Luke 1 (BBT1E)

1 Bushun Theophilus:Bran bajo è gathek duchoi shii nyie rey pha miyaothek ji zey ne phi. 2 Ithek è hì zey pha ne, gathek è nyie yao pha ji ne igobi è hanyie è blia doh ne rai pho è mua ji gathek shii yao phro. 3 Chiih-è naro ilab, nyieliieshii igobi è nyie zey pha ji ne wie è tham phro. Ji è gu de na shii khriig rek yi pha chiang jia zey pha now muii ro. 4 Gu hì rek pha ne nathek shii nyie yoijong pha ji izai thieg pha rek phro. 5 Judea pha Herod saja sieng pha ishak shii, phabi wie rek pha Abija blang Zekharia beng pha phabi jia de um. Ai yiy beng ne Elizabeth ro; ai yi ji de phabithek haliing è giak pha bimi ro. 6 Ai ne Hamangkhung-aphuii mieg moe shii wie sieng ne rai. Chiih-è Ithong pha Iphey nane muyungthek nuii ne rai. 7 Aishii ani azen, nyieliiene Elizabeth ne ani azen phi, chiih-è Elizabeth nane Zekharia bajo weg reyjong ro. 8 Nai jia Zekharia yi awai Misiahò shii idang rek pha duiine ne awai phabi blia rek ne rai. 9 Phabithek è rek pha thiig pha Iphey duiine ne, sraibao shii bisi ziao pha miiran ne ai beng shii khia dun. Ji è ai misiahò iliing hà wuii dun. 10 Ai è bisi ziao pha ishak shii bran ibrogthek ne fuang hà sia ne rai. 11 Hamangkhliie jia è bisi ziao pha sraibao shii ai phazoi moe shii wuii ruii. 12 Zekharia è aishii doh mage shii siu bizieng srane rum dun. 13 Ji shii hamangkhliie shii è aishii yao, Zekharia, na ne arum chid rabo! Hamangkhung-aphuii è na misia yoijong ro, chiih-è na yi Elizabeth è de dufuii jia giak ruii phro, na ne aishii Jon beng bo. 14 Nathek ne khinyama lised nane sang ruii phro, chiih-è ai giak mage shii gai branthek de bajo sang ruii phro! 15 Ai ne Ithong mieg moe shii bajo boh bran rey ruii phro. Chiih-è ai ne phuii wegthek de aniing phi phro. Nyagiak dang pha idoh aishii ne Ragung So è ley dun phro, 16 Chiih-è Israel pha bajo branthek shii awaithek pha Ithong Hamangkhung-aphuii moe shii idoh noh din ruii phro. 17 Ai ne chaig Elija duiine ne giang now ne bajo boh riichai ne Ithong awai pha ibi shii wuii dun phro, ai è aphuii nane aniphiing shii de ò jia shii khrab din phi phro; ai è miyao anuii ne chun phothek shii dun giang noh pha lumuii hà idoh rai din yi phro; ai è Ithong pha branthek shii saro phi phro. 18 Zekharia è hamangkhliie shii yao, “Hì thek rey pha ne gu ne khi è thieg ruii phlei? Gu ne weg sha dun ro; Chiih-è gu yi de weg rey sha dun ro.” 19 Hamangkhliie shii ji è chang, gu ne Gabriel ro, “Gu ne hanyie è na shii hì thek pha miyao nane mua wie hì yao yi pha thoh pha Hamangkhung-aphuii rog riu muii ro, 20 hì ne ishak khriig rey shii ne izai rey ruii phro, jimagunde na ne hì pha guro mua ji izai anow. Na è migi arek pha ji è na ne miyao de ayao mua phro; nane sudoh è thiwing gu è sbang rek ne ruii pha izai arey sapho shii ne nane bi-ìe rey ne rai dun phro.” 21 Ji è rek pha ishak shii, branthek Zekharia shii khan ne rai. Chiih-è ai Misiahò hà nyama ishak nyie rek ne rai ara inow ne branthek munowthiig dun. 22 Ai fuang khia mage shii, ai ithek shii nyie de miyaogam ayao mua, chiih-è ithek ne thieg ai ne Misiahò hà ibang bang ara, ai nyie de miyaogam jia de ayao muluii pha rey srane jimagunde ai è ithek shii wad è phrai ne yao. 23 Ji è rek pha ishak shii Misiahò hà airo bliajong sha shii zechariah awai hò hà idoh dun marui. 