John 12 (BBT1E)

1 Hiìadun pha dariig ibi, Isu Bethany hà, ai è iy dun pha bran shii hòi phi pha, Lazaras hò hà wuii. 2 Thiisa hà ithek è Isu shii michie saro phi, chiih-è Martha yi michie chog pha nong gieng; chiih-è Lazaras ai de Isu rog thiibliie shii dug gieng. 3 Chiihphado shii Mery è bajo igong rek pha chiih-è bajo rem now pha thiiliie, sasia khuyo jia yi srane, Isu laishii shunphi, chiih-è awai khaziang rek ne shadphi. Hò iliing shii ne sumaro ji è zab noh dun. 4 Isu ro samoy è jia, aishii zum pha rek muii pha Judas Iskharioth ji è yao, 5 “Nyie rek ne hì pha sumaro yi wieng uom luman bang shii liu ne, bang yi dusho shii aphi lei?” 6 Ai è hì yao pha ji ne dusho shii wie rek rone ayao ro, jimagungde ai ne mugo ro. Ai ne bang biia han srane sha ji è awaishii nong din phro. 7 Jishii Isu è yao, “Bimi shii awai ji thoh muii bo! Ai ne gu shii wieng pha inai ji rek ne rai yi bo. 8 Na shii ne idang dusho bran um ruii phro, jimagungde ai ne idang gu rog shii oi phro.” 9 Isu ne Bethany hà um rone bran bajo è yoi, ji-è ithek ne sha hà wuii dun, jimagungde ai ne Isu shii riig bie pha asi pha iy dun pha jishii Isu è hòi din phi pha, Lazaras shii de riig pha wuii. 10 Ji-è boh phabithek è Lazaras shii de bajo ua pha phak, 11 nyieliieshii ai chiang è bajo Jewthek è ithek shii snai srane Isu shii migi rekdun. 12 Din pha inai shii Hiìadun Sai pha ji shii wuii pha bajo bran è yoi, Isu yi Jerusalem hà wuiiramuii ro. 13 Ji-è ithek ne iphang yi ne fuang hà aishii si pha wuii dun, chiih-è ziak srane Hamangkhung-aphuii shii “Chiong, Hamangkhung-aphuii aishii ne khirzey phi bo! hanyie Ithong beng è wuii, chiih-è Hamangkhung-aphuii Israel pha Saja shii de khirzey phi bo!” 14 Jigi shii yao pha duiine, Isu è bambao jia doh ne jishii in srane wuii, 15 “Arum chid rabo, Zion rajan phothek!”bambao bgang è in ne,Nathek Saja ichiih wuii sha ruii ro. 16 Ji pha ishak shii airo samoythek è agao, chiihphado è Isu biisiie shii hòi mage shii, jigigam shii yao pha ji aishii yao ara ithek è now. 17 Chiih-è Isu rog shii um pha bran è Isu è Lazaras shii iy ne wieng bucho è hòi din yi pha miyao ji chiih-è nyie rey pha ji phosro. 18 Ji-è ai ne aishii si wuii, nyieliieshii ai ne ji pha buang rek pha yoi. 19 Ji-è Pharisithek è gai jia shii yao, “Nathek riig mage bo! Gathek rone nyie de zab arey ro! Riigbo, sohjambling pha zab ne aishii luagieng dun ro!” 20 Sai pha ishak shii Jerusalem haì wuii pha giak Grekhthek de um. 21 Ithek Philiph shii wuii sra (ai ne thiisa Bethsaida è Galili) ne yao, “Masdo, gathek Isu shii riig yang muii ro.” 22 Philiph è Andrew shii wuii srane yao, chiihphado shii bran nyi wuii srane Isu shii yao. 23 Isu è isa shii chang, “Bran dufuii ne boh biisiie mua pha ishak ne thog sha ro. 24 Gu nathek shii zai yao: Igam yi nyiak hà chiih ne Ai a-iy sapho shii ne igam jia rai phro, chiih-è nyiak hà wieng ne ai iy mage shii, dinne bajo igam rey ruii phro. 25 Hanyie è awai chai shii miie pho ne mua ruii phro, chiihphado hanyie è ichiih sohjambling shii awai chai shii mua arone ai ne khuchung de a-iy pha sieng pha ji mua ruii phro. 26 Hanyie gu shii nong pha yang arone gu idoh shii lua bo, nyieliieshii gu khi hà um lei ne guro khiao de ji hà um ruii phro. Chiih-è hanyie è gu shii nong lei ne gu Aphuii è de aishii ilab rek phi. 27 “Thuh guro lubu ne diig rey dun—Chiih-è gune nyie yao sha pha lei? Gu è yao, Aphuii, hì pha ishak ne gu shii athog yi