Luke 8 (YAPE)
1 Ma de n’uw nap’an me milekag Jesus i yan u lan e pi binaw ni ba ga’ nge pi binaw ni ba’achig, ni be machibnag ngak e girdi’ e Thin Ni Bfel’ ni murung’agen e gagiyeg rok Got. Me un fare ragag nge l’agruw i gachalpen ngak ngranod, 2 ma ki un boch e ppin ngak ni ka’a gol nagrad ko mo’onyan’ nge liliy, ni aram Maria (ni yima pining Magdalene ngak) ni medlip e mo’onyan’ ni tuluf Jesus nge chuw rok; 3 nge Joanna, ni ppin rok Kuza ni ir reb e salthaw nib tolang u tafen Herod; nge Susanna, nge ku boch e ppin ni ur ayuweged Jesus nge pi gachalpen ko tin ni nge yag ngorad. 4 Me ere yigi i yib e girdi’ ko pi binaw ngak Jesus; ma nap’an ni mu’ulung e girdi’ ngak ni pire’ ni pire’ me yog Jesus ngorad e re fanathin ni ba’aray ni ga’ar: 5 “Be’ nib mo’on e yan ni nge wereg awochngin e woldug rok. Ma nap’an ni be wereg fapi awoch u daken e milay’, me wear boch nga daken marichlen wo’en e girdi’ u milay’, mu u nit’ ma be kay e arche’. 6 Ma boch e wear nga daken bochi thal i but’ ni bay u daken e war, ma fa’ani tugul me mororoy, ya dariy e ran u fithik’ fachi thal i but’. 7 Ma boch fapi awoch e wear nga fithik’ e pan ni bay rachangalen, me tugul fapi awoch nge fapi pan u ta’bang me yabochboch fapi pan ko fapi woldug me yim’ fapi woldug. 8 Ma boch fapi awoch e wear nga daken e but’ nib yong’ol; me tugul nge k’uf nra ba kaen ma ra’ay wom’ngin.”Me ul ul Jesus ngay nge ga’ar, “Fa’anra bay telmed ni ngam rung’aged ban’en ngay, me ere mu telmed!” 9 Me fith pi gachalpen Jesus ngak ko be mangfan e re fanathin ney. 10 Me fulweg Jesus ni ga’ar, “Gimed e kan weliy ngomed e tin nda nnang ni murung’agen e gagiyeg rok Got; machane tin ni kabay e girdi’ e kan pi’ ngorad u fithik’ e fanathin, ya ngu’ur changargad ma dab ra guyed ban’en, ma ngu’ur motoyilgad ma dab ra nanged fan.” 11 “Ba’aray fan fare fanathin: fapi awoch e aram e thin rok Got. 12 Ma awoch ni wear u marichlen e kanawo’ u milay’ i yan e be yip’ fan e pi’in ni rung’ag e thin rok Got; me yib mo’onyan’ i fek fapi thin rok Got nge chuweg u lanin’rad, ya nge dabi mich e re thin nem u wun’rad nge dabiyag nra thapgad ngak Got. 13 Ma awoch ni wear nga daken bochi thal i but’ ni bay u daken e war e be yip’ fan e pi’in nrung’aged e re thin rok Got nem miyad fol riy ni kar felfelan’gad. Machane ri de rich nga fithik’ i lanin’rad; ma de n’uw nap’an ni ur pired nib mich u wun’rad e re thin nem, ma fa’ani yib ngorad e pin’en nma pingegey ngan denen ma dakur folgad ko fapi thin. 14 Ma awoch ni wear nga fithik’ e pan ni bay rachangalen e be yip’ fan e pi’in nrung’aged e thin rok Got; machane bochan e magafan’, nge fel’ rogon nge felfelan’ nu fayleng ni yibe m’oneg ko thin rok Got ko biney e tamilang e sugnag lanin’rad nge thang fapi thin rok Got u lanin’rad, ma aram e de lol wom’ngirad. 15 Ma awoch ni wear nga daken e but’ nib yong’ol e be yip’ fan e pi’in nrung’aged e thin rok Got miyad tay u lanin’rad ngu’ur folgad riy me par rorad nge yib wom’engirad.” 16 “Dariy be’ nra tay e nifiy nga ba magal me upunguy nga baraba’ i ban’en ara tay nga tan bangi bet. Ya ra tay nga daken tagil’ e magal, ni fan e nge yib e girdi’ ngalan e naun miyad guy ram’en. 17 Demturug e n’en ni kan mithag ma bay ni fek i yib ngalan e tamilang, ma demturug e tin ni kan upunguy ma bay ni pir’eg ngar fek i yib ngalan e tamilang. 