Revelation 16 (KNFD)
1 Gu mbara mbararagim, guma mbe kamthooŋ Fhe Bakɨme Phena vhen ka nzuai. Ana nzuav khɨrɨv, mba harathɨgi enserir kaav, khaŋ nzuai, “Nde mba harathɨgi thuuri Fhe Bakɨmen ndav shirɨ bakɨme ntan ki, nde nta siv, kha nuiana suri.” 2 Ana maaŋ nzuaim, mba fharigi enser vov, won thuuŋ siav, nuiana suagi. Ana ana sia suagim, nzuur meeiŋ, nta mba ruaŋruaŋgi sɨgar tum kav, vhɨra anan tuma kargi bigɨna rotu mbui gumgi gum mbigir hegap shim, mbe ntan zaagi ndi. 3 Mba fharigi enser thɨgi enser won thuuŋ siav mbasɨga suagi. Ana ana siav, mbasɨga suagim, mbasɨk mbɨ gangan guma rimgim, ana vɨzɨn gɨmgi fara muuŋgi. Mbasɨk mba khesharav vɨzɨna gegi. Mba mbasɨgar ŋamki bigi, nta za vhɨzgi. 4 Mba fharigi enserni thɨgi enser, ana won thuuŋ siav, phara bakɨvi ga suav, phara ntogi ga suav, vhɨra mɨmɨr kav hi mbogi phara suagi. Mba phara gu mbogi phara za vɨzɨna gegi. 5 Gu mbararagim, mba phara gari enser khaŋ nzuai, “Fhe Bakɨme, ndu ntige khar ki, ndu fhum guarara ki.Ndun tɨvi, nta guigira nzerav, guigira ŋgarigi.Ndu kha gumgi gu mbigi ndu mben tɨvi, ndu za nta gangiap, ndu mben hɨrga bigi mbatɨgi, ndu nta nzuaim, nta mben hi.Ndu nzuai buni, nta guigira za nzerigi. 6 Mba gumgi gu mbigi, mbe ndun kamthooŋ gumgi, mbe mbe shogim, mbe vhɨzgim, mbe vhɨra ndun gumgi gu mbigi shogim, mbe vhɨzgi.Mbe mbe shogim, mbe vɨzi sia suegi.Maaŋ muuŋgiap, ndu vɨzɨnan mba gumgi gu mbigi mbatɨgir nɨɨŋgim, mbe anan mbɨri.Ne guigira, mbe muuŋgi tɨvi mbatɨgi ŋgarkarav nzerara maaŋ mbe mbui.” 7 Gu wom mbararagim, mba ndɨga vhuuŋ hi ruina mpooi artarar guma mbe kamthooŋ khaŋ nzuai, “Guma Bakɨme, ndu Guigira Ŋkasŋka Ki Fhe Bakɨme ma.Ndu kha nuianan ki gumgi gu mbigi mbui tɨvi ga nzuav mbe nzuai guma ma.Khueŋ vhɨra, ndu guigi guara, ndun tɨvi garav, mbe nzuav nzuai buni, nta guigi guarara, nta vhɨra za nzerigi.” 8 Mba fethɨgi enser, ana wo thuuŋ siav ra suagim, Fhe Bakɨme fhura ra garim, ana shirɨ guigira shigap, mba gumgi gu mbigi, ana guigira mbe tui. 9 Mba ran vhava bakɨme, ana guigira shirɨ mbatɨga muuŋgiap, guigira tu mbatɨgar mba gumgi gu mbigi ga mbui. Mbe Fhe Bakɨme zɨ zitav, ana nzɨɨv, buni mbatɨgir ana nzuai. Mba Fhe Bakɨme, ana mben hi bigi mbatɨgi gari ŋkasŋka ki. Ana maaŋ mbe mbuim, mbe ndavi domdorav ana zɨ ndi vun kuamkuagi fhu. 10 Mba meeŋthɨgi enser, ana won thuuŋ siav, mba ruaŋruaŋgi sɨgar ŋgui vhɨrve gari guman pan pigi mpirmpirɨga suagi. Ana ana sia suagim, gɨngɨn bakɨme mba ruaŋruaŋgi sɨgar ŋkasŋkar piin ki ŋgun ki gumgi gu mbigi vharigi. Mbe guigira zaa mbatɨga guarara ndi. Mbe maaŋ mbuav, mbe wari won zeri ga biav, nta gori. 11 Mbe mba ndi zaagi ga ndɨkndɨgap, mbe vhɨra mbe fhavir ki nzuu, mbe nta ndɨkndɨgap, mbe Hevenan ki Fhe Bakɨme, mbe ana nzɨɨv, buni mbatɨgir ana nzuai. 