24 Ìujia pha idoh shii ai yi Elizabeth ne ani wiig, ji è habie guii thogdang pha ji pha hò shii athoh. 25 Elizabeth è yao. Idoh hòi shii Ithong è gu shii nong phi, “Ai è gu ro biwo ji ruang rek phi!” 26 Elezabeth yi ani wiig ne habie riig rey shii Hamangkhung-aphuii è hamangkhliie Gabriel shii Galili pha bajarai hà Nazareth beng pha ithua hà thoh ge ro. 27 Ai è ji pha mua yi Joseph è yie pha ro è gang pha bimi jishii yao, ai ne Dawid Saja pha riing ro, ji pha bimi beng yi Mery ro. 28 Hamangkhliie shii è bimi jishii wuii thog srane yao, liijiing ne narog shii um ro! Ithong ne narog shii um ro chiih-è bajo boh khirzey ne na shii phi ro! 29 Mery yi hamangkhliie pha mua ji è bajo thiig than dun, chiih-è Mery ne ai miyaogamthek ne nyie ga inow ne wiengphleg dun. 30 Hamangkhliie shii è aishii yao, “Mery; arum chid rabo. Hamangkhung-aphuii è na shii bushun rek ro. 31 Nane ani wiig ruii phro chiih-è dufuii giak ruii phro, chiih-è na aishii Isu beng bo. 32 Ai ne bajo boh phro Chiih-è aishii ne bajo giu pha Hamangkhung-aphuii Dufuii rone ho ruii phro. Ithong Hamangkhung-aphuii è aishii ne awai blang Dawid mirek pha ji duiine ne saja rab phi phro, 33 Chiih-è ai ne Jakhob pha riingthek shii idang pha saja rey ne rai ruii phro, airo boh riichai ne khuchung de ajong phro!” 34 Mery è hamangkhliie yao, “Gu ne giang bimi ro, ji è, nyie khi-èrek ne hì rey mua phlei?” 35 Hamangkhliie è chang, “Ragung so de na shii wuii ruii phro, chiih-è Hamangkhung-aphuii ro blu de na lakhung shii thog ruii phro. Ji pha chiang è hì pha ani So shii ne Hamangkhung-aphuii ro dufuii rone ho phro. 36 Nawairo siang Elizabeth shii no mage bo. Ai è de yao gu ne ani agiak mua sha phro, jimagunde de ai ne bajo miriang habuii shii ani wiig ne habie riig rey sha ro. 37 Ji-è Hamangkhung-aphuii è arek mua pha nyie de oi ro.” 38 Mery è yao: “Gu ne Ithong pha khiao ro, Na è gu shii nyie yao pha ji rey yi bo.” Chiih-è hamangkhliie shii è aishii thoh marui ne dun dun. 39 Achia dang pha idoh shii Mery è saro srane Judea soh pha phiingduii hà riie ne jog wuii dun. 40 Ai è Zekharia hò hà wuii srane Elizabeth shii salam phi. 41 Elizabeth è Mery è khung ne yao pha ji nyayoi dang mage shii, ani yi ai lui iliing hà sid, chiih-è Elizabeth ne Ragung So è ley dun, 42 Chiih-è goh gang è yao, “Na ne zab pha hò-amuii è de bajo khirzey um ro, chiih-è na giak pha ani ji de bajo khirzey um ro! 43 Ithong pha amuii ne gu shii wuii ruii ne hì thek ne gu shii nyie rek ne rey ruii phlei? 44 Gu è na è khung ne yao pha ji nyayoi dang mage shii, gu iliing shii um pha arone chiung ne sang dun. 45 Ithong pha mua ji ne na shii izai rey ruii phro ne yao pha ji shii migi rek pha ji è khinyama sang phro!” 46 Mery è yao,“Gu lubu è Ithong shii laso phi muii ro; 47 Gu sbang yi lised mua ro nyieliieshii Hamangkhung-aphuii ne garo ragia ro, 48 Nyieliieshii gu shii ne awairo zum khiao duii rone inow phi ro!Ji è sudoh è thiwing branthek gu shii sang pha ro è ho ruii phro, 49 Nyieliieshii boh muna ne bajo blu Hamangkhung-aphuii pha è gu shii rek phi.Ai beng ne So ro; 50 Hanyie thek è aishii lab rek arone ithekshii ne blang thog dang pha ai bushun doh yi phro. 51 Ai awairo blu wad ji è phia srane ithek miphia nanemuphak rai