Proverbs 10 (TOMA)

1 Salomɔn ná-tɛnɛ faalaaliiti. Ɠima loun zunui ɠa ɗa ɠɛ ga kɛɛɠɛ ná-koozunɛɛi,faaɠaaɠalala loun zunui ɠɛ ga dee ná-ziizoolɛi. 2 Naavoloi sɔlɔɔ pelei ɲɔuɗai, é la faa ʋaa eyɛsu pɛ,kɛlɛ nii é ná-eteai ziɛzu telebogi zu, naa ɠa ɗa ɠizo saai ma. 3 Ɠɔoɠɔ GALAGI la telebo nui yɛga na, é ʋa ɓɔlɔ ga pului,kɛlɛ toɠa ɠɛlɛ nu ɲɔi yiima vaiti ba. 4 Zɔi é la yeeʋɛa faa ʋa, naa ɠa ɗa ɠɛ ga bala nu,kɛlɛ zeemaleʋebogi ɠa ɗa nu ɓɛtɛ. 5 Nii é ani ɠaalɛɛzu ba, foɠo undaaɠulazuʋɛ, naa ɠa ga doun zunui, nii keleɠelegai,kɛlɛ zɔi é ɲiizu molo leʋe ziɛgi zu, doun zunui ɠa ga naa, nii ɓaa ɠa ɠula ma. 6 Tuyaiti ta ʋuuni telebo nui unmaʋɛ,kɛlɛ nu ɲɔi laawooiti ta ɗa tooma vai maalɔɔɠu. 7 Telebo nui ná-kizɛsui ɠa ɗa ɠɛ ga tuyai taɠiligaani bɛ,kɛlɛ zeemai ɠa ɗa wo nu ɲɔiti daaseigi ma. 8 Zɔi ɠigi ma ziimaʋɛ, naa ɠa ɗa deveiti so,kɛlɛ nui é kpɔɛzuɠula ɲakaiti bosu, naa ɠa ɗa ɓɔɠɔ loo ya. 9 Zɔi é ziɛzu sɔledai zu, naa ɠa ziɛzu ziilɛigi zu,kɛlɛ zɔi é ziɛzu ga pele zuzeigiti, naa ʋolu ɠa ɠula. 10 Nii é gaamai lɔɔɠuzu bɔɔlaiti ba, naa ɠa ti ɓɔlɔzu,kɛlɛ zɔi é zelii losu ti ma gaamai zu, naa ɠa ʋaazu ga ziilɛigi. 11 Telebo nui laawooiti ta ga zɛnvu ɗɛungi,kɛlɛ nu ɲɔi laawooiti ta ɗa tooma vai maalɔɔɠu. 12 Wɔinzeɠemai ɠa ɗa sakpegi ɠaazo,kɛlɛ nɛɛbɛi ɠa ɗa faaɠaazagi pɛ suvaayɛ. 13 Keleɠele nui laawooi ɠa ɗa ɠɛ ga ɠima ɓɔɛi,kɛlɛ faaɠaaɠalala nui ʋoluʋɛ nɔnɔi ɠa ga kpakɔi. 14 Ɠima nuiti ta ɗa faaɠwɛgi ɠaalɛ ba,kɛlɛ siɛgi zu faaɠaaɠalala nui ɓɔɛzu la, maanɔɠɔi maa la mɔ ɠoozani ba. 15 Kpɛtɛ nui yeaɠɔligi ɠa bɛ ga taa wolai siɠigi ma,kɛlɛ bala nui ná-maawɔin ɠa ɗa koloɠolo. 16 Telebo nui ná-tɔnɔgi ɠa ɗa lo tuɠɔ, é zɛnvui wo,kɛlɛ nu ɲɔi zɔlɔɔgi ɠa ɗa ɠɛ ga faa ɲɔu ɠɛ anii. 17 Zɔi é woilosu tɛnɛ gooi ma, naa zɛnvu ʋelei zeɠea,kɛlɛ zɔi é ɠɛlɛzu zelilomai ʋa, naa ɓɔɠɔ loa ya. 18 Wooveledai ɠana, ɗa wɔinzeɠemai lɔɔɠuna,zɔi é leʋesu ga tɔɠɔ ɠoloɠologi ɠɛa, naa ɠa ga ɠimalala nui. 19 Zɔi é kpɔɛi zuɠulazu gola, é la ɓega tɔ koloɠologi ɠɛɛzu,kɛlɛ zɔi a laaʋɛ zo, naa ɠa ga zunui, nii ɠi pagɔi ma. 20 Telebo nui laawooiti ta ga walii ɲadegai,kɛlɛ tosu la faa ɲɔu ɠɛ nuiti ta-ɠisiɛi ʋa. 21 Telebo nui laawooiti ta ɗa ɓɔ nuɓusɛ mɔinmɔin ba,kɛlɛ ɠimalala nuiti ta ɗa za, tɔɔzei ti ʋalagɛ faaɠaaɠai ma. 22 Ɠɔoɠɔ GALAGI laa luyai ɠa a ɗa kulagaanɛɛzui ve,é la koozuʋili faa nɔpɛ pilɛga polu. 23 Faa ɲɔi ɠɛɛ vai ɠa ga ɠaɠo faa ɠimalala nui ya,eɠɛʋelei ɠimalai ɠɛɛ vai la ga ɠaɠo faa ɠima nui ya. 24 Nii nu ɲɔi luazu ba, naa ɠa a ɗa sɔlɔɔ,kɛlɛ nii telebo nuiti ta wɔin ɠɛ, naa ɠa ɗa ve ti ya. 25 Siɛgi zu tɔngɔlɔ fiilɛi leʋesu da, nu ɲɔi ɠa ɗa ɲɛɛlɛ!Kɛlɛ telebo nui ɠa loni ani ma, nii é ná eyɛsu ɠɔ. 26 Eɠɛʋelei ani ɓodai a ɗa kɛ la ga nu ɲiigai,duului ɓalaa ga ʋuuna nu ɠaazuʋɛ a ɗa kɛ la,zekana ɲaka nui la, naati bɛ niiti ti teʋesu. 27 Ɠɔoɠɔ GALAGI ɠaazuluabai ɠa ɗa nui ná-eteai zuɠooza,kɛlɛ faa ɲɔu ɠɛ nui ná-konagiti su ɠa ɗa ɓuɠa. 28 Telebo nui ná-maaɓɔungi ʋolu ɠa ɠɛ ga koozunɛɛi,kɛlɛ faa ɲɔu ɠɛ nuiti ta-ɠitogi ɠa ɠoloɠolo. 29 Ɠɔoɠɔ GALAGI ná-pelei ɠa ga siɠigi wooɠɛɠila nuiti maaɠoolii zu,kɛlɛ toɠa ga naati koloɠolo saɓui, niiti ti faa ɲɔi ɠɛɛzu. 30 Telebo nui la ɲiikpiga eyɛsu pɛ,kɛlɛ faa ɲɔu ɠɛ nuiti ti la yɛga zooi zu. 31 Telebo nui laaʋɛ ɠa ɗa ɠimalai wo,kɛlɛ yaava nuiti nɛgi ɠa leʋe ga. 32 Telebo nui lakɔlɔgiti ti nuɓɔɠɔlai ɠwɛɛ,kɛlɛ faa ɲɔu ɠɛ nuiti daaʋɛ yaavaʋɛ.

Proverbs 10 (TOMA)

In Other Versions