Luke 19 (BBT1E)

1 Isu yi Jerikho è dong ne wuiiramuii shii. 2 Thiisa hà Zakhaeus beng pha mijin thanpho pha boh bukho jia um. 3 Ai è Isu hanyie lei ne riig pha bidiang, jimagunde ai ne bran dum buii ne Isu shii ariig mua, nyieliieshii bajo ibrog um. 4 Ai yi ji pha lumuii è dong ne wuiiramuii rone, ji è ai ne Isu shii riig pha ibrog è ibi hà ran srane sykhamor hingmuii shii wiu. 5 Isu è ji pha ithua shii wuii thog mage shii, ai laziung riig srane Zakhaeus shii yao, “Khthiie buzam hà lung bo, Zakhaeus, nyieliieshii, sudoh gu ne na hò shii rai pha ro.” 6 Zakhaeus è khthiie nyiak hà lung srane bajo lubo ne aishii wie ho. 7 Zab pha branthek è ji riig srane jao ne mushiiy, “Hì pha bran ne biwen rek ne layogthek hò shii wuii dun ara!” 8 Zakhaeus è riu srane Ithong shii yao, “Noi bo, Masdo! Gu shii nyie um pha ji ne khoyo yie srane gu dushothek shii phi muii pha ro, chiih-è gu hanyie shii magunde nyie khlam ne yie magunde gu idoh wirang rek ne rang din pha ro.” 9 Isu è aishii yao, “Sudoh ichiih pha hò shii idang pha giawo thog ro, hì pha bran ai de, Abraham pha riing ro, 10 Bran Dufuii ne shand dun pha ji shii sow pha nane ragia rek wuii phro.” 11 Branthek yi nyanuii bamuii shii, Isu è athodang pha ji pha najang è dinne ithek shii yao. Ai yi Jerusalem hà thog sharuii, ithek è shii now shii Hamangkhung-aphuii pha Sajathua ji ne thog sha ruii ro. 12 Ji-è ai è yao, luang jia shii bran boh rek pha jia yi gai ruang pha soh hà saja rey ne idoh hò hà dun din pha phak. 13 Ai awuii ba pha ibi shii, awai khiao suathek shii ho srane san sikhi ji jia phi srane ithek shii yao, riig bo gu wuii dun pha ishak shii nathek hì pha rog shii Khinyama wiang mua pha ji wiang iang bo. 14 Thiih shii awai thiig pha branthek è aishii amiie sha, ji è idoh aishii yao pha ithek è muaphothek shii thoh ge, gathek ne hì pha bran shii gathek saja rek pha achid so ro. 15 “Ji pha bran ne saja rek marui srane idoh dun thog din. Ai è khthiie awai khiao shii yung srane ai moe shii wuii mage bo yao, nyieliieshii ithek è khinyama wiang lei ne ji riig pha ho phro. 16 Igobi shii jia è wuii thog srane yao, ‘Masdo, gu è na miphi pha san sikhi jia rog shii sua wiang doh ge ro.’ 17 Ai è yao, wie rek ge ro ‘Nane khiao wie ro! nane ìu blia shii rangde bajo isiie rek phi, ji è gu na shii rajan sua shii dumuii khoh yi pha ro.’ 18 Din ne khiao jia è de wuii thog srane yao, ‘Masdo, gu è na miphi pha san sikhi jia rog shii guii wiang doh phi ro.’ 19 Jishii de ai è yao, na shii de rajan guii shii dumuii rek yi phro. 20 Gai khiao jia è de wuii thog srane yao, ‘Masdo, naro san sikhi ne ichiih um ro; gu è yung thilek è bam srane ug ne ruii phi phro. 21 Gu ne na shii rum, nyieliieshii nane bajo nang bran ro. Nane naro asi pha ji de na è yie muii, chiih-è na muii asi magunde na è riug ne yie muii.’ 22 Ai è aishii yao, nane awie pha khiao ro! Gu ne nawai sem pha miyaogamthek ji è nawai shii the ruii phro! Gu ne nang ro è nane thieg, chiih-è gu ro asi magunde gu è yie muii, gu miihai asi magunde de gu è riug maphi. 