jithek ne zab dayiingdayang rek muii phro. 52 Ai è blu sajathek shii ithek ro ithua è thazam khia muii phro,chiih-è are-ahopho shii laziung chiing phi ruii phro. 53 Ai è chi-iyiy pho shii ne wie muna phi ge phro,chiih-è bukhothek shii ne wad isloi thoh ge phro. 54 Ai è gethek achinmoithek shii sbang rek pha ji ne zab rek phi ro,chiih-è awai khiao Israel shii nong gieng pha wuii phro. 55 Ai ne idang athodang pha Abrahamnane zab airo riingthek shii nowkhlei ro!” 56 Mery ne Elizabeth rog shii habie uom thog pha rai marui ne awai hò hà dun din dun. 57 Elizabeth yi ani giak pha ishak rey mage shii, ai è ani yi dufuii jia giak khlei. 58 Ai ro hadung-haluii nane siangthek è, aishii Ithong è khinyama buang pha blia wie rek pha ji yoi srane, ithek de zab ai rog shii lubo rek gieng. 59 Ani ji yi damiley rey sha mage shii, ithek è aishii migiangkheg pha noh ne wuii dun, chiih-è ithek è ani beng yi ai aphuii beng Zekharia duiine ne beng pha saro. 60 Ji shii ai amuii è yao, “Asi! Ai beng ne Jon ruii chid phro.” 61 Ithek è aishii yao, “Jishii hì pha ibeng ne na siang hanyie shii de abeng ro!” 62 Ji è ithek è iphuii shii wad è khoh srane sai, hì pha bufuii beng ne nyie ruii pha now lei? 63 Zekharia è ithek shii zey pha lubao ithileg jia lia srane zey phi, “Hì pha ani beng ne Jon ro.” Ji è ithek ne zab wiengphleg dun! 64 Ji è rek dang pha ji shii Zekharia de miyao yao mua dinne ai Hamangkhung-aphuii shii laso phi pha jao. 65 Ji-è rek mage shii hadung-haluii pho ne zab rum dun, chiih-è ji pha mua ne zab phiingduii um pha Judea soh hà yoi thog dun. 66 Hanyie è ji yoi mage shii ji now srane sai, “Ji pha ani ne nyie rey pha um ga?” Hì ne izai ro Ithong pha blu ne ai rog shii um ro. 67 Jon ai aphuii Zekharia yi Ragung So è ley ne, chiih-è Hamangkhung-aphuii mua yao: 68 Cho gethek ne Ithong, Israel pha Hamangkhung-aphuii shii laso phi sha rai haro!Ai ne awai bran shii nong phi pha chiih-è sey ne noh phi pha wuii ro. 69 Ai è gethek shii awai khiao Dawid pha riing è bluRagia rek pha jia phijong ro. 70 Ai è buyo è awairo so chaigpho ji è sbang rekjong ro 71 Ji è ai ne gethek mak pho è,chiih-è hanyie è gethek shii snai pho pha blu è de ragia rek phi phro. 72 Ai è yao ai gethek pha achinmoithek shii bushun rek phi phro,chiih-è awai shiinyie ug pha ji de athoh pha nowphi phro, 73 73-74 Wie rek ne gethek ro blang Abraham shii shurua thak,ai è gethek shii gethek pha mak pho è ragia rek phi pha sbang rekjong phi ro,chiih-è gethek shii arum dang pha ai blia rek pha phijong ro, 75 Ji-è gethek sieng pha ishak shii,ai moe shii idang so nane gieng sieng ne rai chid phro. 76 “Gu ani, nane, Bajo Giu Hamangkhung-aphuii pha chaig rone è ho ruii phro.Nane Ithong pha ibi wuii sraneairo lumuii rab iang phro, 77 Nawai branthek shii yao bo nawaithek layogkhungjong arone ragia rey phro. 78 Gethek Hamangkhung pha aphuii ne bushun nane jum ro,ai è ichuang phi ne giawo gethek lakhung shii thog yi phro. 79 Chiih-è ai è igiia hà iy ne rai pho shii de hamang è khilieng phi ruii phro,liijiing pha lumuii hà de gethek shii gayiig noh phro.” 80 Ji pha ani ne sieng ne siu nane ragung ne gang rey dun ro, ai ne Israel pha bran moe khia pha nai athog sapho shii ne balimuang hà rai phro.

Luke 1 (BBT1E)

In Other Versions