Revelation 11 (BBT1E)

1 Chiihphado gu shii miichang phi pha ji ne chua pha shiie duiine mia, chiih-è yao “Wuii srane Hamangkhung-aphuii ro Jewthek misiahò nane sraibao ji chua bo, chiih-è hanyie yi ji pha misiahò shii misiasiapho shii sasab rek mage bo. 2 Jishii fuang pha sibiangthek shii sasab arek rabo, nyieliieshii ithek shii ne migi-arekpho shii phijong ro, hanyie shii ne So Rajan hà habiethek shawi-è nyi habie lai luii shii dia ruii phro. 3 Gu ne guro khagi yi thuloyung guii pha nyi shii ren ruii phro, chiih-è ithek ji pha itham jia è wiengnyi è sariig inaithek iliing shii Hamangkhung-aphuii ro mua yao ruii phro.” 4 Khagipho nyi ji ne sumaro hingmuiithek nyi nane muchuangthek nyi ro, jithek ne sohnyiak pha Ithong ibi shii riu ro. 5 Hanyiejia è de ithek shii saduii thoh yi pha bidiang arone, ithek ro semthek re-è bai khia srane makthek shii srobro rek ruii phro; chiih-è ji duiine hanyie magunde ithek shii saduii thoh yi pha bidiang pho ne ua ruii phro. 6 Hamangkhung-aphuii ro mua yao pha ishak shii hamang shii haphie aphie yi pha bin pha riichai de ithek shii um ro. Ithek shii ne noi pha kho lakhung shii ifai hà khid muii yi pha riichai de um ro; ithek shii awaithek è khama yang pha ji shii nyamachiieng zab ichua pha mua è sohnyiak shii zuang pha riichai de um ro. 7 Ithek yi ithek ro mua ji yao ched mage shii, buii ibeymuthung ji ne bajo jam ihiung è ithek suang shii mak rek pha wuii ruii phro. Ai ne ithek shii yang srane ithek shii ne ua muii, 8 chiih-è ithek ro Ithong khi pha boh rajan pha lumuii hà ziin dun pha ji hà ithek ro siu sud ruii phro. Ji pha rajan beng ne òa ne yao pha ji ne Sodom nane Egyph ro. 9 Branthek yi zab pha sohthek, jadthek, nyuakthek, nane logthek re-è ithek ro siuthek da-uom è khuyo inaithek riig srane ithek shii awieng yi phro. 10 Sohnyiak pha branthek ne isa nyi iy pha ji shii ne sang ruii phro. Ithek ne sai srane awaithek chung lasenthek ren ruii phro, nyieliieshii ji pha chaigthek nyi è sohnyiak shii branthek shii bajo diig yie ro. 11 Idoh shii da-uom re-è khuyo inai shii chai-phi pha misey yi Hamangkhung-aphuii è wuiithok srane ithek shii khuddun, chiih-è ithek riu mage shii; chiih-è zab hanyie è ithek shii riig pho ne rumdun. 12 Chiihphado chaigthek nyi yi hamangkhung re-è ithek shii gow gang è yao pha yoi, “Thawuii bo!” Makphothek è ithek shii riig ramuii shii ithek shii hamangkhung hà sakhamiing è dun dun. 13 Ji pha ishak shii, thiihchiih ne awiedang pha sajid sam ro, rajan suarang re-è jiarang ne mua dun ro, chiih-è itham miley branthek ne ua muii ro. Thiichiih khe pha branthek ne rum srane hamangkhung pha Hamangkhung-aphuii pha bajobo shii chiong ro. 14 Nyichiieng pha awie ne jong sha, jishii uomchiieng pha awie ne khthiie wuii ruii phro! 15 Chiihphado mileychiieng pha hamangkhliie re-è awairo thu-ung thud mage, chiih-è thiihchiih ne hamangkhung hà boh gow, yao, “sohkhung shii khoh pha blu ne thuh gathek ro Ithong nane Masaiya airo rey dun ro, chiih-è ai ne idang nane idang khoh ruii phro!” 16 Chiihphado dukhothek ichiignawi hanyie yi Hamangkhung-aphuii moe biangthek shii dug pho ne awaithek ro mizia buzam jiing srane Hamankhung-aphuii shii misiasia ne, 17 yao:“Ithong Bohblu pha Hamangkhung-aphuii, jia hanyie um ne chiih-è hanyie ne umjong!”Gathek ne na shii laso phi nyieliieshii na è naro bajobo blu yiesrane khoh pha jao! 18 Migi arekpho shii ne lijieg zandun ro,nyieliieshii lijieg pha naro ishak ne thog sha ro,iy shii chua pha ishak ne thog sha ro.Nawairo khiaothek chaigthek chiih-è,chiih-è zab nawai bran shii, zab hanyie è na shii ilab rek boh nane ìu mia pha ji shii lasen phi pha ishak thog sha ruii ro.Hanyie è sohnyiak shii srobro rekpho shii ne srobro rek pha ishak thog sha ro! 19 Hamangkhung-aphuii ro misiahò ne hamangkhung hà hongjong ro, chiih-è Shiinyie Japho ne thiisa hà doh ro. Chiihphado thiisa hà ne haliao bliak ne hakhliing pha jiriak yie rone, sajid sam ne la è haben chiih ro.

Revelation 11 (BBT1E)

In Other Versions