Revelation 21 (BBT1E)

1 Chiihphado gu è iwo hamangkhung nane iwo sohnyiak doh. Igobi pha hamangkhung nane igobi pha sohnyiak ne san dun ro, chiih-è khamuii ne ùadun ro. 2 Chiih-è gu è So Rajan nyie yi iwo Jerusalem ji shii doh chiih-è Hamangkhung-aphuii re-è hamangkhung wuii ne, phiyiybimi ne awairo gey shii si pha chiakhua pha duiine saro ne khriig rek ro gu è pha doh ro. 3 Gu è gang gow yi biang re-è yao pha yoi: “Thuh shii Hamangkhung-aphuii ro hò ne bran rog shii ro! Ai ne ithek rog shii rai ruii phro, chiih-è ithek ne airo branthek ro. Hamangkhung-aphuii awai ne ithek rog shii um ruii phro, chiih-è ai ne ithek ro Hamangkhung-aphuii ro. 4 Ai ne ithek ro mieg re-è miegkho sad ruii phro. Thiisa hà ne a-iy sha ruii phro, zo chiih-è ziak chiih-è riie ne oi sha ro. Ihèg manathek ne sandjong ro.” 5 Chiihphado hanyie biang shii dug pha ji è yao, “Chiih-è thuh gu ne zab manathek shii iwo rab pha ro!” Ai è de gu shii yao, “Hì zey bo, nyieliieshii hì pha miyaogamthek ne izai nane migi rek mua ruii phro.” 6 Chiih-è ai è yao, “Hì ne rekjong ro! Gu ne igobi nane idohhè ro, jao pha nane jong pha ro. Hanyie magunde khahang-hang pho ne nyie de igong aphi chid pha chai pha khokhrug è niing yi pha rangsua phi ruii phro. 7 Hanyie è yang shii mua pho ne gu re-è ji choi ruii phro: Gu ne ithek ro Hamangkhung-aphuii rey ruii phro, chiih-è ithek ne guro aniphiing rey ruii phro. 8 Jimagunde murumdumthek, khinrin rek, khiijai blia rekpho, sgohthek, siulao, hanyie è jadu rek, hanyie è jangbangthek shii misiasia, chiih-è zab pha khlamthek—ithek ro ithua ne barud rog shii hang pha bai khabang nyie ji ne dinpha iy ji ro.” 9 Miley pha hamangkhliie yi hanyie shii idohhè pha miley muathek è ley pha miley shiikhiiakhjam um pha ji è jia è gu shii wuii ne yao, Thawuii bo, chiih-è gu ne shiishaiduii ro yiy ji pha phiyiybimi shii doh yi pha ro. 10 Ragung è gu shii phrai dun, chiih-è hamangkhliie re-è gu shii ne bajo giu phiing lakhung hà noh dun. Ai è gu shii Jerusalem riig yi, ji ne So Rajan ro, ji ne Hamangkhung-aphuii re-è hamangkhung è thazam wuiiramuii ro. 11 Jine Hamangkhung-aphuii ro biisiie rog shii khlieng ro. Rajan ne jasphar pha igong lubao duiine khlieng ramuii ro, chiih-è sang grasthal duiine, doh yi ro. 12 Ji ne boh, giu mudua snanyi gakthek rog shii chiih-è gakthek pha ilkhi snanyi hamangkhliiethek rog shii ro. Ji pha gakthek shii ne Israel pha bran snanyi jadthek ibengthek zey ne um ro. 13 Thiichiih shii ne jijia ikhichiug hà gak uom um ro: Bichiu hà uom, hayang hà uom, hakhoi hà uom, nugo hà um ro. 14 Rajan pha sarong shii ne snanyi lubaothek è rab ro, ji shii ne shiishaiduii ro guaphasamoythek snanyi ro ibeng zeyjong ro. 15 Hamangkhliie hanyie gu shii yao pha ji shii ne rajan pha gakthek, nane muthua shii chua pha ne san muchuang um ro. 16 Rajan ne riie nane phiang ne ò ikhichiung ro. Hamangkhliie re-è rajan shii awairo chua pha muchuang re-è chua: Jine itham nyi è wieng wi labiang um ro, ji ne ji nyama giu chiih-è ji nyama riie ro. 17 Hamangkhliie è muthua shii de chua, chiih-è ji ne 216 giia giu ro, ji ne ai è kho pha chua pha ji duiine chua. 18 Muthua ne jasphar re-è rab chiih-è rajan shii ne igang san è rab, ji ne gang sasia duiine ro. 19 Rajan pha muthua pha sarong lubaothek ne igong pha lubaothek pha zab ichuathek re-è chiakhua ro. Igobi pha sarong lubao ne jasphar lubao ro, dinpha ne saphir pha igong lubao ro, uomchiieng pha ji ne agathe beng pha igong lubao ro, wichiieng pha ji ne emerald beng pha igong lubao ro, 20 guiichiieng pha ji ne onyz pha igong lubao ro, riigchiieng pha ji ne kharnelian pha igong lubao ro, mileychiieng pha ji ne ijoi gardz pha igong lubao ro, mileaochiieng pha ji ne beryl pha igong lubao ro, digeychiieng pha ji ne thophaz pha igong lubao ro, suachiieng pha ji ne chalsedony pha igong lubao ro, snajiachiieng pha ji ne thurguois pha igong lubao ro, snanyichiieng pha ji ne amethys pha igong lubao ro. 21 Gak snanyi ji ne zithek snanyi ro; zab pha jijia gak ne iphen zi è rab ro. Rajan pha lumuii ne igang san è rab ro, ji ne sasia duiine isang ro. 22 Gu ne rajan shii misiahò adoh ro, nyieliieshii ji pha misiahò ne Ithong Hamangkhung-aphuii Bohblu nane shiishai duiine ro. 23 Rajan ne ai lakhung shii chuang pha hasiang nane habie ne achiid ro, nyieliieshii Hamangkhung-aphuii ro biisiie ne ai lakhung shii chuang ro, chiih-è Shiishaiduii awai ne muchuang ro. 24 Zab sohnyiak pha bran ne airo muchuang re-è lua ruii phro, chiih-è sohnyiak pha sajathek ne awaithek ro nuruii ne ji hà yie ruii phro. 25 Rajan pha gakthek ne zab pha inai hong ruii phro; ithek ne khuchungde abin ruii phro, nyieliieshii thiisa hà ne habiu oi sha ro. 26 Zabèboh nane sohthek pha nuruii shii ne rajan hà yie ruii phro. 27 Jimagungde izia chiih-è hanyie è biwo manathek rek, chiih-è biidiie yao pho ne ji pha rajan shii akhud ruii phro. Hanyie ro ibeng ne shiishaiduii ro chai pha jigi shii zeyjong pho khud mua bie ruii phro.

Revelation 21 (BBT1E)

In Other Versions