Leviticus 10 (YAPE)

1 Nadab nge Abihu ni l’agruw i pagel ni fak Aron e ra bagyow me fek e ba’ rok e pan nma par e nifiy u langgin nge af e kol ni be yik nga langgin, miyow uneg e incense ngay, ngar pi’ew nib maligach ngak SOMOL. Machane re nifiy ney e de thothup, ya dawori yog SOMOL ni ngar pi’ew e maligach ngak ni aray rogon. 2 Me yib e nifiy nib tomgin ko gin bay SOMOL riy nge urfiy row ngar m’ow u rom u p’eowchen SOMOL. 3 Me ga’ar Moses ngak Aron, “Irera’ e n’en ni yog SOMOL murung’agen ni fa’an ni ga’ar, ‘Gubin e pi tapigpig rog e thingar ra tedfag nga fenag thothup, ma bay gu dag feni gilbugwag ko girdi’ rog.’” Me par Aron nde non. 4 Me pining Moses Mishael nge Elzafan ni fagal pumo’on ni fak Uzziel ni walagen e chitamngin ara chitinngin Aron, me ga’ar ngorow, “Mirew ngaray ngam fekew downgin e galicha’ ney ni fak Aron nga wean ngar chuwgow u lane re Tent ney nib thothup, mi gimew tay row nga wuru’ e gin’ey nike n’uf yu Israel e tent rorad riy.” 5 Ma aram marbow ra kolew e mad u daken fagali ldow ngar fekew nga wuru’ e gin’em, ni bod rogon nike yog Moses. 6 Me ga’ar Moses ngak Aron nge fa gali pumo’on ni fak ni aram Eleazar nge Ithamar, “Dab mu ted lolgumed ndab kum raweyed ara mu guchthiyed e mad romed ni gimed be dag ni be taganan’med. Ya gimed ra rin’, ma gimed ra yim’, mra damumuw SOMOL ngak yu Israel ni ga’ngin. Machane urngin e girdi’ nu Israel ni yad ra yornag faglicha’ ni li’row fare nifiy ni SOMOL e pi’ nge yib. 7 Dab mmarod u langan e mab ko fare Tent nga wean, ya gimed ra yim’, ya kan liyefmed ko fare gapgep ni fin e mathiy rok SOMOL.” Aram miyad rin’ ni bod nike yog Moses. 8 Me ga’ar SOMOL ngak Aron, 9 “I gur nge fapi pumo’on ni fakam e nap’an ni gimed ra unum e wayin ara ban’en ni yima ching ngay ma dab kumbad ngalan fare Tent u p’eowcheg; ya fa’an gimed ra rin’, ma gimed ra yim’. Ren’ey e nge par nib motochiyel rok e pi’in owchamed e chiney i yan nga ram. 10 Thingar mu ki’eged e tin fen Got ban’en nge tin yug fenay, nge tin tabgul ban’en nge tin ba ta’ay. 11 Ma thingar mu filed ngak e girdi’ nu Israel urngin fapi motochiyel ni kug pi’ ngomed u daken Moses.” 12 Me ga’ar Moses ngak Aron nge fa gali pumo’on ni fak ni kar magey gow, ni aram Eleazar nge Ithamar, “Mu feked fare maligach ni grain ni ke’aw ko fapi ggan ni kan pi’ ngak SOMOL ngam ngongliyed e flowa riy ndab ntay e is ngay ngam ked u to’oben fare altar, ya re maligach ney e rib tabgul. 13 Thingar mu ked u bang nib tabgul; ya ireram e f’oth rom nge pifakam ni pumo’on ko fapi ggan nni pi’ ngak SOMOL. Ya irera’ rogon nike yog SOMOL ngog. 14 Machane gimed nge pifakmed ni pumo’on nge ppin e ngam ked u bang nib tabgul e ufin u ngorngoren ni aram fa gin nni ognag nge ay ni aram e girok e prist e f’oth. Pi maligach ney e kan pi’ ngomed nge pifakmed ni aram e giromed e f’oth ko fare maligach nma gapaseg thilin Got nge girdi’ nu Israel. 15 Yad ra fek i yib fare raba’ i ay nge ufin u daken ngorngoren fare gamanman ko ngiyal’ ni yibe pi’ e mam ni ba ggan ni maligach ngak SOMOL. Yungney ko fare gamanman e f’oth romed nge pifakmed ni dariy n’umngin nap’an, ni bod rogon nike yog SOMOL.” 16 Me fith Moses murung’agen fare kaming ni maligach ni fan ko denen, me nang ni kan mu’ i urfiy. Me damumuw Moses ngak Eleazar nge Ithamar, me yog ngorow ni ngar fulwegew lungun, me ga’ar ngorow, 17 “Mangfan ndam kew u bang nib tabgul fare maligach ni fan ko denen? Rib tabgul, ma ke pi SOMOL ngomew ni ngam pi’ew e bayul ni fan ko denen rok piyu Israel ni ga’ngin. 18 Amguyew, dan fek e racha’ riy i yib nga langgin fare Tent nib thothup. U rom e ir e ngam kew riy, ni bod ni gog.” 19 Me fulweg Aron ngak Moses ni ga’ar, “Fa’anra guway fare maligach ni fan ko denen e daba, ma gur ra m’aguwan’ SOMOL? Girdi’ e yad be fek i yib e maligach ni fan ko denen rorad ngak SOMOL e daba’, nge maligach rorad ni mo’oruf, machane ku be buch e pin’ey rog.” 20 Ma nap’an ni rung’ag Moses e ren’ey, mri fel’ u wan’.

Leviticus 10 (YAPE)

In Other Versions