Mark 6 (BBT1E)

1 Ji è rek marui ne Isu ne ji pha ithua thoh srane awai samoythek shii noh ne awai thiig pha hò hà dun marui. 2 Jewthek Thung pha Inai shii, ai è Hamangkhung-aphuii ro Jewthek misiahò hà wuii srane jao ne yua. Ai miyao nuii pho thek de bajo um, ithek ji pha miyao yoi mage ne, zab wiengphleg dun. Ithek è awaithek chung sai rai, “Ai ne buangthek ne khi-è ìd ne yao dun phlei? Aishii ne khi-èrek pha khani zen ne ruii phlei?” “Ai ne hìthek wieng pha blia ne khi-è mua phlei? 3 Hì pha bufuii ne Mery pha dufuii chiih-è Jems, Joseph, Judas chiih-è Simon thek pha khuiino, zao rab ne rai pha ji asi bey? Ai bumuii ne ichiih shii rai pha ji asi bey?” Ji è yao srane thiichiih pho thek è aishii snai mua phro. 4 Isu è ithek shii yao, “chaig pho shii ne awai hò, awai thiig, awai bran, awai haliing pho thek è wie anow phro, jishii gai thek ne aishii wie now ruii phro.” 5 Ji-è ai ne thiichiih shii nyie bliathek de arek mua phi, wad riie ne rad pho shii kho ne gang phi bie marui. 6 Ai ne bajo buangthek arek mua, nyieliieshii, ithek è aishii migi arek phi ro.Chiihphado Isu è thiichiih inui shii um pha thiigthek hà wuii srane ithek shii miyao ji yua ne rai phro. 7 Ai è awai samoy snanyi thek shii ho srane nyi nyi rek ne thiig jithek hà thoh ge phro. Ai è ithek shii ibuii ragung thek shii khia pha riichai phi srane thoh ge. 8 Chiih-è ithek shii yao, “Nathek rog shii thagin yi bie ne nyie de ayie chiid rabo, iweb, bang chab pha shukhug biia, chiih-è, michie pheg ne chie pha bang thek de ayie chiid pha lua bo. 9 Lakhia ne khia bo, jishii, lai ne guii pha phadiigthek ne ahan chid rabo.” 10 Ai è dinne ithek shii yao, “Hanyie è, ithek shii wie ho ne hò hà rai yi arone, nathek ne ji pha thiig athoh sapho shii ne ji pha hò shii rai bo. 11 Chiih-è ithek ne khi pha thiig shii wuii thog shii, ji pha thiigpho è nathek miyao nuii ne ithek shii ho ne arai yi arone, ithek ne ji pha thiig thoh ne dun juang shii, nawai thek lakhia pha nyiakphlab thiichiih kham ne fen srane dun marui bo. Ji rek phane ithek shii diig thog yi pha phriie marui phro.” 12 Ji è yung ched ne ai samoythek è thiigthek hà miyao ji yua ne ithek layog rek pha ji è thadoh dun yi pha wuii dun. 13 Ithek è ibuii ragung jiang pho thek shii khia phi, chiih-è, rad pho thek shii de thiiliie è shun srane gang phi phro. 14 Ji è rek ched mage shii Herod Saja è jithek rek pha zab yoi dun, nyieliieshii, Isu pha beng ne bajo boh re dun. Chiih-è giak è shii yao shii, “Ai ne khowo phi pha Jon ji idoh hòi ne dun thog din ara! Ji-è aishii ne buangthek rek pha blu de um ro.” 15 Giak è yao, “Ai ne Elija ro.”Giak ne, “Ai ne buyo pha chaig pho duiine ro.” 16 Herod Saja è ji pha miyao nuii srane yao, “Ai ne khowo phi pha Jon ji bey! Ai khrug shii ne tham jong muii bidey ne, dinne ai ne hòi dinne bey!” 17 Herod awai è yung ne Jon shii zum ne, shiirnai rek ne phang ne phatheg iliing hà chab muii phro. Ji è rek phane Herodias muyung ne rek yi ro, ai ne ikhuii Philiph pha yiy shii Herod awai yi din dun. 18 Jon è Herod Saja shii athodang pha yao ne rai, “Na ne nawai khuii pha yiy ji yi phane Iphey