ɠɔoɠɔ GALAGI ʋɛ kalivaa vai zu, gaalu ge la naa ʋa, nii a ɠɛ ga faanɛɛi ma zobogi bɛ ga é kɛ. Toɠa kɛ eɠɛʋelei a minazeɠe la, é ɓɔ naa ʋa, nii tɔgi bogai, é ʋilɛ nui ɠalivaa vai ʋa.» 22 Ɠɔoɠɔ GALAGI ɓɔɛni Moize ʋɔ, é ɠɛ ma: 23 «Ɓɔɛ Aalɔn ta ná-doun zunuiti pɔ, è ɠɛ ti ma: ‹Wɛlɛ, ʋele ɠa wa ɠɛ tuya loozu la Izilayɛle nuiti bɛ, wa ɠɛ ti ma: 24 Ɠɔoɠɔ GALAGI tuya loo wo ʋɛ, é wo makɛ! 25 Ɠɔoɠɔ GALAGI yeezei wo wu ga pagɔ!É zaalai la wo ma! 26 Ɠɔoɠɔ GALAGI wɛlɛ wo ma!É ziilɛigi ve wo ʋɛ!› 27 «Zekana ta wooɠula la mà, Izilayɛle nuiti ta-vaa zu, nɔ̀un nà, nà tuya loo ti ʋɛ.»