habey? Jimagungde ji-è gune wuii—Ji-è gune airo diig pha ishak shii wuii mua. 28 Aphuii, na beng pha biisiie yi bo!” Chiihphado hamangkhung è yao, “Gu è airo biisiie yijong ro, chiih-è de dinne gu rek ba pha ro.” 29 “Chiihphado thiichiih shii iphiing riu pha bran è de yoi, chiihphado giak è yao hì ne hakhliing ro, chiih-è gai è yao hì ne hamangkhliie aishii yao ro!” 30 Jishii Isu è ithek shii yao, hì yao pha goh hì ne gu chiang asi ro, jishii nathek chiang shii yao ro. 31 Thuh ne ichiih sohjambling shii chua pha ishak ro; chiih-è ichiih sohjambling pha khohpho shii ne zab fen ruii phro. 32 “Gu shii sohnyiak è chang mage shii, gu zab gui moe hà rai pha ro.” ( 33 Hì è yao pha ji ne ai khi-èrek diig rek ne iy pha mua ji yao.) 34 Bran iphiing è chang, “Gathek ro Iphey shii ne gathek shii yao Masi ne khuchung de a-iy pha sieng ne rai phro. Chiih-è, khi-èrek, mua ne bran dufuii shii lakhung chang pha nathek yao phlei? Ji pha bran dufuii ne hanyie lei?” 35 Isu è chang, muchuang ne nathek duchoi shii inai ìujia rai bie ruii phro. Ji-è nathek shii muchuang nyaum shii nawaithek athodang pha blia rek bo; ji-è igiia ne nathek duchoi hà athog yi rabo, chiih-è hanyie jia è igiia shii luapho ne khi hà luaramuii pha ji athieg ro; chiih-è hanyie yi igiia shii lua arone ai ne khi hà wuiiramuii pha ji athieg phro. 36 Muchuang nathek duchoi um ba shii nathek ne muchuang shii migi rek bo, ji-arone nathek ne isang pha bran rey ruii phro.Isu è ji yao pha idoh shii, ai dun marui srane ai adoh yi pha ug ne rai muii. 37 Chiih-è ai è ji buangthek ithek moe shii rek magungde ithek è aishii migi arek, 38 Ji-è chaig pha Aijaya è nyie yao pha ji ne izai rey ro:“Ithong, gathek miyao pha mua ji ne hanyie è migi rek phlei?”Chiih-è “Ithong, ro blu ne hanyie doh phlei?” 39 Ji-è ithek ne migi arek mua ro, nyieliieshii Aijaya è din yao, 40 “Hamangkhung-aphuii è ithek ro miegthek ne kheb muii,chiih-è ithek ro khani ne bin muii,ji-è ithek mieg ne ariig mua,chiih-è ithek ro khani ne agao mua,chiih-è ithek ne gu hà akhid ro, Hamangkhung-aphuii è yao,gune ithek shii wie rek phi pha.” 41 Aijaya è hì pha miyao yi Isu ro, biisiie riig srane ai pha miyao ji yao. 42 Jishii, Jewthek pha dumuii de Isu shii migi rek; jishii nyieliieshii Pharisithek è aishii Jewthek misiahò è khia ge è now ne rum ne lakhung è ayao. 43 Ithek ne Hamangkhung-aphuii è rek phi pha ji re-è ne tharothamang mirek phi pha ji shii miie ro. 44 Isu è ziak ne yao, “Hanyie gu shii migi rek gu jia shii migi arek jimagungde gu shii thoh ge pha aishii de migi rek. 45 Hanyie gu shii doh gu shii thoh ge pha ji shii de doh ro. 46 Gune sohjambling shii muchuang rey ne wuii ruii phro, ji è hanyie magungde gu shii migi rek arone, ai ne dinne igiia hà arai sha phro. 47 Chiih-è hanyie magungde gu miyao yoi ne anuii magungde gu aishii achua ruii phro. Gu ne ichiih sohjambling shii chua pha awuii ro, jimagungde gune ragia rek pha wuii. 48 Hanyie è gu shii snai ne gu mua ji anuii pha rek arone aishii chua pha ne jijia bie ro. Gu miyao pha miyaogamthek ai idoh pha inai shii chua ruii phro! 49 Hì ne izai ro, nyieliieshii gu miyao hì ne gui muyung ne ayao ro, jimagungde gu shii thoh ge pha Aphuii è gu shii nyie khi è yao chid pha ji yung phro. 50 Chiih-è gune thieg hì è yung pha hì ne idang pha chai phi ro. Chiih-è gune nyie yao, pha hì ne Hamangkhung-aphuii è gu shii nyie yao yi pha ji yao phro.”

John 12 (BBT1E)

In Other Versions