Revelation 1 (KBT1ETNIK)

1 Hiwa larik hin Jisu Christa in imalar ngaikha injia. Pathian in ama suokngai diang innot theiya kasuoksik ngaikha minmunasik Christa diang amalar. Christa in asuok John diang ama marwaan tirton inkhat ajuotirra aminjetjei, 2 Halli John in imu rakip ngaikha arilsuokjei. Hiwa hi-eii Pathian diangnga inphut chongpui khat-um Jisu Christa in imalarjei akadik ngaikha. 3 Hiwa larik akateel mi kha rawaan katha eii, hiwa larik suungnga injia chongmalar chongpui ngai karangai khat-um akajui mi ngaikha rawaan katha in-eii! Ajarchu hiwa rakip suoknasik apha kha anaijei. 4 John diangnga inphut Asia ramsuungnga kaom koisuok sari ngaidiang:Tuun Pathian ka-eii, matiang um Pathian ka eii, khat-um akajuosik Pathian diangnga inphut, halli ama reng in-ongna ma-ah kaom ratha sari diangnga inphut, 5 khat-um ngamna kaom sakhi ka-eii, akathi karra akaring masa, manmasituol reng rakip chungnga wai roonna kaom Jisu Christa diangnga inphut riangwai li kadai kha nangni chungnga omrase.Ama'n eini anaminriang, halli ama thisen khan manu ah inphut eini kha anakatan, 6 halli ama Pathian khat-um Apa sepa katho sik-ah rengram thiampu ngaikha anamin-eii. Jisu Christa diang lurna khat-um ranak kha hektik kaboi erase! Amen. 7 Enru, suumphai le inruoiya ama ajuojei! Mi rakip in ama inmusik eii, kaseiya ama kasun ngai innum inmusik eii. Nuoipil chungnga kaom mi rakip in ama chungnga insirna inneisik eii. khawa takkha erase! Amen. 8 “Kei Inphutna (Alpha) khat-um Insuona (Omega) kha ka-eii,” Akaraatkhet Pumi Pathian in ati, “Tuun Pathian ka-eii, matiang um Pathian ka eii, khat-um akajuosik Pathian.” 9 Kei John ka-eii, nangni le suopui inchang, Christa nuk kajui ni-eii jarra ama rengram mi ka-eii nangni le kangaaklal omlekleiya poongraal kadaisuom inkhat kha ka-eii. Kei'n Pathian chong khat-um Jisu in akadik innamalarpi chongngai karil jarra Patmos inti tuiram khan kei innada. 10 Pumi nikhuoni khan kei'n ratha-ah kaleiom, halli tampalooi rasa inringtak ka-ang rasa inkhat in kanuktiang makheiya aheiti. 11 Hin ati, “Nimu ngaikha nang majiaro, halli nimajia larik kha koisuok sari ngaidiang minchoiro: Ephesus, Smyrna, Pergamum, Thyatira, Sardis, Philadelphia, khat-um Laodicea.” 12 Kei'n tume karil kha munasik katia nuktiang kalei-en, khawa phakhan kei'n soonna meiserkeii sari kaleimu, 13 halli soonna meiserkeii sari karra miring sapa ka-ang inkhat kaleimu, akepar katung inchuol songkol inkhat inluk halli soonna koongkhit inkhat aroop-ah inwaal. 14 Ama sam kha keelngam mul angnga abang, kawur angnga achek, halli ama mit kha meimachuon ang; 15 ama keii kha meiya inrou thir-inling ang, halli ama rasa kha toongtui tarasa ang. 16 Ama kutchang tiang arsi sari om, halli amur makheiya ariam inni indou chempui ka-ngei asuok. Ama meel kha kani khan aranak rakip-ah ina-eel angnga ana-eel. 17 Kei'n ama kaleimu phakhan akeii kuungnga akathi ka-angnga kajuopur. Ama'n akut changtiang kha kachungnga duongnga aleiti, “Chimaro! Kei Inphutna li Insuona kha ka-eii.” 18 Kei akaring chak ka-eii! Kei kaleithi, takkha tuunchu kei kumsoot sik-ah karing kha ka-ejei. Kei'n akathi khat-um kathiram chungnga wai roonna ranak kanei. 19 Majiaro, nimu ngaihi, tuunna kasuok khat-um nuktiang kasuoksik ngaihi. 20 Kakut changtiangnga kaom arsi sari khat-um soonna meiserkeii sari ngai ichoi tina khachu hi-eii: Arsi sari ngaihi koisuok sari ngai marwaan tirton ngaikha in-eii, halli soonna meiserkeii sari ngaihi koisuok sari ngaikha in-eii.

Revelation 1 (KBT1ETNIK)

In Other Versions