Luke 19 (TOMA)
1 Yesu lɛɛni Zeliko taazuʋɛ, é taai maaleʋe. 2 Zunui ta ɠɛni ná daaseigi ga Zasé, é ɠɛni ga mulu zo nuiti ta-ɠundiɠii, naa ʋoluma é ɓɛtɛni gola. 3 É ɠɛni pɔ ga é kwɛɛ, ɓɛ ɠa é ga Yesu. Kɛlɛ bɛbɛi maaʋele ma, é la ɠɛni zooni, tɔɔzei kpuɠaa ɠɛni de. 4 É ɓizɛni, é li ʋelelaʋɛ, é lɛ sikɔmɔɔl gului zu ga é Yesu ɠa, tɔɔzei naa ɠɛni leʋesu ga ná ʋele. 5 Yesu zeeliai ma náʋɛ, é ɠaazuwuzeɠeni, é ɠɛ Zasé ma: «Zasé, ʋilɛ fala, mazɔlɔɔ è-ma wɛɛn ɠa ga ze za.» 6 Zasé zuvilɛni ga ʋilɛga, é yeezei Yesu wu ga koozunɛ. 7 Zɔiti pɛ ti miná ɠaani, ti ɠɛni unsuyelii losu, ti ɗa ɠɛ ma: «É lia, é ɠɛ ga kotoba nui nuu ma wɛɛin.» 8 Kɛlɛ Zasé wuzeɠeni, é lo Maliɠii ɠaazu, é ɠɛ ma: «Màliɠii, woilo, nà kɔligi ɠilazuʋɛ pɛ fe ga vebɛanii bala nuiti bɛ. Zɔi nɔpɛ nà ɠɛ looni ma, nà nɔnɔi ʋotogi ve zea ga seizu naanigɔ.» 9 Yesu ɠɛni ma: «Kizogi lɛa pɛlɛi nii wu za, mazɔlɔɔ zunui nii ɓalaa ka ga Abalaame mavofodai ta. 10 Tɔɔzei Nu ná-Doun Zunui ʋaaʋɛ naati gaiziɛzu, é ti ɠizo, niiti ti loai ya.» 11 Tɛi nuiti ti ɠɛni woilosu naama wooiti ma, Yesu faalaali ɠila boni ti ma mɔnɔ, tɔɔzei maaɓuɠani niina Zeluzalɛme ʋa, tama nuiti ti ɠɛni ɠisiɛzu ga GALA ná-masadai ɠa ɠulazu kɛlɛma gaamanɔ. 12 É ɠɛni ti ma: «Zunui ta ɠɛni ná, nii é zɔlɔɔni seizumaanɛ pɛlɛi wu. É wuzeɠeni, é li zou zu, ʋɛ ná maaɠoozaai, nii a kɛ é masadai zɔlɔɔ, naa ʋoluma toɠa ʋa niina. 13 É ʋa ɠɛ é li, é ná-botiɠɛ nu puugɔ lolini, é wali ɠae puugɔ ɠaaɠwɛ ti ʋa, é ɠɛ ti ma: ‹À ɗa suyaaɠo, pàa laa yɔɠɔzu.› 14 «Kɛlɛ seiɲɔɠɔiti ti wɔinzeɠeni, ti keela ʋilɛni polu, ti ɠɛ ma: ‹Gi la pɔ ga zunui nii ʋa masadai ɠɛ gi unda.› 15 «É masadai zɔlɔɔgai ma, é ɠale ma, é ná-botiɠɛ nuiti tolini, niiti é wali veeni ti ya, é ɠɛ ti ɠonabo bɛ, é ʋilɛ yaaɠolai ʋa, ti kɛai. 16 «Ma mɔungi ʋaani, é ɠɛ ma: ‹Màliɠii, ɗa-wali ɠae ma lɔnɔgi ɠɛɛʋɛ ga wali ɠae puugɔ.› 17 Masagi ɠɛ ma: ‹Naa ʋagɛ, botiɠɛ nu ʋagɔi. Tɛi è ɠɛa ga lada nu faa goi zu, gè è zeiɗa taa wola puugɔ unda.› 18 «Felesiɛi ɓalaa ʋaani, é ɠɛ ma: ‹Màliɠii, ɗa-wali ɠae ma lɔnɔgi ɠɛɛʋɛ ga wali ɠae lɔɔlugɔ.› 19 Masagi ɠɛ ma: ‹Ɗa ɓalaa, gè è zeiɗa taa wola lɔɔlugɔ unda.› 20 «Taɠili ge ʋaani, é ɠɛ ma: ‹Màliɠii, wɛlɛ ɗa-wali ɠaei ʋa, nii gè makɛgai ba seɠe zakpai zu. 21 Mazɔlɔɔ gè ɠɛni luazu è ʋa, tɔɔzei ɗa ga zunui nii ná-fai wola ɓaai. Nii è la daani, naa ɠa ɗa ɗa seɠe. Moloi è la fazani, naa ɠa ɗa ɗa teʋe.› 22 «Masagi ɠɛni ma: ‹Botiɠɛ nu ɲɔuɲɔugi! Nà è lukpɔɠaaleʋezu ga è-laawooi nɔ. È ɠɛa kwɛɛni ga nà ga zunui nii ná-fai wola ɓaai, gè ɗa naa zeɠe, nii gè la daani, gè ɗa moloi leʋe, nii gè la fazani. 23 Lee vaa zu è la ɓena li ga nà-walii, è ʋa da ɓangei la? Naazu, siɛgi zu nà la ɠalena ma, nà la kula ta maalamai.