Revelation 16 (BBT1E)

1 Chiihphado gu è misiahò re-è miley hamangkhliiethek shii gow gang re-è yao pha yoi: “Wuii srane Hamangkhung-aphuii ro lijieg pha shiikhiiakhjamthek miley shii sohnyiak shii thoi mage bo!” 2 Igobi pha hamangkhliie è wuii srane awairo shiikhiiakhjam ji sohnyiak shii thoi mage. Diig nane riie saduiithek yi hanyie shii buii ibeymuthung pha cheb um pha nane ji pha jangbang shii misiasia pho shii khia yi. 3 Chiihphado, nyichiieng pha hamangkhliie è airo shiikhiiakhjam shii khamuii lakhung shii thoi mage. Chiih-è kho ne iy dun pha bran ro ifai duiine rey dun, chiih-è khamuii pha zab isieng miseypho ne iy dun. 4 Chiihphado uomchiieng pha hamangkhliie è awairo shiikhiiakhjam yi khobohthek nane khokhrugthek hà thoi mage, chiih-è jithek ne ifai rey dun. 5 Khothek pha ilkhi hamangkhliie è yao pha gu è yoi, “Na è chuathek yie pha jithek ne isbang chak ro, So Jia wo, na ne thuh hanyie um chiih-è hanyie um jong pha ji ro! 6 Ithek è Hamangkhung-aphuii ro branthek nane chaigthek ifai shii noi yi, chiih-è ji è nathek è ithek shii ifai niing pha phi. Ithek è nyie mua sbo ji mua ro!” 7 Chiihphado sraibao re-è gow yao pha gu è yoi, “Bohblu Ithong Hamangkhung-aphuii! Naro chuathek ne izai nane giang ro.” 8 Chiihphado wichiieng pha hamangkhliie è awairo shiikhiiakhjam yi hasiang shii thoi mage, chiih-è ji ne branthek shii ne ji pha ichieg re-è sud yi. 9 Ithek shii ne ichieg re-è sud dun, chiih-è ithek ne Hamangkhung-aphuii ro ibeng shii thamai, hanyie shii awie pha muathek lakhung shii riichai um. Jishii ithek ne awaithek ro layogthek re-è akhid chiih-è airo bajobo shii de achiong ro. 10 Chiihphado guiichiieng pha hamangkhliie è awairo shiikhiiakhjam yi buii ibeymuthung pha biang shii thoi mage. Igiia ne buii ibeymuthung ro sajathua lakhung shii chiihdun, chiih-è nyieliieshii ithek ro riie ji re-è branthek ne awaithek ro rithek thak, 11 chiih-è ithek ne awaithek ro riiethek nane saduiithek pha chiang re-è hamangkhung pha Hamangkhung-aphuii shii thamai. Jimagunde ithek ne awaithek ro awie pha lumuiithek re-è akhid ro. 12 Chiihphado riigchiieng pha hamangkhliie è awairo shiikhiiakhjam yi boh Euphrathes pha Khoboh shii thoi mage. Bichiu re-è wuii ruii pha sajathek ro lumuii saro phi pha khoboh ne òadun ne. 13 Chiihphado gu è rurusuathek duiine mia pha uom izia ragungthek doh. Ithek ne hakhliingmuii chiih-è buii ibeymuthung nane biidiie chaig pha sem re-è khia ro. 14 Ithek ne ibuiithek pha ragungthek ro ji re-è buangthek rek ro. Ji pha ragungthek uom è Bohblu Hamangkhung-aphuii ro boh Inai pha mak shii zab pha sajathek ò yie pha sohjambling hà wuii dun ro. 15 “Yoi bo! Gu ne mugo duiine wuii ruii phro! Hanyie ne sieng ne awairo yungthek shii ragia rekpho shii ne ai ne sang ruii phro, ji è ai ne ikhilen alua ruii chiih-è branthek moe shii awo ruii phro!” 16 Chiihphado ragunthek è sajathek shii Hebriu re-è Armagedon rone ho muii pha ithua hà noh ro. 17 Milechiieng pha hamangkhliie re-è awai ro shiikhiiakhjam yi hasam hà thoi mage. Gang gow yi misiahò pha biang re-è thog ne, yao, “Hì ne rekjong ro!” 18 Thiisa hà ne haliao pha bliakthek um chiih-è hakhliing pha khliingthek roh ne, chiih-è buii sajid sam ro. Thiisa hà ne tharohthamang jad nyarab dang ne hì duiine pha sajid arey ba ro; hì ne zab re-è awiedang pha sajid ji ro! 19 Boh rajan ne ichuathek uom shii chui dun ro, chiih-è zab sohthek pha rajanthek ne srobro rey dun ro. Hamangkhung-aphuii è boh Babylon ji nowkhlei, chiih-è aishii airo gog re-è phuii niing yi—Airo buii lijieg pha phuii ji ro. 20 Zab pha gachungthek ne lamdun, zab pha phiingthek ne san dun ro. 21 Boh habenthek, zab ne shiiriie saguii nyama ro, chiih-è hamang re-è branthek lakhung shii chiih, ji pha chiang branthek ne Hamangkhung-aphuii shii thamai ro, nyieliieshii hì ne buii awie pha diig ro.

Revelation 16 (BBT1E)

In Other Versions