18 “Ere mu tiyan’med ngarogon e motoyil ni gimed be tay; ya en ni bay ban’en rok e bo’or e bay ni pi’ ngak, machane en ndariy ban’en rok e bay ni fek rok e chu’uw ni be finey ni bay rok.” 19 Me yib e chitiningin Jesus nge pi walagen ni pumo’on, ma de yag ni ngarbad ngak ni bochan e girdi’ ni pire’ ni pire’ nike sug u to’oben. 20 Ma aram me ga’ar be’ ngak Jesus, “Ba sak’iy e chitinam nge pi walagem ni pumo’on u wean ni yad be guyem.” 21 Me ga’ar Jesus ngorad ni yad gubin. “Chitinag nge pi walageg ni pumo’on e pi’in yad ra rung’ag e thin rok Got miyad fol riy.” 22 Reb e rran me af Jesus nge pi gachalpen nga bowoch me ga’ar ngorad, “Ngdarod nga ba’nem e lipath.” Ma aram miyad yan. 23 Ma nap’an ni yad be yan u bowoch me mol Jesus. Me yib e nifeng nib gel ngorad ngi i t’ar e ran ngalan e bowoch ni be chugur ni ngar mak’gad. 24 Me yib pi gachalpen ngak ngar puged ni be lungurad, “Masta, Masta! Ngad m’ad!”Me sak’iy ngalang nge non ko nifeng nge n’ew; me gapas nge aw e cho’. 25 Ma aram me ga’ar ngak pi gachalpen, “Bu uw e michan’ romed?” Me lungurad rorad, “I mini’ e cha’ney? Nra non ko nifeng nge n’ew me fol rok!” Ya kar gin gad ma kar tamdaggad. 26 Miyad yan u bowoch ko nug nu Gerasa ni bay nga baraba’ e lipath u Galile. 27 Ma fa’ani af Jesus nga talang, me yib be’ nib mo’on ngak ni yib u lan e binaw nike ying e mo’onyan’ ni pire’ ngak. Nike n’uw nap’an ni be par ndariy e mad u daken, ma der par u tabinaw rok, ya ma par u lan e yiy ni yima chibgiliy e yam’ riy. 28 Ma fa’ani guy fare mo’on Jesus me tolul ni ba ga’ laman, me paraw nga but’ u p’eowchen Jesus me non ni ba ga’ laman ni ga’ar, “Jesus, ni Fak Got ni Th’abi Tolang! Mang e ga be finey ni ngam rin’ ngog? Wenig ngom, dab mu gechig nigeg!” 29 I yog e re bugithin ney ni bochan e ke non Jesus ngak fare mo’onyan’ ni nge chuw u fithik’ fa’anem. Ke yo’or yay nike gafgownag, ni yugu ra ni kalbusnag ni ka ni m’ag e chen nga pa’ nruw raba’ nge ay, me t’ar fapi chen me ying fare mo’onyan’ ngak nge waliy i yan nga daken e ted. 30 Me fith Jesus ngak ni ga’ar, “I mini’ fithingam?” Me fulweg ni ga’ar, “I Buulung fithingag,” ya pire’ e mo’onyan’ nike ying ngak. 31 Me wenig fapi mo’onyan’ ngak Jesus ni dabi pi’rad ngranod ngalan e abyss. 32 Ma bay ba ran’ i babiy ni pire’ ni yad ba chugur ngorad, ni yad be abich u daken sigre’en e burey. Me wenig fapi mo’onyan’ ngak Jesus ni nge pagrad ngranod ra yinggad ngak fapi babiy me pagrad. 33 Ma aram me chuw fapi mo’onyan’ u fithik’ i downgin fa’anem ngranod ra yinggad ngak fapi babiy; me mil fare ran’ i babiy ngranod ra mulgad u taban bangi war ngalan fare lipath ngar limochgad. 34 Ma fapi pumo’on ni be gafaliy fapi babiy e fa’anra guyed ni aram rogon, miyad mil ngranod ngar wereged e thin riy u lan binaw nge yungi n’en ni yibe par riy yibe woldug. 35 Me yan e girdi’ ngranod ra guyed e n’en nike buch. Ma fa’an rabad ngak Jesus miyad pir’eg fare mo’on ni fa’ani chuw fapi mo’onyan’ rok nike par nga but’ u to’oben i ay Jesus, nike yin’ e mad, ma ke sul laniyan’ ngak, ma aram me yib e tamdag ngorad ni yad gubin. 