1 Corinthians 1 (BBT1E)

1 Phaul è, hanyie shii Hamangkhung-aphuii è yang ne Masi Isu ro guaphasamoy rek yi, chiih-è gathek ro khuiino Sosthenes è de. 2 Khorinth shii um pha Hamangkhung-aphuii ro charch chiih-è Hamangkhung-aphuii è hanyie shii zab so pha bran rone ho pha, chiih-è hanyie yi aishii um pho ne Isu Masi rog shii phro, ithek ro Ithong nane gathek ro Ithong, hanyie è Isu Masi shii sia pha zab bran shii ò rek bo. 3 Hamangkhung-aphuii gethek ro Aphuii nane Ithong Isu Masi è nathek shii bushun nane liijiing phi bo. 4 Nathek chiang shii gune idang guro Hamangkhung-aphuii shii laso phi, nyieliieshii Isu Masi chiang è ai è nathek shii bushun phi. 5 Nathek Masi rog shii ò um pha ji è nathek ne zab pha muna, chiih-è ne zab pha yao pha nane zab khani shii bohkhoh rey ruii phro. 6 Masi ro mua chiang è nathek shii chuh è rab phi sra ne 7 nathek khan muii pha gathek ro Ithong Isu Masi dong ruii pha ji è, nathek shii mua pha khirzey jine iphen jia de ìujia arey yi ro. 8 Jong pha Inai shii de nathek shii chuh è ruii phro, ji-è nathek ne gethek ro Ithong Isu Masi pha Inai shii ne ichiig oi phro. 9 Hamangkhung-aphuii shii migi rek bo, Hamangkhung-aphuii hanyie è nathek shii gathek Ithong awai Dufuii Isu Masi rog ò rek pha ho ro. 10 Gethek ro Ithong Isu Masi pha riichai è gu nathek zab shii yao, gu ijakthek, nathek è nyie yao pha ji shii ne nuii, ji-è nathek duchoi shii ache ruii phro. Zab ò jia rai bo, jia now bie ne chiih-è jia rek bie bo. 11 Chloe haliing pha giak branthek è gu shii miang è yao, gu ijakthek, thiisa hà nathek duchoi shii gui muii ro. 12 Gu ne hì duiine nathek shii yao: Nathek zab jia jia ne yo yaodun. Jia è yao, “Gune Phaul rog luagieng” gai è yao, “Gune Apholos rog luagieng” gai è yao, “Gune Phithar rog luagieng” chiih-è gai è yao, “Gune Masi rog luagieng.” 13 Masi shii yoyo ibrogthek che nebey! Nathek chiang shii bai hà iy pha ji ne Phaul bey? Nathek ne Phaul ro samoy rey ne khowo yi nebey? 14 Gu Hamangkhung-aphuii shii laso phi, Grisphus nane Gaius shii thoh ne gu è nathek hanyie shii khowo aphi ro. 15 Chiihphado, nathek ne gu beng è khowo yie phro ne, nathek ne hanyie de ayao mua phro. 16 (Oh, gu è de Sthephanas nane airo haliing pho shii khowo phi; jishii gu è gai hanyie shii khowo phi pha ji ne gu anow mua ro.) 17 Masi è gu shii khowo phi pha athoh ro. Ai è gu shii ne Mua Wie ji yao pha thoh, chiih-è bran khani pha nyuak è rek ne yua pha asi ro, ji pha chiang shii izai rab ne Isu bai shii iy pha blu shii nathek è ariao yi rabo. 18 Hanyie yi san dun ramuii pho ne, Masi bai shii iy pha mua jine adunmey ro: jishii gethek hanyie è ragia rey pho shii ne Hamangkhung-aphuii blu ro. 19 Jigigam shii yao,Gune khua pha khani shii srobro rek ruii phro chiih-è bajo ìd branthek ro khani shii de ijiu jia hà ruii muii phro. 20 Ji-è ji arone, khua ne khi hà dun dun lai? Dinne bajo ìd pho ne khi hà dun dun lai? Dinne ichiih sohjambling pha lie pho ne khi hà lei? Hamangkhung-aphuii è ichiih sohjambling pha khani ne bi-ìe rone doh yi! 21 Hamangkhung-aphuii è branthek shii awaithek khani è aishii athieg yi pha rab muii. Ji phachiang shii, gethek muyua pha mua ji ne thaluii “bi-ìe” rone yao pha ji ne, hanyie è migi rek pha ji shii ne ragia rey phro ne Hamangkhung-aphuii è phakjong ro. 22 Jewthek è buangthek pha khagi shii chid, chiih-è Greekthek ne khani shii sow. 23 Chiih-è gethek ne, Masi ne zun dun pha ji yao, ji pha mua ne Jewthek shii ne buii ro chiih-è Gaibranthek shii ne adunmey ro; 24 jishii Hamangkhung-aphuii è hanyie shii ho pha ji ne, nyi manyi Jewthek nane Gaibran shii de ro, hì pha mua ne Masi ro, hanyie shii Hamangkhung-aphuii ro blu nane Hamangkhung-aphuii ro khani um ro. 25 Nyieliieshii Hamangkhung-aphuii ro bi-ìe ne branthek ro khani è bo doh muii ro, chiih-è Hamangkhung-aphuii pha zia ne branthek ro chua è de bo doh muii ro. 26 Gu ijakthek, Hamangkhung-aphuii è nathek shii ho mage shii, nathek ne nyie ga thuh shii now bo. Bran è now shii nathek è giak yi khua dinne blu dinne boh ilkhi ro. 27 Hamangkhung-aphuii è khani oi pho shii gua pha ji ne nak ne sohjambling pha khani um pho shii biwo rek yi pha rek, chiih-è sohjambling pho zia ro è yao pha ji shii gua ne blu pho shii biwo rey yi. 28 Sohjambling pho nyie shii ìu riig muii pha nane thoh muii pha, chiih-è nyie asi rone yao pha ji shii gua srane sohjambling pho è miigak rone now pha srobro yi pha gua phro. 29 Hì pha miyao è hanyie de Hamangkhung-aphuii moe shii nyigodog arek mua. 30 Jishii Hamangkhung-aphuii è gethek shii Masi Isu rog shii ò rai yi pha noh, chiih-è Hamangkhung-aphuii è Masi shii gethek ro khani rab phi. Ai chiang è gethek ne Hamangkhung-aphuii rog shii giang ruii; gethek de Hamangkhung-aphuii ro so bran rey ro chiih-è gethek ne layog è ichad rey ge ro. 31 Ji-è, chiihphado, jigigam shii yao, “Hanyie magungde nyigodog rek yang arone Ithong è nyie rek pha ji shii nyigodog rek bo.”

1 Corinthians 1 (BBT1E)

In Other Versions