Revelation 1 (BBT1E)

1 Hì pha jigigam ne Isu Masi è dong pha miyaothek ji sasab rek ne ruii. Khthiie nyie rey ramuii pha ji ne awai khiaothek shii doh yi pha Hamangkhung-aphuii hì pha dong aishii phi. Masi è hì thek pha manathek airo khiao Jon shii thieg yi pha airo hamangkhliie yi aishii thoh ge, 2 chiih-è Jon ai è nyie doh pha ji yaojong ro. Hì ne Hamangkhung-aphuii ro mua è ò chiih-è izai ne Isu Masi re-è dong phi rone hì ne airo phosro ro. 3 Hanyie jia magunde hì pha jigigam tham pha ne bajo sang ro, chiih-è hanyie è chaigthek pha mua pha miyaogamthek ji yoi ne jigigam shii nyie zey ne um pha ji nuii pho ne bajo sang ro! Hì thek pha manathek rey ruii pha ishak ne nui sha ro. 4 Asia du-ùa pha miley charch shii Jon re-è:Bushun nane liijiing ne nathek shii Hamangkhung-aphuii re-è ro, hanyie yi um, hanyie yi umjong, chiih-è yi wuii ramuii pha ji, chiih-è airo biang moe shii è miley ragung um pha ji è, 5 chiih-è Isu Masi è, isiie khagi, igobi iy pha ji re-è hòi ne hanyie yi sohjambling pha sajathek lakhung shii khoh ro.Ai ne gethek shii miie ro, chiih-è airo iy ne zid pha ji è ai è gethek ro layogthek è ichad rek 6 chiih-è airo Hamangkhung-aphuii nane Aphuii ro blia rek pha gethek shii phabithek pha sajathua rab phi. Isu Masi shii biisiie nane blu ne idang nane idang rai bo! Amen. 7 Riig bo, ai ne sakhamiingthek lakhung è wuiiramuii ro! Hanyie aishii giao pho è lao ne, zab aishii doh ruii phro. Sohnyiak pha zab branthek ne ai lakhung shii zo ruii phro. Ji-è ji rey ro! 8 “Gune igobi nane idohhè ro,” Hanyie yi um, hanyie yi umjong, chiih-è hanyie ne wuiiramuii ro Ithong Bohblu Hamangkhung-aphuii è yao ro. 9 Gu ne Jon, nathek ro khuiino, gu ne Isu rog luagieng chiih-è airo Sajathua è thog pha nathek ro diig shii lubu phiang rek ne zud pha gu ne nathek ijak ro. Gu shii ne Phathmos pha gachung shii ruii muii nyieliieshii gu ne Hamangkhung-aphuii ro miyaogam nane Isu è dong pha izai ji yao phi. 10 Ithong pha inai shii Ragung è gu shii phrai ne noh dun, chiih-è gu ne gow gang jia yoi, ji ne thu-ung duiine rone, guro idoh re-è yao. 11 Ji è yao, “Na è nyie doh pha ji zey bo, chiih-è Jigigam yi rajan miley pha Charchthek: Iphisus, Smyrna, Phergamum, Thyathira, Sardis, Philadelphia, nane Laodisia shii thoh ge bo.” 12 Gu shii hanyie mulo lei ne gu è idoh khid ne shan ne riig shii, gu è san pha bunthruak miley doh, 13 chiih-è ithek duchoi shii bran duiine, yung yi awai lai shii thog pha guii pha duiine chiih-è ai rinyie shii san pha rathang reing pha duiine doh ro. 14 Airo khaziang yi miiriing mo nane imo hayun mia, chiih-è airo mieg yi bai duiine hùb; 15 airo lai yi bala duiine khilieng chuang, chiih-è airo gow yi khasuang è ro pha duiine ro. 16 Ai è awairo phazoi wad shii dadiangthek miley khoh, chiih-è irey nyi um pha khamriie jia ai sem è fuang khia thog. Airo mizia ne inai duchoi pha hasiang duiine chuang. 17 Gu aishii doh mage shii, gu ne ai lai shii bran iy duiine chiih dun. Airo phazoi wad è gu lakhung shii khoh srane yao, “Arum rabo!” Gu ne igobi nane idohhè ro. 18 Gu ne isieng ro! Gune iy dun, Jishii thuh gu ne idang nane idang isieng. Gu ne iy pha lakhung shii riichai um ro chiih-è iypho ro sohjambling pha lakhung shii de riichai um ro. 19 Chiihphado, na è manathek doh pha, nyimanyi thuh shii um pha manathek nane idoh shii rey ramuii pha manathek shii zey bo. 20 Hì ne na è guro phazoi wad shii doh pha miley dadiangthek nane san pha miley bunthruakthek pha ug pha miyaosiu ro: Miley dadiangthek ne miley charch pha hamangkhliiethek ro, chiih-è miley san bunthruak ne miley charch ro.

Revelation 1 (BBT1E)

In Other Versions