Proverbs 19 (TOMA)

1 Fizɔgɛ nu ɠɛ ga bala nu, è eteai ziɛ ladalai zu,è ʋa ɠɛ ga faaɠaaɠalala nui, nii zɛai. 2 É la vizɔni nu nɔpɛ ma, é ʋa ʋala faaɠwɛgi ma,zɔi é ɠɔɠɔzuvilɛzu, toɠa ɗa faaɠaazagi ɠɛ. 3 Nui ná-ɠimalalai ɠa ɗa ná-pelei ɠaaʋala ba,é ɗa yiiɠaawana Ɠɔoɠɔ GALAGI ma niina. 4 Naavoloi ɠa ɗa nui wɔɔlai mɔin gola,kɛlɛ bala nui bɔɔlai ɠa ɗa ɠɛlɛ ba. 5 Zɛɛ zeelei zalalalai la yɛga,doɠai la ʋoolaa naa ʋa, nii é zɛɛi vazasu. 6 Nu mɔinmɔin ka ɗa sɔɓelama nui maamusɛ gaazu,ɛsɛ ka pɔ é ɠɛ ga naa bɔɔlai, nii é faanɛɛi ɠɛɛzu. 7 Bala nui la nɛɛni kɛɛɠɛlointi bɛ,ɓaa mu ná-siɛpoluiti, naati ta ɗa maaɠooza ba.Siɛgi zu é wɔinni la ga é ɓɔɛ ti ʋɔ, ti la mɔ koba. 8 È kigaiziɛi maaɠɔli, ɗa naa ɠɛɛzu ɗa ɓɔɠɔi ɗa-undaanɛɛi vaa ma,ɗa ɠilina ɠimalai ʋa, ɗa undaanɛɛi zɔlɔɔ. 9 Zɛɛ zeelei zalalalai la yɛga,zɔi é zɛɛi vazasu, naa ɠa ɓɔɠɔ loozu ya. 10 É la vizɔni ɠimalala nui ma, é ʋa eteai ziɛ gaanɛ zu,sɔnaga duɔi ʋa ɠɛ ga kundiɠiiti deve nu. 11 Nui ná-ɠimalai ɠa a ɗa vɔni da ná-ziiɠulagi ma,toɠa bɛ ga lɛbiya, é ná-faawanamaiti suvaayɛ. 12 Masagi ná-ziiɠulagi maayikiʋɛ eɠɛ zalai zikɔ wooi,kɛlɛ ná-faanɛɛi ɠɛɛʋɛ eɠɛ nɔɗagi, nii é tufai ɠa. 13 Faaɠaaɠalala loun zunui ɠa ga kɛɛɠɛ ná-nimizai.Kpɔɛleʋe anzanui ɠɛɛʋɛ eɠɛ ziɛ goi, nii é ʋilɛsu peinpein maa la leʋezu. 14 Nu ɠa zoo è pɛlɛi ta anii kpein sɔlɔɔ ga pogani è-ɠɛɛni zea,kɛlɛ Ɠɔoɠɔ GALAGI ɠila kpe nɔ ɠa a zoo, é ɠima anzanui ve nu ya. 15 Dɔɔʋɛi ɠa ɗa nui wui ɓɔɠɔ ma,zɔi ɲakaai, pului ɠa so. 16 Nii é devei zosu, naa ɠa ɓaazu zɛnvui maazu,zɔi é la ɠaaɓaazu siɛ ʋelei ma, naa ɠa za. 17 Zɔi a bala nui maawɔinɠa, lɔdɔ kana é feezu Ɠɔoɠɔ GALAGI ya,naa ɠa naa ve zea, nii maanɛai ga é sɔlɔɔ. 18 È-loun zunui maaɠolo gelegele, siɛgi zu kitogi ná la dɛ,kɛlɛ mina wɔin ga paa vaa. 19 Nui ziiɠulazu, kɛni ti ani ɠula zea.Ni ti la ani ɠulani zea, ti zobo fea bɛ ga é tɔɔzei ʋolu. 20 Woilo tɛnɛ gooiti ma, va zelilomai wu,gaaɓelasu, ɗa ɠɛ ga ɠima nu. 21 Nui ɠa ɗa faa mɔinmɔin kɛʋele ɓɛtɛ ná-kisiɛi zu,kɛlɛ Ɠɔoɠɔ GALAGI ná-devei ɠa daa a ɗa zeeli. 22 Nii nuɓusɛi pɔ nui ná-fai zu, naa ɠa é ga wooɠɛɠiladai,kɛlɛ tama, bala nui vizɔgɛ wooʋalada nui ʋa. 23 Ɠɔoɠɔ GALAGI ɠaazuluabai ɠa ɗa ɓɔ nu ʋa, è zɛnvui wo,anii pɛ ge ɠɛ è ya, è kpidiiti siɛ, maanɔɠɔ la zeelia è ma. 24 Ɲaka nui ɠa ɗa yeelɔ daami aniɲakai zu,kɛlɛ dɔɔ vai daaʋɛ, naa ɓaa. 25 Siɛgi zu ti waso nui loɠazu la, zɔi é la dɛ faa mɔinmɔin kwɛni, naa ɠa ɗa ɠi sɔlɔɔ,zelii lo keleɠele nui ma, toɠa faaɠwɛgi zɔlɔɔ. 26 Zɔi é kɛɛɠɛ zopele ɲɔuzu, é dee ɓɛ,naa ɠa ga doun zunui é unfe fai ɠɛɛzu, ta ɓaaɠulama vai. 27 Dòun zunu, ɗa ɓena woilosu kala gooi ma,ɗa ʋoluave faaɠwɛ kpɔɛiti ba. 28 Zeele ɲɔi ɠa ɗa tukpɔɠaaleʋe vai ɠaaʋala ba,faa ɲɔu ɠɛ nuiti daaʋɛ ɠa ɗa telebotalai mi. 29 Tukpɔi ɠɛʋele ɓɛtɛʋɛ ga é loo ɲɛɛɠulasu nuiti ma,doɠa ɓakɔi ɠa ga faaɠaaɠalala nuiti polu zaamaʋɛ nɔnɔ.

Proverbs 19 (TOMA)

In Other Versions