› 24 «É ɠɛni koba nuiti ma: ‹À wali ɠaei ɠula zea, wo fe zɔi ya, nii puugɔi zea.› 25 Naati ti ɠɛ ma: ‹Wali ɠae puugɔ ɠa é naa ya!› 26 É ɠɛni ti ma: ‹Gè bo wo ma, zɔi ani zea, ta ɠa ve naa ya ʋolu. Kɛlɛ zɔi ani la zea, anɛɛ zɔɔgoi é zea, naa ɠa ɠula zea. 27 Zɔiti ma ti ga sìli nuiti, niiti ti la ɠɛa pɔ ga gè ʋa masadai ɠɛ ti unda, à ʋa ga tiye ʋɛ, wo ti ɠɔdaaleʋe gàazu.› » 28 Yesu naama wooiti bogai ma, é toni da, é ɗa li ga Zeluzalɛme ʋele. 29 Siɛgi zu é maaɓuɠani la Ɓɛtefazé ʋa ta Ɓetani, Wolive ɠizei ɠobaʋɛ, Yesu ná-kaladopo felegɔ leʋeni, 30 é ɠɛ ti ma: «À li taa goi nii zu, é wo luɠɔ. Wa lɛɛna, wa soovale ziʋoi ta ɠaazu, giliai, nii nu nɔpɛ ge la dɛ zeini kɔma. À fie, wo ʋaa la ʋɛ. 31 Ni nu a wo ɠaazaɠana ga: ‹Lee vaa zu wo fiesu?›, wa ɠɛ ma: ‹Màliɠii ɓɛdɛi ɠa ba.› » 32 Keelai niiti ti liini, ti faiti kaani nɔ, ʋelei Yesu boni la ti ma. 33 Tɛi ti ɠɛni soovale ziʋoi viesu, ma nuiti ti ɠɛni ti ma: «Lee vaa zu wo soovale ziʋoi viesu?» 34 Ti naati gooɠaaʋoteni, ti ɠɛ ma: «Màliɠii ɓɛdɛi ɠa ba.» 35 Ti liini ga soovale ziʋoi Yesu ʋɔ, ti ta-zeɠe wolaiti pɛ kɔma, ti Yesu lɛ, ti sei kɔma. 36 A la ɠɛna ziaa, nuiti ti ɗa ta-zeɠe wolaiti pɛɛ pelei zu. 37 É maaɓuɠaai ma Zeluzalɛme ʋa, Wolive wulu ɓelei ma ɠizei yeizuʋɛ, kaladopoiti ti-ma ʋɛbɛ wolai laaveni ga koozunɛɛi, ti tɔɔzei ga GALA maamusɛa ga woo wola, tɔɔzei laavɔɔ vaiti ba, niiti ti ti ɠaani. 38 Ti ɠɛni ɠɛɛzu ma:«Maliɠii tuya loo masagi ʋɛ, nii é ʋaazu daaseigi zu!Ziilɛigi ɠɛ geeɠɔlɔgi zu, lɛbiyai ɠɛ GALA bɛ geeɠɔlɔgi ungaʋɛ!» 39 Faliziɛin tanigaa ti ɠɛni bɛbɛi zaama, ti ɠɛni Yesu ma: «Kalamɔn, zelii lo ɗa-ɠaladopoiti ma, ti maaɠɛ kpɔ!» 40 Yesu ti wooɠaaʋoteni, é ɠɛ ti ma: «Gè bo wo ma ga gaamai, ni ta maaɠɛna kpɔ, kɔtuiti ka ta ɠɛ ɓainsu!» 41 Tɛi Yesu ɠɛni maaɓuɠazu taai ʋa, é kaai ma, é ɠɔlɔni ná-faa zu. 42 É ɠɛni ma: «Ni ɗa ɓalaa è ɠɛni kwɛɛni naama volo nuu, ʋelei ɗa ziilɛigi zɔlɔɔ da! Kɛlɛ wɛlɛna kae, é lɔɔɠua è ʋa. 43 Foloi tanigaa ta ʋaazu è ma, siɛgi zu è zili nuiti ti è maaɠakusu la ga kɔɔɠɔ aniiti, ti è zei kɛlɛ su, ti ɗa è ɓakpa pele ungi pɛ su. 44 Ta wo zuɠoloɠolo mɛtu, wa ɗa-nuɓusɛiti, ti la ɗa-ɠɔtui gila kpalaa zɛga laani bɔɔla maazu, tɔɔzei è la kɛɛni, è ʋa naama voloi ɠwɛɛ, yeei GALA ge ʋaa la è ʋɔ.» 45 Yesu lɛɛni GALA sei ʋɛlɛi ma ɠoizuʋɛ, é tɔɔzei ga yaaɠoiti kpɛa, 46 é ɠɛ ti ma: «Sɛʋɛʋɛ GALA Sɛʋɛi zu ga: ‹Nà-pɛlɛi ɠa loli ga GALA fali ʋɛlɛi.› Kɛlɛ wɔun, wo ná ɠɛa ga toosu nuiti dɔɔɠuzuʋɛ.» 47 Folo-o-folo Yesu ɠɛni kalagi wosu GALA sei ʋɛlɛi wu. Zalaɠa ɠula ɠundiɠiiti ta tɔ kalamɔinti, naa ʋɛɛ nuɓusɛiti ta-ɠundiɠiiti ba, ti ɠɛni keleɠele gaiziɛzu ga ti pa. 48 Kɛlɛ ti la ɠɛni kwɛɛ, ʋelei ta kɛɛ la, tɔɔzei nuɓusɛiti pɛ goiloga ɠɛni de goo ma.