Luke 19 (YAPE)
1 Me yan Jesus ngalan yu Jeriko ni nge th’ab lan binaw nge yan. 2 Ma bay be’ ni pilungen e tamukun tax u rom, ni Zakeus fithingan, nib pire’ ban’en rok; 3 ni be guy rogon ni nge guy ko mini’ Jesus, machane re mo’on nem e be’ nib ngoch, ndabiyag ni nge guy Jesus ni bochan e pi girdi’ ni ba’aram nib pire’. 4 Ma aram me mil nge yan i m’on rok fapi girdi’ ni pire’ me yan nga l’ugun ba ke gek’iy ni sycamore ni fan e nge yag ni guy Jesus ni bay yib nge yan ko gin’em. 5 Ma fa’ani yib Jesus ko re gin’em me sap ngalang me ga’ar ngak Zakeus, “Zakeus, mu gur nigem ngam luw nga but’, ya thingar gu par u tabinaw rom e daba’.” 6 Me gurnag Zakeus ir nge luw nga but’ nge yib ngak ni kari felfelan’. 7 Ma urngin e girdi’ nra guyed ni aram rogon e ra tababgad ko gun’gun’ ni be lungurad, “Re mo’on ney e ke yan nga tafen be’ nib tadenen!” 8 Me sak’iy Zakeus ngalang nge ga’ar ngak Somol, “Somol, mu tiyilim! Bay gu pi’ baley ko tin ni bay rog ban’en ngak e pi’in gafgow; ma fa’anra kug bannag be’ kug fek e tirok’, ma bay gu fulweg ngak ni aningeg yay e ke mun ngay.” 9 Me ga’ar Jesus ngak, “Kanawo’ ni nge thap e girdi’ riy ngak Got e ke taw ko re naun ney e daba’, re mo’on ney e ku errogon ni ir be’ ni owchen Abraham. 10 Ya en ni Fak e Girdi’ e ke yib ni nge gay ma nge thapeg ngak Got e pi’in kar maloggad.” 11 Ma aram me weliy Jesus ba fanathin ngak e pi’in nrung’aged ni yog e re bugithin ney. Re ngiyal’ i n’em e ke chugur ni nge taw nga Jerusalem, ma yad be finey ni gagiyeg rok Got e kari chugur ni nge m’ug. 12 Ma aram me ga’ar, “Immoy be’ nib tolang ni yan nga ba nam nib orel ni ngan pilungnag riy nge mu’ me sul nga tafen. 13 Ma dawori yan me kunuy e tapigpig rok ni yad ragag, me bagayad me pi’ reb e salpiy ni gol ngak, me ga’ar ngorad, Mu guyed rogon ngam maruwelgad ko chi salpiy ney ngam thog niged e salpiy riy ko ngiyal’ nda kug moy romad. 14 Ma fanenikan e girdi’ ko nam rok daken, ma aram miyad l’oeg boch e girdi’ ngar leked ni ngranod rogned ni nge lungurad, ‘Dabumad e re mo’on ney ni nge mang pilung romad.’ 15 “Min yan ni pilungnag fa’anem nib tolang nge sul. Ka chingiyal’ nem me yog ngak e pi tapigpig rok ni yad faram e pi’ e salpiy ngorad ni ngarbad nga p’eowchen ni fan e nge nang ko uw urngin e salpiy ni kar thog niged ko fapi salpiy nra maruwelgad ngay. 16 En nsom’on e yib ngak me ga’ar, ‘Fa binem e salpiy ni mpi’ ngog e kug maruwel ngay ma nga ragag e salpiy ni gol ni kug thognag riy.’ 17 Me ga’ar, ‘Bfel’ e maruwel ni kam tay; i gur reb e tapigpig ni gab fel’! Bochan e kam yul’yul’ ko tin ni ba’achig ban’en, ma aram e nggu tiyem ni ragag e binaw e nge milfan ngom ngu’um gagiyegnag.’ 18 Ma bin migid e tapigpig e yib me ga’ar, ‘Fa binem e salpiy ni mpi’ ngog e kug maruwel ngay ma nga lal e salpiy ni gol ni kug thognag riy.’ 19 Me ga’ar ngak fa’anem, ‘I gur e lal e binaw e nge milfan ngom ngu’um gagiyegnag.’ 20 Me yib bagayad fapi tapigpig me ga’ar, ‘Ba’aray fare salpiy rom ni gol; gu mithag ngalan bangi mad. 21 Ug tamdag ngom, ni bochan e gur be’ ndamur runguy be’. Ya ga ma fek e tin ni gathi tirom ban’en, ma ga ma fek e tin ni gathi gur e mu yung.’ 22 Me ga’ar ngak, ‘I gur reb e tapigpig ni gab tagan! Thin ni kamog e ir e bayi turguy e gechig rom! Ga manang ni gag be’ ndagur runguy be’, ma gu ma fek e tin ni gathi tirog ma gu ma fek e tin nda gu yung. 23 Ere mang nda mu tay e salpiy rog ngalan e bank? Nggu sul mu gu fek nike yib e win ngay.’ 24 Ma aram me ga’ar ngak e pi’in yad ba sak’iy u rom, ‘Mfeked fare salpiy ni gol rok ngam pi’ed ngak fare tapigpig nragag e salpiy ni gol ni bay rok.’ 25 Me lungurad ngak, ‘I ir e nga ragag e salpiy ni gol nike yag ngak!’ 26 Me fulweg ngorad ni ga’ar, ‘Nggog ngomed ni en ni bay ban’en rok e kab pire’ e tin bay ni pi’ ngak; ma en ndariy ban’en rok e mus ko chu’uw i n’en ni bay rok e bay ni fek rok nge chuw. 27 Ere pi cha’ney ni to’ogor rog ndaburad ni nggu mang pilung rorad e ngam feked yad i yib iray ngam li’ed yad ngarm’ad u p’eowcheg!’ ” 28 I yog Jesus e re bugithin ney ngorad nge mu’ me yan nga Jerusalem ni be m’on rorad. 29 Ma fa’ani chugur nga Bethfage nge nga Bethany ko burey nu Olive, me l’oeg l’agruw i gachalpen ngar m’onow 30 nike ga’ar ngorow, “Mmarow ngalan e re binaw ni ba’aram ngam’on romew; ma nap’an ni gimew ra yan ngalan binaw ma bay mpir’egew ba pifak e dongki ni kan m’ag gafan ndawori af be’ nga daken bi’id. Mi gimew pithig gafan ngam fekew ngaray. 31 Ma fa’anra fithmew be’ ni ga’ar, ‘Mangfan e binir ni gimew be rin’?’ me lungumew ngak, ‘Bay e tin nge rin’ Masta ngay.’ ” 32 Mranow miyow pir’eg urngin ban’en ni bod rogon ni fa’ani yog Jesus ngorow. 33 Ma nap’an ni yow be pithig gafan fare pifak e dongki, me ga’ar e pi’in fakrad fare dongki ngorow, “Mang ni gimew be pithig gafan?” 34 Miyow fulweg ni lungurow, “Bay e tin ni nge rin’ Masta ngay,” 35 mra fekew fare pifak e dongki i yib ngak Jesus. Ma aram miyow yin’ wuru’ e mad rorow nga daken fare gamanman miyow ayuweg Jesus nge af nga daken. 36 Ma nap’an ni be yan ni bay u daken fare gamanman, me filath e girdi’ wuru’ e mad rorad nga daken e kanawo’. 37 Ma fa’ani chuchugur nga Jerusalem, ko fa gin’en ni yan e kanawo’ riy ko burey nu Olive nga pe’ning, ma fapi girdi’ ni pire’ ni pire’ ni pi gachalpen e ra tababgad i pining e magaer ngak Got, ma yad be yog e sorok ngak ni ba ga’ lungurad ni bochan urngin fapi maang’ang ni kar guyed ni be lungurad, 38 “I Got e nge ayuweg e en ni pilung ni ir e ke yib ni owchen Somol! Gapas e bay u tharmiy, mi Got e ke sorok!” 39 Ma aram me non boch fapi Farise u fithik’ fapi girdi’ ni yo’or ngak Jesus ni lungurad, “Tamchib, mu non ngak pi gachalpem ngar th’abed gulungrad!” 40 Me fulweg Jesus ni ga’ar, “Nggog ngomed ni fa’an yad ra th’ab gulungrad, mra mang malang e tolul.” 41 Me chuchugur i yib ko fare binaw, ma fa’ani guy me yornag, 42 ni be ga’ar, “Fa’an mang e aray rogon ma kamnang e daba’ e n’en ni ir e ra fek e gapas i yib ngom! Machane chiney e dabiyag ni ngam guy! 43 Ya bayi taw nga boch e rran me yib e to’ogor rom ngar cholngobiyed gur ko yoror ni but’ nge malang, mu ur bad i yib ngom u gubin yang. 44 Ma bay ra kireb niged gur nge girdi’ ni bay u lan e yoror rom; ma dariy ta’reb e malang ni yad ra pag u tagil’, ni bochan e de pow rom e ngiyal’ ni yib Got riy ni nge thapegem ngak!” 45 Me yan Jesus ngalan e Tempel me tabab i tuluf nga wean e pi’in yad be folchuway’, 46 ni be ga’ar ngorad, “Bay ni kan yoloy u lan e babyor nib thothup nike ga’ar Got, ‘Naun rog e bay nog nib naun ntafen e meybil.’ Machane kam thiliyeged kam ted nike mang bangi n’en nma mith e moro’ro’ riy!” 47 Ma aram mi i machib Jesus u lan e Tempel ni gubin e rran. Ma pi tolang ko prist, nge pi tamchib ko Motochiyel, nge pi’in yad ma yog e thin e ra fineyed ni ngar li’ed Jesus ngem’, 48 machane de pat ngorad rogon ni ngar rin’ed, ya urngin e girdi’ ni kar pired ni yad be motoyil ngak Jesus, ndaburad ni nge yan ta’ab bugithin nike yog ndar rung’aged.