36 Ma pi’in nra guyed e ren’em e ra weliyed ngak e girdi’ rogon ma ke gol fa’anem. 37 Ma urngin fapi girdi’ ko gi nug nem nra mu’ulunggad ngar weniggad ngak Jesus ni nge yan nge chuw u rom, ya yad gubin nike yib e tamdag ngorad nib gel. Ma aram me af Jesus ngalan fare bowoch nge yan. 38 Ma fare mo’on ni fa’an kechuw fapi mo’onyan’ rok e wenig ngak Jesus ni ga’ar, “Nggu un ngom.”Machane me yog Jesus ngak ni nge yan, ni ga’ar, 39 “Mu sul nga tafnam ngam weliy e n’en ke rin’ Got ngom.”Me yan fare mo’on u lan fare binaw ni ga’ngin ni be weliy murung’agen e n’en ke rin’ Jesus ngak. 40 Fa’ani sul Jesus nga baraba’ fare lipath me felfelan’ e girdi’ ni pire’ nike mu’ulung ya ke sul ngorad, ya yad gubin ni kar pired ni yad be sonnag. 41 Me taw be’ nib mo’on ni Jairus fithingan, ni ir reb e tolang u tafen e mu’ulung ko gin’em. Me yib i paraw nga but’ u to’oben i ay Jesus nge wenig ngak ni nge un ngranow nga tabinaw rok, 42 ya bochi pin ni fak ni kari maagirag rok, ni ragag nge l’agruw e duw yangren e be n’en ni nge yim’.Ma nap’an ni un Jesus ngak ngranow, ma be apinpin e girdi’ ngak u gubin yang. 43 Ma bay be’ ni bpin u rom nib gel e gafgow ni be tay, ya nga ragag nge l’agruw e duw nib m’ar nib molul; ke pi’ urngin e salpiy rok ngak e pi togta, ma dariy bagayad ni keyag rok ni nge golnag. 44 Me yib u fithik’ e girdi’ u keru’ Jesus me yib i math nga taban e mad rok u but’, me tal racha’en ni ka chingiyal’ nem. 45 Me fith Jesus ni ga’ar, “Mini’ e ke math ngog?”Ma urngin e girdi’ nra be’ me ga’ar e gathi ir; me ga’ar Peter, “Masta, pi girdi’ ney ni aray urngin e kar suggad u to’obem ni yad be apinpin ngom.” 46 Machane me ga’ar Jesus, “Ke math be’ ngog, ya kug nang ko ngiyal’ ni yan gelngig riy nga wuru’ i dowag.” 47 Me nang fare pin ni kan pir’eg e n’en nike rin’, ma aram me yib ni be t’on nge yib i paraw nga but’ u to’oben i ay Jesus. Me weliy ngak u p’eowchen urngin e girdi’ fan nike math ngak nge rogon nike chuw e liliy rok ni ka chingiyal’ nem. 48 Me ga’ar Jesus ngak, “Fakag, michan’ rom ngak Got e ke gol nigem. Mman nike pagan’um.” 49 Ma nap’an ni ka be yog Jesus e re bugithin nem, me yib be’ ni ka nol’oeg u tafen Jairus ni ir fa’anem nib tolang u tafen e mu’ulung. Me ga’ar ngak Jairus, “Dab kum magawonnag e re tamchib nir, ya ke aw e fan rok fachi pin ni fakam.” 50 Me rung’ag Jesus e n’en nike yog me ga’ar ngak Jairus, “Dab mu rus; kemus ni nge michan’um ngak Got, me gol.” 51 Ma fa’ani taw Jesus ko fare naun ma de pag yugu be’ nge un ngak ngalan fare naun ya kemus ni Peter, nge John, nge James nge chitamngin nge chitiningin fachi pin e pagrad ngar uned ngak. 52 Ma girdi’ ni yad bay u rom e yad gubin ni yad be yor ma yad be dololoy’nag fachi pin. Me ga’ar Jesus, “Dakumur yorgad; ya cha’nir e dawori aw e fan rok, ya be mol!” 53 Ma yad gubin nra moninggad ngak, ya yad manang nike aw e fan rok. 54 Me kol Jesus pa’ me ga’ar ngak, “Fachi pin, mu suwon!” 55 Me sul e pogofan rok ngak me suwon ngalang ni ka chingiyal’ nem; me yog Jesus ngorad ni ngar pi’ed ban’en ngak nge kay. 56 Mi ri gin e chitamngin nge chitiningin ko ren’em, machane me tay Jesus chiylen ngorow ndab rognew ku be’ e tin ni kar guyew.