Revelation 11 (KBV)

1 Na ning'higwa nzela ilingile fana mhome ya kulingila, nilongeligwa, “Hita ukailinge kaye ya Mulungu na chilingo na kuwapeta wanhu wotambika umo. 2 Mbali sekeululinge luhelengo lwa kunze ya Kaye ya Mulungu, kwaviya weng'higwa wanhu weli siyo Wayahudi. Nawo wezaditavangila bululu jelile kwa miyezi malongo mane na midi. 3 Na niye nizaweng'ha ludabwa wasindila wangu waidi wowavalile magunia, muladi walotele kwa siku alufu imwe na magana maidi na malongo sita.” 4 Wasindila wawo waidi ni mibiki midi ya mizaituni na vinhu vidi va kwikila vitasa vimile haulongozi wa Mndewa wa isi. 5 One munhu yahageza kuwalumiza, moto wolawa mwiimilomo yawo na kuwananga wehi wawo, na munhu yondayageze kuwalumiza kezakomigwa kwa ifa iyo. 6 Kaidi wanawo udahi wa kuhinda ulanga muladi mvula sekeitonye lusita viwolotela. Wana udahi kugalusa nzasa zose za mazi kuwa damu na udahi wa kuitowa isi kwa mahulo mbasakanyo lusita viwolonda wenyewo. 7 Mbali wahakomeleza kulava usindila wawo, ding'onyo dikali dolawa muna dikombo ditali dilibule uhelelo dizaitowa nawo na kowahuma na kuwakoma. 8 Mitufi yawo izasigala igona muna dikulugumbi da bululu kulu muyawambiligwe Mndewa wawo. Kwa ulonzi wa chilotezi zina da bululu ijo ni Sodoma hebu Misili. 9 Wanhu wa chila zisi na chila kabila na chila ulonzi na chila welesi, wezailola mitufi iyo kwa lusita lwa siku nhatu na nusu na wezalema mitufi iyo sekeiwandigwe. 10 Wanhu wa mwiisi wezadeng'helela ifa ya wawo waidi, wezatenda dugila na kuigweka vitumetume, kwaviya walotezi wa Mulungu wano waidi wakalile wawagaza ng'hani wanhu wa isi. 11 Mbali hamwande ha ziya siku nhatu na nusu, mhumuzi ya ugima kulawa kwa Mulungu iwengila, nawo wema. Na wanhu wose wawawonile wadumba ng'hani. 12 Maabaho walotezi wawo waidi wahulika dizi kulu kulawa kuulanga diwalongela, “Kweleni mbaka kuno!” Wakwela kuulanga wazungulukigwa na wingu, kuno wehi wawo wakala wowalola. 13 Bahobaho kulawilila gudemeko kulu da isi, na hanhu ha longo ha bululu habanangika, wanhu alufu saba wadanganika muna digudemeko diya. Na wanhu wasigalile wadumba ng'hani, wamtunhiza Mulungu wa kuulanga. 14 Gayo dekaidi difosa, mbali lola gayo dekatatu dokwiza hima hima. 15 Maabaho msenga wa kuulanga wa saba katowa mhalati yake, na madizi makulu yahulikika kuulanga yolonga, “Sambi ufalume wa isi uwa wa Mndewa wetu na wa ija yoyasaguligwe kuwa Mulopozi. Nayo kezatawala siku zose.” 16 Na waja walala malongo maidi na wane, wokala muna ivigoda va chifalume vawo haulongozi wa Mulungu, watumbala mavindi na wadulisa matwi yawo na wamtambikila Mulungu, 17 wolonga,“Chokwing'ha hewela weye Mndewa Mulungu wetu wili na udahi,wili baha na ukalile uko,kwaviya kulusola ludabwa lwako lukulu na kwandusa kutawala fana mfalume. 18 Wanhu wa zisi wehilwa ng'hanimbali ludoko lwako lufika,ulo lusita lwa kuwalamulila nhaguso wadanganike.Lusita lwa kuwagweka wasang'hani wako walotezina wanhu welile na wanhu wose wowodidumba zina jako,wanhu wohishimika na wanhu hawahishimika,lusita lwa kudanganiza waja wowadanganiza wanhu wa isi.” 19 Maabaho Kaye ya Mulungu yili kuulanga ivuguligwa, na sanduku da lagano jake diwoneka umo. Kulawilila ng'huwa na mimwemwe na mibumo na gudemeko da isi na mvula ya mabwe ng'hulu ng'hani.

Revelation 11 (KBV)

In Other Versions