Proverbs 3 (TOMA)

1 Dòun zunu, mina yeema nà-kala gooiti ma,makɛ nà-deveiti ma è-yiimaʋɛ. 2 Mazɔlɔɔ ta ta ʋili ɗa-voloi liegɔiti su, ta è-zii ma ɠonagiti,ti undaanɛɛi ve è ʋɛ. 3 Mina ʋala wooɠɛɠiladai ma, ta gaamai,ti ɠili ɠɔbu, è ti zɛʋɛ è-yiimaʋɛ. 4 Naazu, ɗa zaalai zɔlɔɔ GALA ta nuɓusɛiti zea,è lɔɠɔ ʋagɔi zɔlɔɔ, è leve ga ɠima nui. 5 Ɠaliva Ɠɔoɠɔ GALAGI ma ga è-yiimaʋɛ pɛ,mina ʋoluzei è ɓɔɠɔ ɠeleɠelegi ʋa. 6 Ziimai ɠaiziɛ è-ɠɛɛ vaiti kpein su,toɠa è-ziɛ ʋele ʋagɔiti dɛɛ ga ɗe. 7 Mina ɓɔɠɔ zeɠe ga ɠima nu,lua Ɠɔoɠɔ GALAGI ʋa, è maaɠooza faa ɲɔi ʋa. 8 Toɠa ɠɛ ga kɛdɛyai è-ɓusɛi ʋɛ,ta è-ɠaeiti niinɛ vai. 9 Ɠɔoɠɔ GALAGI lɛbi ga è-zɔlɔɔ gani ʋagɔiti,ta è-zɔlɔɔ ganii ma mɔungiti kpein. 10 Naazu, ɗa-molo ɠotaiti daa ɠa ve gola,ɗa-lɔɔ liɠiiti daa ɠa ve ga dɔɔ niinɛiti. 11 Dòun zunu, mina ɠɛlɛ Ɠɔoɠɔ GALAGI ná-maaɠoloi ʋa,mina ná-zelilomai ʋɛlɛʋɛlɛ. 12 Mazɔlɔɔ nii Ɠɔoɠɔ GALAGI nɛai ʋɛ, naa ɠa a ɗa zelii lo ma,eɠɛʋelei doun kɛɛɠɛi a ɗa kɛ la ná-doun zunui ʋɛ, nii nɛai bɛ. 13 Undaanɛ nu ɠa ga naama zunui, nii é ɠigi zɔlɔɔgai,zunui nii é ga kidafaawu nui! 14 Mazɔlɔɔ kulanumai é sɔlɔɔsu, naa vizɔgɛ walii nɔnɔi ʋa,ná-tɔnɔgi vizɔgɛ zanu kitei ʋa. 15 Fizɔgɛ é leʋe kɔtu zɔngɔ ɓaagi pɛ ba,è yiima anii tanɔpɛ ge la vizɔga ga tɔun kɛʋele. 16 Sii zuɠoozai ɠa ɠimalai yeezai ɠa,kɔʋɛi ɠa, naavoloi ta lɛbiyai ɠa é miná. 17 Peleiti é nu ʋilɛsu ti ʋa, naati pagɛ,ná-peleiti kpein ta ɠomisu undaanɛɛi ʋɔ bɛ. 18 Toɠa ga zɛnvu wului naati bɛ, niiti ti sosu kpe,niiti ti makɛsu ma, naati undaanɛɛʋɛ. 19 Ɠɔoɠɔ GALAGI ná-ɠimalai ɠa é zooi ɓɛtɛni la,ná-keleɠelegi ɠa é geeɠɔlɔgi ɓɛtɛni la. 20 Ná-ɠimalai ʋɔ, zou wu ɗɛiti kulaʋɛ, ti la zooi ma,tonaɓiingiti ti ɗa tonai ʋu. 21 Dòun zunu, ɠili keleɠelegi ʋa, ta kidafaawui,mina zeɠe ti ʋolu eyɛsu ɠɔ. 22 Mazɔlɔɔ ta ɠɛ ga zɛnvu ʋagɔi è ya,ɗa ɠɛ naazu ga zaalamai. 23 Naazu, è ɠisu ɠa ɠala, è ɗa li ga lii ʋele,è-ɠɔɠɔi la ziɠaa. 24 Ni ɗa laana, maaɠili la ɠɛa è ma,ɗa-ɲiimɛnii ɠaaɠaanɛ. 25 È la luaa kulafiliba vaaɓa ba,ɓaa faa zuɠoloɠologi nii a zei nu ɲɔiti ma. 26 Mazɔlɔɔ Ɠɔoɠɔ GALAGI ɠa ɠɛ ga ɗa-ɠitogi,toɠa balii kpein seɠe è luɠɔ. 27 Siɛnɔpɛ su zobogi è ʋɛ la,mina ɠɛlɛ, è ʋa ɓe ɓɔsu naati ba, niiti ti ɓalaai. 28 Mina ɠɛ è-zeiɲɔɠɔi ma:«Li è ʋa ʋolu, lina, nà fe!»Tama anii è ya, nii ɗa fe zea. 29 Mina faa ɲɔu ɓɛtɛ ɠisu, è-zeiɲɔɠɔi laalɔɠɔma,nii tɔun ka zeini kpɛ è ɠoba. 30 Mina nu nɔpɛ sakpe wafuun,ni é la faa ɲɔu nɔpɛ kɛɛni ga ɗe. 31 Mina ɠaazuɠula toosu nuiti ba,è mina ʋokɔɠɔ ti-ziɛ ʋelei ma. 32 Mazɔlɔɔ yaava nuiti maayoseɠeʋɛ Ɠɔoɠɔ GALAGI ʋɛ,kɛlɛ toɠa ɗa ɠoozu vai lɛ ga naati niiti ti zɔlegai. 33 Ɠɔoɠɔ GALAGI ɠa ɗa nu ɲɔi ná-pɛlɛyeɠei voovo,naazu ma, toɠa ɗa tuya loo telebo nuiti seizuʋɛ ʋɛ. 34 Toɠa ɗa ɲɛɛɠula ɲɛɛɠulasu nuiti su,kɛlɛ toɠa ɗa ɠaazu ʋagɔi lo ɓɔɠɔmaayei nuiti ba. 35 Lɛbiyai ɠa a ɠɛ ga ɠima nuiti tɔnɔi,kɛlɛ faaɠaaɠalala nuiti tɔnɔi ɠa ɠɛ ga unfegi.

Proverbs 3 (TOMA)

In Other Versions