12 Mba mporathɨgi enser won thuuŋ siav, Ufretis mbɨ bakɨme suagi. Ana ana siav, ana suagim, mba mbɨ za mbaagiap, shaa rɨgi. Ana shaa rɨgap, mbu ra ndai fhain ki ŋgui vhɨrve gari gumgir pani ga nzuav tuav ga muuŋgi. 13 Gu mbara garav, gu ŋina mbatɨga phuni khegene garim, nta khivi gangana mbuav hegi. Nta hegap, mbevi mba kuruga bakɨme kamthoon kim, mbevi mba ruaŋruaŋgi sɨga kamthoon kim, mbevi mba Fhe Bakɨmen kamthooŋ guman wo shɨkshɨgip fhura gumgi gu mbigi guiguigi guman kamthoon ki. 14 Mba ŋiniŋgi mbatɨgi guarira, nta mbarkɨrga mirikori ga mbuav, za kha ŋgui bakɨvir za kha nuianan mba ŋgui vhɨrve gari gumgir panin haa ruav, mbe mbui. Mbe mben muuŋrim, mbe wari won ntari ga mbui gɨɨtɨvi fukfugɨp, mbe bevahɨrga, mbe ntara khavɨrga. Mbe za kha ŋkasŋkagi ki Fhe Bakɨme, za kha nuianan ki gumgi gu mbigi muuŋgi tɨvi gangiap, mbe suanga tuga bakɨmen, mbe ana phorgɨ shogɨrga. 15 Guma Bakɨme khaŋ nzuai, “Nde mbarara! Gu vhemkora kɨɨi guma kɨmɨn za zi farar muuŋgip nden hɨgɨrga. Maaŋ muuŋgiap, guma ana kui fhu, ana wo shagi ndi won hara suegap ki ana ndikndigɨri. Ne khaŋ muuŋgi, ana fhura mbugumra ŋgɨgɨrim, kha gumgi gu mbigi ana fhava ndera gangirga, ana nen mberɨrga tuktɨgi fhuvara.” 16 Mba ŋiniŋgi mbatɨgi mba ŋgui vhɨrve gari gumgir panin kov zav, mba ŋanen zegap, mbe wari fugi. Mbe mba wari fugi ŋaneŋ, mbe Hibruiŋ kaman kha zitɨr mba ŋaneŋ ga mbui, Armagedon. 17 Mba harathɨgi enser wo thuuŋ siav, buiva suagi. Ana ana sia suagim, Hevenan Fhe Bakɨme Phenan ŋgui vhɨrve gari guman pana pigi mpirmpirɨgar guma kamthooŋ mbe khɨrɨv kaav khaŋ nzuai, “Mba bigi vhɨzgi.” 18 Ana maaŋ nzuaim, mba buip vhekvhegap, fhura shɨkshɨga ndogi, khɨkhɨɨ bakɨvi him, buip phɨrerim, khɨmkhɨk bakɨme kha nuianan mbui. Mba khɨmkhɨk, ana guigira kɨvgi. Fhe Bakɨme fhara guarara kha nuiana muuŋgi tugen kegap zav ntige khar ki tugen ki, gumgi gu mbigi, mbe maaŋ muuŋgi khɨmkhɨga the garim, ana muuŋgi fhuvara. 19 Mba khɨmkhɨk mbuim, Babiron ŋgu bakɨme rɨgɨra shɨgeregap, fɨga mpuani khegene ga gegi. Kha nuianan ki ŋgui bakɨvi za mbatɨgi. Fhe Bakɨme mba Babiron ŋgu bakɨme muuŋgi tɨvi ga ndɨrgap, ana Babiron ŋgu bakɨme muuŋgim, ana won wain mbɨ thama pi. Mba wain mbɨn tham, ana guigira Fhe Bakɨmen ndav shɨrɨ bakɨ guar ma. 20 Mba khɨmkhɨk mbuim, mba rɨgɨkɨrivige, nta za mbar vegi. Mbɨkshɨɨ, nta vhɨra wom ki fhu. 21 Ais bakɨme mbok fara muuŋgiap zeri. Mba aisan simtɨk 50 kirogram fara muuŋgi. Mba ais zerav mba gumgi gu mbigi, ana guigira mben farfagi. Maaŋ muuŋgiap, mbe mba ais mben farfagi ne nzuav, Fhe Bakɨme nzɨɨi buni mbatɨgir Fhe Bakɨme suaŋgi.
In Other Versions
Revelation 16 in the BOHNTLTAL
Revelation 16 in the KBT1ETNIK
Revelation 16 in the TBIAOTANT