Romans 5 (TOMA)

1 Naa ɠa é ba, tɛi de ɠɛa ga telebo nuiti GALA gaazu, kidaaleʋei maaʋele ma, ziilɛigi ɠa niina de yɔɠɔzu da GALA, ga de-Maliɠii Yesu Kilista maaʋele. 2 Tɔun maaʋele ma, ade lɔɔzu zɔlɔɔga GALA ná-zaalai zu kidaaleʋei zaɓui zu, nii de zei ʋele ɓɛtɛai niina su. Nii é koozunɛɛi veezu ade ya, naa ɠa ga kitogi, ga de dɔnɔ zɔlɔɔga GALA ná-lɛbiyai zu. 3 É ɓudɛ naa maazu, da ɠoozunɛɛzu da-ɓɔlɔiti su, mazɔlɔɔ de kwɛɛ ga kpɔlɔi ɠa a ɗa ʋa ga ziilɔɔi, 4 ziilɔɔi ʋa ga wooɠɛɠiladai poluɠulazu la ba, wooɠɛɠiladai poluɠulazu la ba, naa ʋa ga kitogi. 5 Kitogi naa la ɗa ga nu iɲɔteʋea, mazɔlɔɔ GALA ge ná-nɛɛbɛi lɔa ade-yiimaʋɛti ga Zɛnvu Ɲadegai, nii é feai ade ya. 6 Tama siɛgi zu zɛbɛ la ɠɛni dɛ de ya la, Kilista zaani GALA gaazuluabalala nuiti ade ʋɛ, yeeɠɛɠalai zu é leveni la GALA bɛ. 7 Mazɔlɔɔ nui a zoo é za telebo nui ʋɛ, naama nui zɔlɔɔ fai ɓaaʋɛ gola, tanisu ta ɠa yiilɔɔ, é za nu ʋagɔi ʋɛ. 8 Kɛlɛ GALA ge ná-nɛɛbɛi lɛɛʋɛ ga adeye ga nii, naa ɠa ga Kilista zaani ade ʋɛ, siɛgi zu ade ɠɛni la dɛ ga kotoba nuiti. 9 Ade ɠɛa ga telebo nuiti GALA gaazu ma ɲamai maaʋele ma, é ɓudɛ naa maazu, niizu tɔun saala zu, da ɠizo ɓalaa GALA ná-ziiɠaawanai ma. 10 Ade ɠɛni ga GALA sili nuiti, kɛlɛ tɔ ɓɔɠɔ ɠa é ade yɔɠɔzuɓɛtɛa ga ná-Doun Zunui zaa vai maaʋele. É ɓudɛ naa maazu, niizu ade yɔɠɔzuɓɛtɛai niina ada tɔun, ná-Doun Zunui yɛnvui maaʋele ɠa da ɠizo da. 11 Naa ʋoluma mɔnɔ, GALA ka ade ɠoozunɛɛzu ga ade-Maliɠii Yesu Kilista maaʋele, nii é ade yɔɠɔzuɓɛtɛai niina ada GALA. 12 Naa ɠa é ba, kotoi lɔɔni eteai zu ga nu ɠila kpegi maaʋele, Adama, saai ʋa ga kotoi maaʋele, saai zeelia ɛsɛ pɛ ma, tɔɔzei ɛsɛ pɛ ge kotoi ɠɛa. 13 Tama aisa GALA ge ʋa tɔgi ve Moize ya, kotoi ɠɛni niina eteai zu, kɛlɛ kotoi la ɠɛni dɛ levezu, siɛgi zu tɔgi la ɠɛni ná la. 14 Anɛɛ naa ʋe, saai masadai ɠɛɛni, é zo Adama ná-yeeɠɛɠalai ma, é zeeli Moize nɔnɔi ma, é zeeli vɔlɔ naama nuiti pɛ ma, niiti ti la ɠɛni kotoi ɠɛɛni ga Adama ná-tɔ koloɠologi ɠɛɠala. Adama ɠɛni ga naa ná-poogi, nii é ʋaazu. 15 Kɛlɛ zɔɠɔzu ɠa Adama ná-faaɠaazagi ta GALA ná-vebɛanii ʋa, nii sɔngɔ ve la ba. Ma mɔinmɔin ge zaa nu ɠilagi ná-faaɠaazagi maaʋele ma, kɛlɛ GALA ná-zaalai wɔɔlɔʋɛ gola, ta vebɛanii é feezu ga faanɛɛi ma mɔinmɔin bɛ, nu ɠilagi maaʋele ma, nii é ga Yesu Kilista. 16 Zeeɠaaɠwɛɛzu ɠa nu ɠilagi ná-kotoi ma zalai ʋa ta GALA ná-vebɛanii, nii sɔngɔ ve la ba! Tɔɔzei nu ɠilagi ná-faaɠaazagi ʋoluma, tukpɔi ʋaani ga peelalai, kɛlɛ faaɠaaza mɔinmɔin poluma, GALA ná-vebɛanii ʋaani ga telebodai. 17 Ni nu ɠilagi ná-faaɠaazagi maaʋele ɠa é kɛa saai masadai ɠɛa, deɠɛmu, zɔiti ti zaalai zɔlɔɔsu, é mɔin ti ma, ta vebɛanii nii é ga telebodai, naati ta ɓudɛ naa maazu poun, ti zɛnvui wo, ti masadai ɠɛ Yesu Kilista maaʋele ma. 18 Naa ɠa é ba, ʋelei peelalai nui pɛ soga da, nu ɠila kpegi ná-faaɠaazagi maaʋele ma, zekana ɓalaa nu ɠila kpegi ná-telebo kɛɛwotii maaʋele ma, nii é ga Yesu Kilista, nuɓusɛiti ta ɠɛɛ la ga telebo nu GALA gaazu, é zɛnvui ve ɛsɛ pɛ zea. 19 Mazɔlɔɔ eɠɛʋelei ma mɔinmɔin ge ɠɛa la ga kotoba nu, nu ɠila kpegi ná-woozotalai maaʋele ma, zekana nɔ, ma mɔinmɔin ka ɠɛɛ la GALA gaazu ga telebo nu, nu ɠila kpegi ná-woozogi maaʋele ma. 20 Tɔgi ʋaani, naazu ɠa kotoi mɔinɗa la, kɛlɛ ʋɛ kotoi mɔinɗai ná, zaalai mɔinɗa miná gola, é ɓudɛ maazu. 21 Nii a kɛ, eɠɛʋelei kotoi masadai ɠɛa la ga saai maaʋele, zenɔ ɠana, zaalai a masadai ɠɛɛ la ɠana nɔ ga telebodai maaʋele, é li ga deye ɠɔoɠɔ zɛnvui ʋɔ bɛ, de-Maliɠii Yesu Kilista zaɓui zu.

Romans 5 (TOMA)

In Other Versions