Luke 1 (GGMNT)
1 Boncho Toofilosa nu achchan hanida yota gish daro asati bees hanida mala xaafida. 2 He taarikkezikka koyroppe denthidi ba ayfera be7ida markattine Xoossa qaala yoottidayti nuus aathiddayssa. 3 Taka ta baggara xaphoppe denthada keeha naagistadanne paaca xeellada taarikkeza wursa sinthe xaafistanaas bessizaysa sinthasada kaallidi xaafistanaas bessizaysa kaalethada naagettada nees xaafana mala taas lo7o gidi beettides. 4 Haysa wurssa ta oothizay ne tamaaridaysi tuma gididayssa nena ero guussassa. 5 5-6 Herdossay Yuda biittan kawottida wode Aabiya geettetiza qeessista halaqqa bagafe qeessetetha ootho taray iza gakida Zakarassa geetettiza issi qeessey dees. Iza machcheyaka Elsabeexxo geetetaysu, izaka Aaronne bagga asa. Nam7atika Goda azazonne iza woga wothoy bayndda naagidi dizaytanne Xoossa sinthan xillo asa. 7 Gido attin Elsabeexxa na yelonta makkara gidida gish istas nay baa, nam77atika wodey sugetida asa. 8 Zakarassay Xoossa sinthan qeessetetha ootho taray iza gakin izi oothishin 9 qeessistas diza woga mala Xoossa keeththan gelidi exxaane cuwassana mala exay iza gakkidees. 10 Exxaaney cuwattishshin asay wurikka karen diidi woosses. 11 Goda kiitanchay exxaaney cuwatiza sooppe oshacha baggara eqqidi Zakarasas beettides. 12 Zakarasaykka iza beyidi keehi dagammidi babbides. 13 Kiitanchay Zakarasas babbofa ne woossay setettides, ne machcheya Elssabeexxa nees attumma na yelana iza sunthaka ne Yanisa gaada sunthanna. 14 Iza yellistan neni daro ufa7istana, daro asaykka ufa7istana. 15 Goda sinthan izi gita gidana. woyneppe oothetida cajje gidinkka hara mathosiza usha gidinkka izi uyenna, izi buro ba aayye qanthen dishe xillo ayanan kumana. 16 Isra7eele asappe darota ista Xoossako zarana. 17 Aawata wozina ista naytaakko, azazettontaytikka gede xillota cincatethakko zaarana malanne Godas bessiza dere giigissana mala Elaasa ayananne iza wolqan Godappe sinthara izi baanna. 18 Zakarassay kiitanchas, tani cima ta machcheyakka cimadus tani hayssa aazan eranee? giidi oychchides. 19 Kiitanchaykka zaaridi tani Xoossa sinthan eqqiza Gabrelle. Tanika ha miishrachchoza nees gathanas kiitistada yadis. 20 Heko neni ba woden polistana ta qaala amanontta ixxida gish ne duunay muummaana, nenikka haasa7ana dandda7akka gides. 21 He wode derey Zakarassay Xoossa keethafe kezonta aazas gam77idakkonne giidi handadhettishe naagides. 22 Izi Xoossa keethafe kezidi asa haasa7isanas danda7ibeynna. malati malati bessoppe attin haasa7anas danda7onta aggin asay izi Xoossa keeththan Xoossafe ooratha miish beyddaysa erides. 23 Zakarasaykka ba ootho taray polettidappe guyyen ba so simmides. 24 Hessafe kaallin iza machcheya Elsabeexxa na qanthatadus, ichachchantho aginnay gakanas asi bena beyontta mala qotistadus. 25 Izaka Goday ba maarotan ta kadhetetha asa giddofe digganas ha wodezan hayssa taas oothides gadus. 26 Elsabeexxa qanthatidda usuppuntha aginan, Xoossi ba kiitancha Gabrelle, Galila biittan diza, Naazirete giza katama yeddides. 27 Izikka kawo Daawutte zereth gidida Yosefo geettetiza asas giiga utida Maaramo geetettiza geela7oyko kiitettides. 28 Yiidine iza dizaaso gelidi “hanne Xoossi nena anjjidare saro Xoossi Goday nenara dees nenika anjettidaro” gides. 29 Maarama kiitancha haasa7ani keha dagamada, haysi ay giza sarota gaada yoza keha qoppadus. 30 Kiitanchaykka Maaramo “Xoossi nenan ufa7etiza gish babbofa, 31 neni qanthatana, attumma naaka yelana, sunthakka Yesussa gaada sunthanna, 32 Izika gita gidana, wursofe bolla Xoossa na geetettana, Godaa Xoossay iza aawa Daawutte kawotetha izas immana. 33 Izi Isra7eelle nayta bollan medhinas kawotana, iza kawotethaskka wurisethi deenna.” 34 Maaramaka kiitanchas “tani adde gelabeyke, shin haysi waani hananee?” gaada oychchadus. 