shii zen oi ro.” 19 Ji è yao pha idoh è Herodia Sajamuii (Herod pha yiy) ne bajo lijieg srane Jon shii ua yang pha now phro, jishii, thaluii shii ne a-ua mua phi, nyieliieshii Herod Saja um niing muii. 20 Herod Saja ne Jon shii bajo rum, nyieliieshii, Herod Saja è Jon ne bajo wie chiih-è bajo gang bran rone thieg dun. Ji-è ai ne Jon shii wie gayiig ne ruii, ai ne Jon miyaothek è lubu shii liijiing oi magunde, ji pha miyaothek ne bajo wie now ne nuii ne rai dun. 21 Ji è rek magunde, Herodia Sajamuii è inai jia shii zo mua ne, ji pha inai ne Herod Saja giak pha inai ro, Herod Saja è dumuii boh pho, shii è arming pha boh thek chiih-è Galili thiig pha wegthek shii ho ne michie phi ramuii shii, 22 Herodia dimi è iliing hà wuii ne gasiu siu srane Herod Saja chiih-è ai biwen thek shii bajo lubo rek phi, ji-è, Herod Saja è awai dimi shii sai, “Nane nyie chiid pha now lei? Chiih-è nane gu shii nyie lia magunde, gu ne nyaphi ruii phro.” 23 Ai è surua thok srane yao, “Na è nyie lia magunde, gu, na shii ji phi ruii phro, guro Sajathua ji khuyo lia na de nyaphi ruii phro.” 24 Dimi ji è fuang hà wuii srane ai amuii Herodia shii sai, “Gu ne nyie lia chiid phlei?”Ai amuii è yao, “Khowo phi pha Jon ro khrug lia mage bo.” 25 Ji-è ai dimi ne khthiie iliing wuii din srane Herod Saja shii lia, “Gu ne na shii Jon khrug lia phro, Jon khowo phi pha khrug tham ne phandua shii giong ne thuh shii phi-dang mage bo.” 26 Jipha miyao è Herod Saja ne bajo zo dun, jishii ai dimi shii agak mua, nyieliieshii, ai è biwenthek moe shii surua thok jong muii ro. 27 Ji-è ai ne Jon khrug tham pha awai sandrithek shii thoh ge phro. Ji è yung mage ne ji pha sandri thek ne phatheg duchoi hà wuii srane Jon ro khrug tham mey phro. 28 Chiih-è ji pha Jon khrug ne phandua lakhung shii giong srane awai dimi shii phi ro, ai dimi ji è choi srane ai amuii shii yi ne phi din phro. 29 Jon pha samoy pho è ji pha mua yoi mage ne wuii srane iy pha siu ji yi ne wieng mua phro. 30 Ji phado samoythek ne Isu shii dun thog srane ithek è nyie thek rek ne yua marui pha jithek yao phi. 31 Thiichiih shii de ithek è Isu chiih-è ai samoythek shii chie pha de uhug oi dang pha wuii ruii mage. Ji-è Isu ne awai samoythek shii yao, “Cho! Gethek ne liijiing pha ithua hà dun sharai haro, chiihphado gethek de ìujia ne thung pha mua ruii phro.” 32 Ji-è ithek ne liijiing um pha ithua hà thog yi pha run shii in ne wuii dun. 33 Ji è rek magunde, Isu chiih-è samoythek ne ithek moe è yo pha rek muii rone ibi than dun, chiih-è, Isu ne hanyie ga ji thieg muii pha ji è, ithek ne gai thiig è dong ne lua pha lumuii è ran srane Isu chiih-è ai samoythek wuii thog pha ibi hà rai iang phro. 34 Isu run è fuang lung mage shii, thiichiih shii bajo ibrog um iang mage ne ai lubu ne iy dang pha bushun now dun phro, nyieliieshii, ithek ne brapho oi pha shiishai duiine um iang, ji-è ai ne, ithek shii bajo miyao jao ne yua. 35 Ji è rek ne rai shii, bajo chia dun pha ji è habjuang re sha pha rek mage ne, ai samoythek è ai moe shii wuii srane yao, “Gethek ne bajo chia jong dun ro, ichiih shii ne thiigthek de inui oi pha