Romans 4 (BBT1E)

1 Gethek nyie yao muluii, chiihphado, gethek ro riing Abraham aphuii shii? Ai mirek ji nyie ga? 2 Ai mirek pha ji è de ai yi Hamangkhung-aphuii rog shii giang rey ne rai arone, ai de ìujia ne nyigodog rek iwa, jishii Hamangkhung-aphuii mieg miie hà asi iwa. 3 Jigigam shii yao, “Abraham è Hamangkhung-aphuii shii migi rek, chiih-è nyieliieshii airo migi ne Hamangkhung-aphuii è giang hà choi phi. 4 Branthek hanyie è blia rek pha ji ne riinangthek mua ruii phro, jishii jine ley phi pha asi ro, ithek è wiang ne rek ne ji è mua ro. 5 Bran hanyie è awai migi shii luthong ne; awai blia shii aluthong rabo; chiih-è hanyie è biidiie chiih-è izai shii yao thieg pha Hamangkhung-aphuii shii migi rek pho ne, airo migi shii Hamangkhung-aphuii è yi ne sasab rek srane aishii ne giang è awai rog shii ruii muii. 6 Hamangkhung-aphuii è branthek hanyie yi blia rek pha ji è asi pha migi chiang è giang rone choi phi pha ji shii ne Dawid è de wie rone yao ro. 7 “Sang pho ne hìthek ro hanyie ro biidiie blianane layog shii khung phi! 8 Sang pho ne hìthek ro hanyie ro layog shii Ithong è sasab aruii!” 9 Dawid miyao pha sang pha ji ne migiangkheg pho ro bie bey? Khuchung magunde asi ro! Hì ne Migiang-akheg ba pho shii de ro. Ji è gethek ne jigigam shii thieg jong, “Abraham è Hamangkhung-aphuii shii migi rek, chiih-è nyieliieshii airo migi è Hamangkhung-aphuii è aishii giang ro è choi phi.” 10 Hì pha ishak ne khuchung ga? Hì ne Abraham è Migiang-akheg ba pha ibi ba asi idoh shii ba? Hì ne ibi hà ro, idoh hà asi ro. 11 Ai ne idoh hà migiangkheg ba, chiih-è ai migiangkheg pha ji ne nyieliieshii ai migiang-akheg ba pha ibi shii airo migi jishii Hamangkhung-aphuii è giang rone nuii phi pha cheb ro. Chiih-è ji è Abraham ne zab hanyie è Hamangkhung-aphuii shii migi rek ne chiih-è ai è giang ro è nuii phi pho pha ragung aphuii ro. 12 Ai ne Migiang kheg pho ro aphuii de ro, ji ne, hanyie è migiangkheg pho rog cho gieng shii de ro, chiih-è gethek ro aphuii Abraham è Migiang-akheg ba pha ibi shii sieng pha duiine migi pha ò chai shii sieng pho ro de aphuii ro. 13 Hamangkhung-aphuii è Abraham nane ai riingthek shii sohjambling ne zab ai ro rey phro ne sbang phi, ai è ji è rek phi, nyieliieshii Abraham è Iphey nuii rone asi ro, jishii nyieliieshii ai è migi rek chiih-è Hamangkhung-aphuii è giang rone choi phi. 14 Hanyie è Iphey shii nuii bie ne Hamangkhung-aphuii ro sbang ji zab rey arone branthek ro migi ne adubo ro chiih-è Hamangkhung-aphuii ro sbang ne adunmey pha rekdun phro. 15 Iphey è Hamangkhung-aphuii ro lijieg yi phro; jishii Iphey oi bsa ne, Iphey anuii pha arek phro. 16 Chiih-è sbang ne migi lakhung shii mua ruii phro, ji è sbang ne Hamangkhung-aphuii è zab pha Abraham riingthek shii de phi, chiih-è Iphey nuii pho shii asi bie pha, jishii Abraham duiine hanyie è migi rek pho shii de ro. Nyieliieshii Abraham ne gethek zab pha ragung aphuii ro; 17 Jigigam shii yao, Gu na shii bajo soh pha aphuii rab phi pha ro, Hanyie è iy pha ji è hòi din yi, chiih-è ai è yung mage ne nyie arey pha ji de rey yi, Abraham è Hamangkhung-aphuii shii migi rek ji è sbang ne Hamangkhung-aphuii mieg moe shii wie ro. 18 “Abraham è migi rek ne chiih-è luthong, thiisa hà luthong chid pha nyie miyao oi shii pha rangde luthong, ji è ai ne bajo thiig pha aphuii rey dun.”Jigigam shii yao pha duiine, “Naro riingthek ne dadiangthek duiine rey ruii phro.” 19 Ai ne idam wieng jia rey sha; jishii ai iy sha pha rek ne Sarah de ani agiak sha pha re ne awai siu è phak ramuii shii isa ro migi ne ìu arey ro. 20 Airo migi jine athoh, chiih-è Hamangkhung-aphuii ro sbang shii biidiie rone anow; airo migi ne blu rog awaishii ley, chiih-è ai è Hamangkhung-aphuii shii laso phi. 21 Aishii ne izai è Hamangkhung-aphuii è nyie sbang phi pha ji ne rek mua phi. 22 Jine nyieliieshii Abraham ro migi ji è “Hamangkhung-aphuii è giang rone nuii phi.” 23 Hì pha miyaogamthek ne, aishii giang rone nuii phi pha hì ne awai ji jia shii azey bie ro. 24 Hì ne gethek hanyie è Ithong Isu ne iy pha ji è hòi din rone migi rek ne giang shii nuii phi pho shii de zey phro. 25 Nyieliieshii gethek layog chiang è ai iy dun, chiih-è gethek shii Hamangkhung-aphuii rog rangsua ruii pha hòi din phi.

Romans 4 (BBT1E)

In Other Versions