35 Kiitanchayka Maaramis “xillo ayaanaay ne bolla wodhana wursofe bolla Xoossa wolqay ne bolla kuwasa na hessa gish yellistana naazi geeshsha Xoossa na geetettana. 36 Asi yeluku iza makkara giidi haasa7iza ne dabboya Elsabeexxa cimatethan attumma na qanthatada yelanaas usupuntho aginna oykadus. 37 Xoossassi hanonta miishi baa.” 38 Maaramakka zaaradda hekko tani Xoossa aylle diikkina ne gida mala taas hano giin kiitanchay izippe shaakettidi biddes. Maarama Elsabeexxo beyana badus. 39 Maaramakka he wode matara eesota denddada pude geze deren diza issi Yuda katama badus. 40 Zakarassa keethe geladakka Elsabeexxo sarotadus. 41 Elsabeexxa Maarami sarotha siyida mala qanthan diza naazi izi qanthan guppides, Elsabeexxinkka xillo ayaanaay kumides. 42 Izaka ba qaala dhoqqu oothada hiz gadus “maccassa wursofe ne anjettidaro, ne qanthen diza naazikka anjetidaysa. 43 Ta Goda aaya taako yada tana oychanas tani oonee? 44 Ne sarotho qaala ta siyida mala ta ulo giddon diza nay ufaysan guppides. 45 Polistana giidi Goday izis yoottidaysa amaniddara iza anjjetidaro.” 46 46-49 Maaramakka izi ba aylleyi kawushshatetha xellida gish ta shemppiya Goda dhoqqu oothada bonchaysu. Ta ayanaykka tana ashshizza ta Xoossan ufa7istaysu. Wolqqama Goday taas giita miishshe oothida gish hachchife sinthan asi wuri tana anjjettidaro gaana. Iza sunthaykka geeshsha. 50 Iza maaretethay izas babizayttas na na gakanas daana. 51 Be wolqan daro mino ootho oothides ba wozina qofan otoretizayta laalides. 52 Kawota kawotethafe wothides, ashketta qasse dhoqqu dhoqqu histtides. 53 Gafidayta lo7o miishshan kalthides durista gidikko mela kushe yeddides. 54 54-55 Kase nu aawatas Abramesinne iza qommotas gida qaala naaganas ba maaretetha yushi qoppidi ba aylle Isra7eele maaddides gadus. 56 Maaramakka Elsabeexxi achchan heezzu agina sire gam7ada ba so simadus. 57 Elsabeexxis yelo gallassay gakin attumma na yeladus. 58 Izi guttattinne dabbottikka Goday izis gita maaretetha oothidaysa siyidi izira issife ufa7ettida. 59 Yellettida osppuntha gallas qaxaras yida. aaza aawa sunthan Zakarasa giidi sunthana koyida. 60 Gido attin aaya hanena, iza sunthi Yanisa geetetto gadus. 61 Istika izis ne dabbotappe Yanisa geetettidi xeysettida asi oonikka baawa gida. 62 Aaway Zakarassay naaza oona giidi sunthana koyidakonne malaatan oychchida. 63 Zakarasaykka xaafiza miishshe izas immana mala oychchi ekkidi sunthay “Yanisa” giidi xaafin asay wurikka malalettides. 64 Heeraka Zakarassa duunay pogettidi inxarssay birshettin Xoossa galata oykides. 65 Iza guttati wuri daro babbidda. Haysi wurikka dhoqqa geze biittan Yuda dereni, wurso son haasa7ettides. 66 Haysaka siyida asi wurikka ha guutha nay ay hananeeshsha? giidi hanoza wursika ba wozinan oykkides. Goda kushey tumappe izara issife dees. 67 Naaza aaway, Zakarassay xillo ayaanan kumidi tinbbite haasa7ishe 68 yiidi ba asa ashshidda gish Isra7eele Xoossi galatetto gides. 69 69-70 Beni wode ba geeshsha nabeta duunan haasa7ettidayssa mala ba aylle Daawute keeththan ashshizza woliqqa nuus denthides. 71 Izi nuna nu morketappene, nuna ixxizayta kusheppe ashshees. 72 Haysa izi oothiday nu aawatas ba maaretetha bessanassa, ba geeshsha caaqqoza yushi qoppanaasa. 73 73-75 Kase nu aawa Abrames caaqqidayssa qopana malane, nu morketa kusheppe izi nuna kessin nuni izas babboy baayndda oothanasinne, nu diza wode wurson ba sinthan nuna geeshshatethanne xillotethan essanassa. 76 Goda oge giigissanas ne izappe sinthara biza gish ta naazo neni woga Xoossa nabe geetetana. 77 Assay ba nagarappe maaretida gish deres attotetha erateth ne immana mala 78 nu Xoossa lo7o maaretethafe denddidayssan saloppe nuus away kezides. 79 Hessikka dhuman dizaytasne hayqqo kuwa garsan dizaytaskka po7isana malane nu tohotakka sarotetha oge kalethannassa. 80 Guutha naazikka diccides ayananka minnidees. Isra7eele asas qonccen beettanna gakkanaas bazo biittan deyides.