ithua ro. 36 Ithek shii thoh sha mage bo, chiihphado, awaithek è thiigthek chiih-è raighò sow srane awai thek chie niing pha nya pheg mua phro.” 37 Isu è yao, “Nathek ne ithek shii chie pha phi mage bo.”Ithek è Isu shii sai, “Gathek è bajarai hà wuii srane luman simedthek wieng nyi pha iweb pheg ne phi ne chie yi pha yang bey?” 38 Ji-è Isu ne ithek shii sai, “Nathek shii khinyama iweb um lei ne riig mage bo.” Samoythek è ithek shii sai ithek shii iweb khinyama um lei, ithek è yao gathek shii ne iweb guii chiih-è ù nyi um bie ro. Ji-è ithek è Isu shii yao, “Iweb guii chiih-è ù nyi um ro.” 39 Ji è yao mage ne Isu è awai samoythek shii yung, “zab thek shii ibrog yo rek ne saing lakhung shii dug yi bo.” 40 Ji-è ithek ne ibrog yo rek srane dug iang yi, giak ibrog shii ne wieng jia, chiih-è giak ibrog shii ne saguii rek srane dug dun ro. 41 Chiih-è, Isu è iweb guii chiih-è ù nyi ji yi srane hamangkhung hà mau ne Hamangkhung-aphuii shii laso phi. Chiih-è, iweb ji chiing ne phed srane awai samoythek shii phi ne ithek shii thang yi. Chiih-è, ù shii de thang yi. 42 Ji-è ithek ne lumuii dang pha chie dun. 43 Chiihphado samoythek ne led pha iweb chiih-è ù thek sirid snanyi ley dang pha khrab gieng phro. 44 Thiichiih chie noh pho ne itham guii ro. 45 Luangjia shii, Isu è thiichiih wuii pha ibrogthek dun ge yi shii, awai samoythek shii de run shii in ne Bethsaida pha khabang thrang hà wuii iang pha thoh ge. 46 Ithek shii wie dun bo ne yao ched shii Isu awai de phiing hà sia pha wuii dun. 47 Jipha habjuang re mage shii, run ne khabang pha duchoi hà thog ne um dun, Isu ne awai ji khabang thrang hà rai ramuii shii, 48 Isu è awai samoythek shii run iliing hà bajo diigchiao rek ramuii pha doh ruii, nyieliieshii, Hasamkhanoi khed ramuii pha ji è ithek run ne shao thiwie pha rek dun. Ji-è Isu ne hamiang riang shii kho lakhung è lua ne samoythek moe hà wuii ruii, 49 Isu ithek moe thog pha re ramuii shii Isu è kho lakhung shii lua mage ne ithek ne zab rum ne ziak ne yao, “Ai ne ibuii ro!” 50 Ithek è aishii doh mage ne zab rum dun phro.Isu è ithek shii yao, “Arum chiid pha lubu boh now mage bo! Hì ne gu ro!” 51 Ji è yao srane awai de samoythek rog run shii in mage shii Hasam de awai lum ne them dun. Ji è rek mage ne samoythek ne zab wiengphleg ne wieng dun. 52 Nyieliieshii ithek ne Isu è itham guii bran shii iweb chiih-è ù phi ne chie yi pha miyao siu ne agao mua pha diig ne rai dun. 53 Ithek ne khabang ji hiìa ne Genesareth beng pha soh shii wuii thog, thiichiih shii ithek è run ne phang ne ruii marui srane lung dun. 54 Ithek ne run è nyalung dang shii, ithek è Isu shii ibi thieg dun. 55 Ji è ithek ne thiig hà ran srane zab shii yao iang, chiih-è, khinyama rad pho um phane Isu khi shii um pha ji shii noh ne wuii thog srane biang shii thieng yi. 56 Isu è khinyama pha thiig raig chiih-è bajarai hà wuii thog nede, ithek è khinyama rad pho um pha chiih-è chongjai rek pha ithua shii noh srane ai yung shii ìujia magunde khoh yi pha ithek shii khung ne lia phro. Hanyie è ai yung khoh mua pho ne zab gang dun phro.

Mark 6 (BBT1E)

In Other Versions