23 Chiihphado na gu ro bang shii nyie rek ne beng hà achab aruii phi lei? Chiihphado gu idoh dun thog shii gu ne ji pha rog shii phua mua ne idoh nya yie din. 24 Chiihphado shii ai è hanyie thiichiih riu ne um phothek shii yao, ‘San sikhi ai è yie srane hanyie shii sikhi sua um pha ji shii phi muii bo.’ 25 Jishii ithek è aishii yao, ‘Masdo, aishii ne sikhi sua umjong ro!’ 26 Ai è chang, gu nathek shii yao ‘Hanyie shii um magunde aishii ne dinne phi din ruii phro, jimagunde hanyie shii oi magunde aishii ìujia um pha ji de yie din muii phro. 27 Thuh shii, hanyie guro mak phothek è gu shii ithek saja rey bo è achid pho shii de gu moe shii noh srane zab ua muii bo!’ ” 28 Isu è ji yao ched pha idoh shii Isu yi ithek ibi Jerusalem hà wuiiramuii. 29 Ai è sumaro pha phiing Bethphach nane Bethany hà wuii thog mage shii, ai è samoy nyi shii yung srane ibi thoh ge: 30 Ibi pha thiig hà wuii mage bo chiih-è iliing hà wuii thog shii, thiisa hà hanyie de a-in ba pha bambao jia phang ne um pha doh ruii phro. Ji pha bambao shii sey ne isa yie ruii bo. 31 Nathek shii hanyie magunde ji pha bambao shii nyie rek pha sey phlei ne sai ruii arone nathek è aishii yao bo, hì ne Masdo è chid muii ro. 32 Ithek sha hà wuii dun shii Isu è nyie khi-èrek yao lei ne ji duiine ne mua. 33 Ithek yi bambao phang ne um pha ji sey ramuii shii, ji pha muspho è ithek shii sai nathek ji nyie rek pha sey phlei? 34 Ithek è chang, “Ithong è chid muii ro,” 35 Chiih-è ithek è bambao shii Isu hà noh ne dun thog. Chiihphado shii ithek ro yung bambao lakhung shii goh srane Isu shii nong ba yi. 36 Ai è lakhung shii in mage shii, ithek è ibi lumuii hà yung wiao phi iang. 37 Ai Jerusalem hà sumaro um pha phiing buzam hà wuii pha lumuii shii thog mage shii, ai samoythek è zab blia bohthek doh pha ji è Hamangkhung-aphuii laso phi ne chiih-è aishii goh boh è ziak srane chiong phi: 38 “Hamangkhung-aphuii hanyie yi Ithong beng è wuii pha shii ne khirzey phi bo! Hamangkhung hà liijiing nane Hamangkhung-aphuii ro biisiie rey bo!” 39 Chiihphado shii ibrog è giak Pharisithek è Isu shii yao. “Masdo,” ithek è yao, “Naro samoy shii aro rabo è yung mage bo!” 40 Isu è chang, “Gu nathek shii yao phro ithek è aro pha rai arone, lubaothek awailum ne jao ne ziak ruii phro.” 41 Ai ji pha rajan moe hà wuii thog mage shii, chiih-è ai ji pha rajan shii riig srane choh, 42 ne yao, nathek sudoh shii liijiing ne khinyama mugak ji thieg arone! Jishii thuh shii nathek ne ariig mua sha phro! 43 Nathek gidiegpho è nathek shii zab pha ithua gung srane nathek lumuii shii de zab bin maphi pha ishak de thog ruii phro. 44 Ithek è ithek shii zab mua muii phro chiih-è branthek è ithek ro chan muduii shii de chuakbraig srane ji pha ithua shii labao jia de aruii phro, nyieliieshii Hamangkhung-aphuii è ithek shii ragia rek wuii shii ithek è ishak athieg! 45 Chiihphado è Isu Misiahò iliing hà wuii srane chong rek pho shii fuang hà gieng mage, 46 Ithek shii yao, “Hamangkhung-aphuii miyao ji ne ichiih jigigam shii zey ne um ro, Guro Misiahò ji ne sia pha hò ro è yao phro. Jishii ithek è mugothek ug ne rai pha hò rab muii!” 47 Nai tham ne Misiahò shii yua, phabi wegthek, Iphey yao pha masdothek, chiih-è dumuii branthek è aishii ua pha now, 48 Jishii ithek è aishii ji è rek pha nyie lumuii adoh phi, nyieliieshii zab bran è miyaogam jia de amuii yi pha airo miyao ji isiie è yoi.

Luke 19 (BBT1E)

In Other Versions