Revelation 22 (TOMA)

1 Geezuɠeelai zɛnvu ɗɛ wolai lɛɛni ga ze, é ɗa ʋili, é ɗa ɠula GALA ta Baala Ziʋoi ta-masa kpɔkpɔgi wu, é ɗa volo eɠɛ kɔtui daa ga kilisetalegi, 2 é ɠɛni yeizu taai zaamaʋɛ. Zɛnvu wului ɠɛni loni ziɛ wolai ɠakama felegɔiti, é ɗa waa ga seizu puugɔ maazu felegɔ (12) konagi laawu, alu-o-alu é ɠɛni waazu ná ɠɛ ɠila. Gaalaagiti ka ti ga ziiti kɛdɛ gani. 3 Ani nɔpɛ ge la mɔ ɠɛa ná, nii GALA ná-foovooi ɠa yei ma.GALA ta Baala Ziʋoi ta-masa kpɔkpɔgi ɠa ɠɛ taazuʋɛ, ná-botiɠɛ nuiti ta dɛbi. 4 Ta gaazuʋɛ ɠa, daaseigi ɠa zɛʋɛ ti-loʋalaʋɛti. 5 Kpidi la ʋɛa ná eyɛsu pɛ. Nu ɓɛdɛ la mɔ ɠɛa lanbo zeze nɔpɛ ba, anɛɛ foloi ná-wozakalagi ɓalaa, tɔɔzei Maliɠii GALA ná-wozakalagi ɠa yei ti ma. Ta masadai ɠɛ eyɛsu ɠɔ. 6 Naa ʋoluma geezuɠeelai ɠɛni mà: «Niima wooiti ta ga gaamai, maanɛɛʋɛ nu la ti la. Maliɠii GALA, nii é wooi ʋuuzu GALA goo wo nuiti da, naa ɠa é ná-geezuɠeelai leʋeni, ga é naa lɛ ga ná-botiɠɛ nuiti, nii maanɛai é ɠɛ fala.» 7 Yesu ɠa ɠɛɛzu ma: «Wɛlɛ, nà ʋaazu fala!»Undaanɛ nu ɠa ga naama nui, nii é ziɛzu ga niima zɛʋɛi zu ɠulakɛlɛma ɓɔɛiti. 8 Nà Zan ʋe, nà ɠa gè niima vaiti mɛnini, gè ti ɠa. Siɛgi zu gè ti mɛnini da, gè ti ɠa, gè laani geezuɠeelai ɠɔɠɔwu, nii é ti lɛɛni ga ze, ga gè nɔkɔ bu. 9 Kɛlɛ é ɠɛni mà: «Mina naa ɠɛ! Nà ga botiɠɛ nui ga ɗɔun è ɠɛʋele, wa è-ɠɛɛleaiti GALA goo wo nuiti, ta niiti ti ɠolozu, ti ɗa ziɛ ga sɛʋɛi nii zu wooi. Nɔkɔ GALA bu!» 10 Naa ʋoluma é ɠɛni mà: «Mina sɛʋɛi nii zu ɠulakɛlɛma ɓɔɛiti kɛ ga dɔɔɠuzu vaa, mazɔlɔɔ niima vaiti kɛ yeei maaɓuɠaa. 11 Zɔi é ga telebotala nui, naa yɛ telebotala vai laawu nɔ. Zɔi é ga kɔzɔba nui, naa yɛ kɔzɔba vai laawu mɔnɔ. Kɛlɛ telebo nui yɛ telebo fai ɠɛɛzu nɔ mɔnɔ. Zɔi ɲadegai, naa yɛ ɓɔɠɔ ɲadesu mɔnɔ.» 12 Yesu ɠa ɠɛɛzu ma: «Wɛlɛ, nà ʋaazu fala! Nà ʋaazu ga kulanumaiti, gè fe ɛsɛ zea, é zoloo kɛɛwotii ma. 13 Nà ɠa gè ga Alefa ta Womega, ma mɔungi ta ma ɠaaɓelagi, tɔɔzeizuʋɛ ta gaaɓelazuʋɛ.» 14 Undaanɛ nu ɠa ga naati, niiti ti ɓɔɠɔ maazeɠeiti gbazu. Naa maaʋele ma, ma zobogi ɠa ve ti ya ga ti zɛnvu wulu waai mi, ti lɛ taazuʋɛ ga siɠida ʋelei. 15 Kɛlɛ kɔzɔba nuiti ta yɛ taa ʋoluʋɛ, ta zoɠo vaa ɠɛ nuiti, ta koloɠolo nuiti, ta nu ʋaa nuiti, ta kɔɔɠɔ gani kɔɔ nuiti, ta nu nɔpɛ zɛɛi nɛai bɛ, é ɗa bo, é ɗa ziɛ la. 16 «Nà Yesu, nà ɠa gè nà-geezuɠeelai leʋegai ga é niima vaiti pɛ daazeeli Egilisiiti su. Nà ga Davide ma zapei ma ʋɔnɔbai, mavofodai, nà ɠa gè ga geelaalaosuʋɛ ma zomideɠai, é volozu.» 17 GALA Zɛnvui ta Anza Ɓeai ti ɠɛni ma: «Ʋa!»Zɔi é niima wooiti mɛnisu, naa ɠɛ ma: «Ʋa!»Ɗɛigi kpɔɔle wɔin é ma, ʋa,zɔi nɔpɛ zɛnvu ɗɛi wɔin ma, naa seɠe nɔ, geya vaa la ba. 18 Nà Zan, nà maaɓakpasu, ga nu-o-nu é sɛʋɛi nii zu ɠulakɛlɛma ɓɔɛi mɛnisu, ni nu a ta laana ma, nimiza vaiti ti zɛʋɛai niima zɛʋɛi zu, GALA ka naati da tɔun unma. 19 Ni nu ma ga ta ɠulana sɛʋɛi nii zu ɠulakɛlɛma ɓɔɛiti da, GALA ka ma nui nɔnɔ ɠula zɛnvu wului ná-fai zu, ta taa ɲadegai, niiti ta-vai zɛʋɛai niima zɛʋɛi zu. 20 Zɔi é gaama vai niiti daazeeliai, é ɠɛ ma: «Ungo, nà ʋaazu fala!»Amina! Ʋa Maliɠii Yesu! 21 Maliɠii Yesu ná-zaalai yɛ ɛsɛ pɛ ba.

Revelation 22 (TOMA)

In Other Versions