Revelation 11 (YAPE)

1 Ma aram mi ni pi’ ba ley i fol ngog ni bod ba ley i ban’en, me lunguy ngog, “Mu sak’iy ngam foleg e Tempel rok Got nge fare altar, ma ga the’eg e pi’in yad be meybil u lan e Tempel. 2 Machane dab mu foleg lan e yoror ko Tempel. Dab mu foleg, ya kan pi’ ngak e pi’in ni gathi yad piyu Israel, ni yad e bay uryot’ed daken fare Binaw nib Thothup ni aningeg i ragag nge l’agruw e pul. 3 Bay gu l’oeg l’agruw ni’ ni ngar weregew murung’ageg ni ka ron’ew e mad ntutuw; ma bay ra weregew e thin rok Got u lan ragag nge l’agruw mir’ay nge nel’ i ragag e rran.” 4 Gali cha’nem ni ngar weregew e thin rok Got e yow fa gal ke gek’iy ni olive nge fa gal magal ni bay u p’eowchen fa en ni ir e Somol nu fayleng. 5 Fa’anra guy be’ rogon ni nge maad’ad ngorow, ma bay yib e nifiy u l’ugunrow nge li’ e to’ogor rorow; ere en nra guy rogon ni nge maad’ad ngorow e ireray rogon e yam’ nra tay. 6 Ma bay mat’awrow ni ngar ningew lanelang ni nge dabki aw e n’uw ko ngiyal’ i n’en ni ba’aram ni bay ur weregew e thin rok Got riy. Ma bay mat’awrow nga gubin e alublub ni ngar pingegew nge ngal’ e ran riy nracha’; ma ku bay mat’awrow ni ngar gafgow nigew e fayleng nga gubin mit e gafgow ko yu ngiyal’ i n’en ni yow ra finey. 7 Ma nap’an ni bay ra mu’gow i wereg e thin rok Got, me yib fare gamanman ni yib u lan fare abyss i cham ngorow. Ma bayi gel ngorow me li’row ngar m’ow, 8 ma bayi par downgirow u daken e wo’ ko fare binaw nib gilbuguwan, ni aram e gin nrichibiy e Somol rorow riy ko kuruth. Re ngachal nra m’ag ko re binaw nem e Sodom, ara Egypt. 9 Ma gubin mit e girdi’ nrabad, nge tin nrabad u urngin e ganong, nge girdi’ ni yib u urngin e thin nge gubin e nam e bay ur changargad nga downgirow ni dalip nge baley e rran, ma dab ni pithig e thin riy ni ngan k’eyagrow. 10 Ma girdi’ nu fayleng e bay ra felfelan’gad nike yim’ e gali cha’nem. Bay ra madnomgad ngar tow’ath niged yad, ni bochan e gali profet nem e ba ga’ e gafgow nra tiyew ngak e girdi’ nu fayleng. 11 Ma fa’ani chuw dalip nge baley e rran me pi’ Got athon l’ugun ngorow nma fasegey, nge yan nga fithik’ i dowrow, miyow sak’iy ngalang; ma urngin e girdi’ nra guyed yow ni kar fosgow e rib gel e tamdag ni yib ngorad. 12 Ma aram me rung’ag fa gali profet ba lam ni ba ga’ ni be non ngorow u tharmiy ni be ga’ar, “Mirew ngaray ngalang!” Ma nap’an ni be yaliyrow e pi to’ogor rorow miyow yan nga lanelang u fithik’ bangi manileng. 13 Ka chingiyal’ nem me yib ba durru’ nib gel; me kireb ta’ab guruy u ragag i guruy ko fare binaw, ma medlip i biyu’ e girdi’ e yim’ ko re durru’ nem. Ma tin ni magey e girdi’ e ra m’ad ko marus miyad yog nrib sorok Got nu tharmiy. 14 Me m’ay e bin l’agruw e gafgow; machane mu sap! Dabki n’uw nap’an me yib e bin dalip e gafgow. 15 Me thoy fa bin medlip e engel e rappa rok, me yan lamay ni ba ga’ u lan e tharmiy ni be lunguy, “Ke yib gelngin Somol rodad nge Messiah rok ni ngar gagiyegnigew e girdi’ nu fayleng, ma bayi gagiyegnag ndariy n’umngin nap’an!” 16 Ma fa rliw’ nge aningeg i pi’ilal ni kar pired nga tagil’rad u p’eowchen Got e ra parawgad nga but’ ngar siro’gad ngak Got, 17 ni be lungurad:“Somol ni Got ni Gubin ma Rayag Rok, ni ir e en ni bay e chiney nge en ni ki immoy!Gamad be pining e magaer ngom ni fan e kam maruwel nga gelngim nib gelni kam tabab ko gagiyeg! 18 Pi nam e kari gel e damumuw rorad,ya ke taw nga nap’an ni nge taw e damumuw rom,nge nga nap’an ni ngam pufthinnag e pi’in ni karm’ad;nge nga nap’an e ngiyal’ ni ngam pi’ puluwon e tapigpig rom ni fapi profet,nge urngin e tirom e girdi’, ni pi’in yad ba tolang nge pi’in yad ba sobut’,ni urngin e pi’in ni bay madgum u wun’rad.Ke taw nga nap’an ni ngan kirebnag e pi’in ni kar kireb niged e fayleng!” 19 Me mab e Tempel rok Got u tharmiy, ma fare Kahol ko M’ag rok Got e ni guy u lan e Tempel rok. Me matmat e uluch, me yan lingan bogi n’en, ma be chub e dirra’, me yib ba durru’, me mul e ayis ni gagang’ yang u lang nga but’ ni bod e n’uw.

Revelation 11 (YAPE)

In Other Versions