Revelation 11 (TOMA)

1 Ti seeli kpakui veeni zèa kɔɠɔ bo fai ma, kulaai ga tukpɔi, ti ɠɛ mà: «Li, è GALA sei ʋɛlɛi ɠɔɠɔ, ta zalaɠa ɠulazuʋɛ, è naati gaalu, zɔiti ti nɔkɔsu ná. 2 Kɛlɛ GALA sei ʋɛlɛi ma ɠoii ɠoozuʋɛ yɛ ná, mina naa ɠɔɠɔ, mazɔlɔɔ naa veeʋɛ zii ɠiligiti zea, ta yiimai ɠɛ ga taa ɲadegai alu ʋuunaanigɔ maazu felegɔ (42) laawu. 3 Nà nà-keela wooi ve nà-zeele felegɔiti zea, ti yɛ daazeelizu, naama volo waagila unfelegɔ puulɔzitaiti (1.260) daawu, ti maaɠiliai ga saa wɔlɔ wo seɠei.» 4 Zeele felegɔi tɛiti ta ga wolive wulu felegɔiti, ta fitina zei ani felegɔiti, niiti ta ɗa lo eteai Maliɠii ɠakalaʋɛ. 5 Ni nu a ɠɛna pɔ ga é faa ɲɔu ɠɛ ga tiye, abui ɠa ɠula ti-laaʋɛ, é ti zili nuiti koloɠolo. Ungo, ni nu a ɠɛna pɔ ga é faa ɲɔu ɠɛ ga tiye, kɛni naa za ɠana nɔ. 6 Zobogi ɠa ti ya, ti geeɠɔlɔgi laaɠulu, nii a kɛ tona mina ʋu naama voloiti pɛ daawu, ti GALA goo wosu la. Zobogi ɠa ti ya, ti ziɛiti falibo ga ɲamai. Zobogi ɠa ti ya mɔnɔ ga ti eteai ɓɔlɔ ga seeɓɛi ma zii pɛ, siɛnɔpɛ su ti pɔ la. 7 Ta ɓena ga ta-ɠeela wooi wo, filɛ zuai é lɛɛzu, é ɠula zeɠezaɠa ɓokulagi zu, naa ɠa laalɛ ti wu ga kɔɔi. Toɠa vɔni ti ma, é ti ʋaa. 8 Ti-ma ʋoomaiti ta yɛ laani taa wolai zaama ʋelei zu, ʋɛ ti-Maliɠii ɓadɔni ná saa wului ma. Taa wolai nii ɠa é lolisu poogi zu ga Sɔdɔme, ɓaa Ezipete. 9 Zooi ɠilagilagi pɛ ma nuiti, bolodaiti pɛ, zii wooi pɛ su, zii pɛ su, ta ti-ma ʋoomaiti ka folo saʋagɔ ta tukpɛ (3,5) daawu, ti la vaa bu ga nu ti maaɠulu. 10 Etea nuɓusɛiti pɛ ta ɠoozunɛ, ti ɗa ɠɔkɔ niima nu felegɔiti saa vai zu, ti ɗa sabaliʋaiti teʋe ɓɔɠɔ ma ti ɠilagilagi pɛ, tɔɔzei GALA goo wo nu felegɔi niiti ti eteai zu nuɓusɛiti kpɔlɔni gola. 11 Kɛlɛ folo saʋagɔ ta tukpɛgi (3,5) leʋegai ma, zɛnvu viilɛi ʋaani, é zeɠe GALA pɔ, é lɔ ti zu. Ti wuzeɠeni, ti lo ɠɔɠɔiti ga. Dualuagi lɔɔni ti ʋɛtɛ nuiti su gola. 12 Zeele felegɔiti ti wooi ta mɛnini, gaaɓaingai, é zeɠe geezuʋɛ, é ɠɛ ti ma: «À lɛ ʋɛ!» Ti lɔɔni tonaɓiingi zu, ti lɛ geeɠɔlɔgi zu, ti zili nuiti gaazuyɛni ti ʋa. 13 Naama yeeɠɛɠalai nɔ laawu, zou ɓali wolai ɠɛɛni, taa wolai zeizu puugɔi ɠilazuʋɛ woloni ba, nu waadɔfela (7.000) zaani zou ɓalii naa zu. Nuɓusɛi mɔtaiti ti luani, ti lɛbiyai ve geeɠɔlɔgi ma ƓALAGI ʋɛ. 14 Nimiza vai velesiɛi leʋega. Wɛlɛ, saʋasiɛi ɠana ʋa gaamago nɔ. 15 Geezuɠeelai lɔfelasiɛi puʋugi vɛɛni. Woo ɠaaɓaingaiti ti mɛnini, ti zeɠe geeɠɔlɔgi zu, ti ɠɛ ma:«Masadai ɠɛɛ vai eteai unda,naama zobogi vea ade-Maliɠii ya,ta ná-zunui nii é gulɔ ɲadegai ziaai ma.Toɠa masadai ɠɛ, eyɛsu ɠɔ.» 16 Kɛwola wɔlɔ ʋuufelegɔ maazu naanigɔiti (24) ti zeini ta-masa kpɔkpɔgiti ga GALA kakalaʋɛ, naati ti dabui woni, ti unpilɛ zooi ma, ti nɔkɔ GALA bu, 17 ti ɠɛ ma:«Gá è mamasu, gi-Maliɠii, GALA Zɛbɛi-Pɛ-Maliɠii,ɗɛi è ná, è ɠɛni ná,ɗa-zɛbɛ wolai ɠula vai zu kɛlɛmaga è zei, è masadai ɠɛ. 18 Zii ɠiligiti ti yiiɠaawanani, kɛlɛ ɗa-yiiɠaawanai ʋaa,gɔvɛiti tukpɔɠaaleʋe ziɛgi zeelia,siɛgi zeelia ga è ɗa-wotiɠɛ nuiti ta-ɠulanumai ve,GALA goo wo nuiti, ta ɗa-nuiti,ta niiti ti è-laaseigi lɛbizu, ɓolomadɔɠɔiti ta seizumaanɛgiti,è naati koloɠolo, niiti ti eteai ɠoloɠolosu.» 19 GALA sei ʋɛlɛi é geeɠɔlɔgi zu daalaoni, minazeɠe kesui ɠaani bu. Mainmain saɠani, wooiti ti mɛni, tona kpunɛ tugiti ti ɠulani, zooi balini, sakɔtui ʋuuni ga gola.

Revelation 11 (TOMA)

In Other Versions